Read bura-pabir Kəth Apos 2 Bible Online

Kəth Apos 2 - bura-pabir bible

Kəth Apos 2

¹Sakatə Vir Pentikost ku hara, antə shanga mjir nu Yesu ni tsaptədzi akwa vəi duku.

²Təkəma antə kuraku laga səghəi akwar amtazi apa shambar na akwa fya ka duna, ka nghyantə shanga mbwa tə da ndzəndzi akwa ni.

³Antə da wutə su laga apa kyanggyara u'u, na ndəkəmtadzi ata kəra kəlara mda akwa nca ɗa.

⁴Antə shanga ɗa nghyantədzi ka Mambəl na Ɓɗakkarkara, tə da baɗitə gari akwa mnyayeri ar mji damwa, kalkal apatə Mambəl ku na ala ɗa dunar harari.

⁵Antə anda akwa Urushalima ni, mjir Yahudi aɗi na ana nu Hyel ka jirkur, na thlata akwa shanga tsəɗiyayeri na akwa duniya.

⁶Sakatə da nggatə kuraka shambar ngəni, antə mji hwi si ka tsaptədzi dlama dlama. Shanga ɗa ku ndatədzi, kamnyar kəlara mda akwa nca ɗa akwa nggatə mjir nu ni akwa gari akwa mnyarni.

⁷Da ku ndatədzi ka duna, tə da ləkwa pəla, “Aɗi shanga mji ngəni akwa gari ni mjir Galili pwa?

⁸Apa madi tə shanga mburu akwa nggatə ɗa akwa mnya akwa mnyar mburu ri?”

⁹Nggədza mbur dur zumzum. Mbur pakpakari kəga mjir Parthli, ka mjir Mediya, ka mjir Elam, ka mji na thlata ahar Mesopotamiya, ka Yahudiya, ka Kappadokiya, ka Pontus, ka Asiya,

¹⁰ka Firijiya, ka Pamfiliya, ka Masar, ka diyayeri na kalaktə Sayirin akwa tsəɗi Libiya, har ka mətəpiyayeri na thlata ahar Rom, mburu tə mdə ya mburu akwa addinər Yahudi, kəga mji na tubi ka ləkwa addinər mburu ni shang ata kəma duku.

¹¹Tsuwa mji aɗi akwa nca mburu na mjir Krete, ka mjir Arab. Amma wala apani mburu akwa nggatə ɗa shang akwa gari akwa mnyar mburu, ata kəra suayeri na ol'ola tə Hyel hara.

¹²Antə shanga ɗa ku ndatədzi ka ndəndatədzi, akwa pəla aka nvwa ɗa abbər, “Man karapur su ngəni ri?”

¹³Amma mji laga akwa hara kyartəkur aka mjir nuwa ni, akwa pəla, “Da akwa wika ka yimər anap na bilən.”

¹⁴Antə Bitrəs thlata ata kəma duku kəga aposəlayeri na kumkantang ni, tə tsa haptə kurakari ka gari ala ɗa abbər, “Giri na mjir Yahudiya, ka shanga giri na akwa Urushalima, psi giri thləma giri, ka giri vədzə hangkala giri aka su tə I ata pəlari.

¹⁵Mji ngəni aɗi akwa wika wa, apatə bwadukwa giri akwa dzamari ni, təng tə kulini saka əmdla na ɗəɗəpa daci ni.

¹⁶Amma, ngəni an su tə naɓi Yowel pəla,

¹⁷“ ‘Hyel akwa pəla, akwa virayeri na akwa tsikərari, I ata puɓəla mambələrna ata kəra shanga mda. Antə maɗa' giri shili ka mwanki ata sə hara naɓikur, tsuwa maɗashilər giri na kusta ata sə wul su, ka mji shilər giri hara suniyayeri.

¹⁸Jiri, saka nda I ata puɓəla mambələrna, ba ata kəra mafayeri arna shili ka mwanki, antə da ata hara naɓikur tsuwa.

¹⁹I ata ncantə surndatayeri amta akwa vəi na amtazi, ka seɗayeri ar surndata akwa aghəyazi akwa duniya, watau mamshi, ka u'u, ka ɗer na mənggəl.

²⁰Pci ata sə shinantədzi ka ndzi kuthlu, ka thliya ngka mamza apa mamshi, akəmata vir Mthlaku ni asi vir na ola na ka səli ni.

²¹Saka nda kəlara mdə na ku hara adduwa, akwa thləma Mthlaku ata wutə mbantədzi.’ ”

²²“Mjir Israila, ngga gir ndər ngəni. Yesu ar Nazareth, an mdə tə Hyel ku mbərsa ka tsa, ka hara kəthlərari na ol'ola, ka surndatayeri, ka seɗayeri atar ni akwa nca giri, apatə giri ka kəra giri ku sənda.

²³Mdə ku hamta mdə ngəni Yesu ni ala giri na mjir biku, antə giri ku kukwamta ni, ka tsi ni ata tsiya mjir biku, kalkal apatə Hyel ku ɗəmha təng akəmata su ni ahara.

²⁴Amma Hyel ku msərantə akwa mwavərkur ar mta, ka thlentə ni tə tsa jaktə ndzi ka mpika, kamnyar mta aɗi amzhi kəsi ni wa.

²⁵Kamnyar Dauda ku pəla ata kərari abbər, “ ‘Parang I ana wutə Mthlaku adzə ra, kamnyar tsa akwa mazəmi, ta su laga asə thlivərantə ra.

²⁶Kamnyar ngəni ɗəffi msəra ali, an su na hara tə I akwa hara hara kucali ni, kamnyar dzi ata ndzi lapiya ka vəkər.

²⁷Kamnyar ga aɗi ata zhar ra akwa kul wa, wala zhar ka mdə na hir nga hiɗa wa.

²⁸Ga ku ncanta ali lakur mpika, adzə nga antə I ata nghyi ka kucali.’ ”

²⁹“Maɗama'na, I ata mzhi gari ala giri ata bəbal ata kəra kəkar mburu Dauda abbər tsa ku mti antə mdə ku harəmta ni, tsuwa kulərni azi adzə mburu har ba ashina.

³⁰Tsa an naɓi, tsuwa tsa ku sənda abbər Hyel ku hara alari alkawal, abbər tsa ata vətə pal akwa nca kəkayeri arni ka tsa hara kuthlikur aghəlari.

³¹Dauda ku wutə su ngəni təng ɗəm, ka gari ata kəra thlatər Kristi akwa mtəmta abbər mda aɗi ata zhar ni akwa kul wa, wala zhari ka dzari hiɗa wa.

³²Hyel ku thlentə Yesu ngəni ni akwa mtəmta, tsuwa shanga yeru ku ndzi seɗar su ngəni.

³³Kulini mdə ku haptə səliyirni amtazi ka vəi ni abwa mazəma Hyel. Tsuwa Hyel ku na alari Mambəl na Ɓɗakkarkara apatə tsa ku kəta alari alkawalari, antə tsa pungkər Mambəl ni ata kəra yeru, apatə giri akwa wutari ka nggatə kulini ni.”

³⁴Kamnyar wala tə Dauda aɗi ləmtazi wa, tsa ku pəla abbər, “ ‘Mthlaku ku pəla aka Mthlakərna, Ndzəndzi abwa mazəmi

³⁵har tar ma I ku namtə dawayeri ar nga ka da ndzi kulahər putə səla ga.’ ”

³⁶“Antə ka shanga mjir Israila sənda abbər jiri, Yesu ngəni tə giri kukwamta ni, Hyel ku namtə ni Mthlaku ka tsuwa Kristi.”

³⁷Sakatə da nggatə gari ni, antə ɗəffa ɗa ɓza, tə da pəla aka Bitrəs ka mambila aposəlayeri abbər, “Maɗaməma, man tə ka yeru hara ri?”

³⁸Antə Bitrəs pəla ala ɗa, “Ka giri tubi, ka mdə hara ala giri baptizma akwa thləma Yesu Kristi, kamnyar ka mdə tifəmta ala giri bikər giri. Antə giri ata wutə cautər Mambəl na Ɓɗakkarkara.

³⁹Kamnyar alkawal ngəni an ala giri kəga maɗa' giri, ka tsuwa shanga mji na ciju, natə Mthlaku na Hyel ar mburu ata sə kəga ɗa ka da si adzə ni.”

⁴⁰Antə Bitrəs ngkərɓəla ala ɗa jirkur ar suayeri damwa hang, ka dunautə ɗa akwa pəla, “Mbantə gir kəra giri ta asar na ata wutə mji ngəni ɗimi ni!”

⁴¹Antə mdə ku hara baptizma aka mji na ku dlu ndərərni, tə mji na ku jakəngkərdzi ala ɗa akwa vir nda ku hara apa mji dəpu makər.

⁴²Antə da ku vu hangkala ɗa akwa thlipə su akəla aposəlayeri ni, ka mwardzi kəga nvwa ɗa, ka akwa ndəkəi susəma, ka hara adduwa ata kəma duku.

⁴³Antə shanga mji ku thlivəra, kamnyar tə Hyel ku hara surndatayeri kəga seɗayeri hang atar aposəlayeri ni.

⁴⁴Antə shanga mji na ku hamta jiri ku ləkəma ka kəɓa ata kəma duku akwa mwardzi, da akwa kəthlər shanga sur nvwa ɗa ata kəma duku.

⁴⁵Antə da ɗəgələmta kariyeri ka suayeri na arɗa, ka ndəkəmta kwabari aka shanga mji, tə waskəi ku dlu kalkal apatə tsa akwa turari.

⁴⁶Antə tədək viri da ana tsaptədzi ata kəma duku akwa mbwar vəngkər səli, ka səm susəma ata kəma duku akwa kəyayeri arɗa, da akwa səm susəmər ɗa ka kucali, akwa hamta cauta aka nvwa ɗa ka tsiya ɗa bwang,

⁴⁷akwa hu Hyel. Tsuwa da parakəu aka shanga mji tə shanga mji hirhir ɗa. Tsuwa tədək viri Mthlaku ana jakəngkər ala ɗa mji na ku wutə mbantədzi.