Read bura-pabir Kəth Apos 20 Bible Online

Kəth Apos 20 - bura-pabir bible

Kəth Apos 20

¹Aghəla tə kurakər mpa ni ku mtathli, antə Bulus thlenta abbər ka mdə kəga alari mjir nu ni. Sakatə tsa ku gari ka dunautə ɗa, antə tsa salamtə ɗa ka təra mwari ahar Makidoniya.

²Sakatə tsa ku dlarhə bwayeri ngəni shang, ka dunautə ɗa swaiswai, antə tsa si akwa tsəɗi Gris.

³Antə tsa hara thliya makər azi. Sakatə tsa akwa ɗəmhədzər ləkwa ka tsa mwari ahar Siriya, təng mjir Yahudi ɗəmhə ɗimikur laga ata kərari. Antə tsa kwamta abbər kuji ka tsa ngka atar Makidoniya.

⁴Mji na pwar Bulus an Sopaturos na ɓzər Purus na thlata ahar Biriya, ka Aristarkus ka Sekundus na thlata ahar Thlassalonika, ka Gayus na thlata Darbe, ka Timothli, har kəga Tikikus ka Trofimus na thlata akwa tsəɗi Asiya.

⁵Apani mji nayeri ku təra kəmata yeru, ka ra sək yeru ahar Trowas.

⁶Antə ar yeru, aghəla virayeri ar kucalər Buradi Na Kula Yist, antə yeru thlata ahar Fəlippi akwa shar ka ra wutə ɗa ahar Trowas, aghəla vir ntəfu. Antə yeru hara vir murfa anda tsuwa.

⁷Akwa vir na ntangkəma ar sati, sakatə yeru tsaptədzi ata kəma duku kamnyar səm susəmər hirdzi, antə Bulus gari aka mji, kamnyar tsa akwa bara ka tsa təra kurər virari. Antə tsa ku gari ka fəi har vədza aka kərathlər viri.

⁸Tsuwa pitəlayeri aɗi hang na akwa hamta parakəu akwa mbwa na amta natə yeru tsaptədzi akwa ni.

⁹Ɓzərdakwi laga aɗi ka thləmari Yutikus andzəndzi ata windau, na ku heni fitu, sakatə Bulus akwa ləkəma ka gariyirni ni. Sakatə heni ni ku səm ni antə tsa təri kazhar windauwur mbwa na makərkur ni, ka təri ata di, tə mdə kətə ni mtəmtari.

¹⁰Amma Bulus ləghəi, ka nggyarghəidzi ata kərari, akwa fəfahə ni, ka pəla, “Giri aɗiya damitədzi wa, tsa tsu ka mpika!”

¹¹Antə Bulus jaktə ngka akwa mbwa na amta ni, ka ɓəli buradi ka kwasa. Antə tsa ləkəma ka gari kəga da har tə vir kura, kambəla tsa təra.

¹²Antə da kətə ɓzərdakwi ni ka mpika, ka təra akwa kucali ka duna.

¹³Ar yeru tsuwa yeru ləkəma ka mwari adzə shar ni, ka ləkwa ka mwari ahar Assos, abbər yeru ata ra kətə Bulus anda. Kamnyar apani antə ɗəmha, abbər arni tsa ata mwa ka səl.

¹⁴Sakatə yeru ku kəɓa ka tsa ahar Assos, antə yeru kətə ni akwa shar, ni, ka təra mwari ahar Mitilene.

¹⁵Thlatər yeru anda akwa shar ni, antə yeru mwari aɓəla bwanda ahar Kiyos səɓəla ɗəpari. Səɓəla ɗəpari tsuwa antə yeru mzhitə Samos, səɓəla ɗəpari damwa antə yeru mzhitə Miletus.

¹⁶Kamnyar hwatu Bulus thlamta akwa ɗəffari abbər tsa ata təramta Afisa, kamnyar ta tsa asə shamta saka akwa tsəɗi Asiya, kamnyar tsa akwa bara mwari ahar Urushalima taktar, akwa vir Kucalər Pentikost ni, ma ahara.

¹⁷Sakatə Bulus ahar Miletus antə tsa thlentə ka mdə kəga alari mji na ol'olər ikələziya na ahar Afisa.

¹⁸Sakatə da ku si adzə ni, antə tsa pəla ala ɗa, “Giri ka kəra giri ku səndə jili laku tə I ndzəndzi akwa nca giri, təng sakatə I vu səli akwa tsəɗi Asiya.

¹⁹I akwa hara kəthlər aka Mthlaku ka tərghəikər swaiswai ka shimwi. I ku nggitə shanga ngkərtədzayeri na wutə ra atar kəmanggarkur tə mjir Yahudi kəɗar ɗəmhari ata kəri.

²⁰I aɗi ɗar zhar ngkər ala giri su na ɓɗaku na ata dlar giri wa. Tədəku I akwa thlipa ala giri akwa aɓəla nca mji, ka tsuwa ata kəi ata kəi.

²¹I ku kəɗar ngkərɓəla aka mjir Yahudi kəga mjir Helleni akwa tsaktə ɗa abbər kuji ka da tubi aka Hyel, ka da hamta jiri aka Mthlakər mburu Yesu Kristi.

²²“Nggədza kulini ku ndzi dwali kəi kələngkər aka Mambəl na Ɓɗakkarkara, antə I ata mwari ahar Urushalima, tsuwa I aɗi səndə jili su na ata sə wutə ra anda wa.

²³“Su tə I səndə daci an Mambəl na Ɓɗakkarkara ku ncaɓəla ali abbər, akwa kəlara di, mbwi ka bwaniyayeri akwa sək ra.

²⁴Amma I aɗi namtə mpikəi abbər tsa su na daraja laga ali wa, ma har I ata mzhi kuri su na akəmi, ka kəthlər tə I dlu akəla Mthlaku Yesu, abbər kəi ngkər labar na msəra ar ɓɗakkur tə Hyel hara ala mburu.

²⁵“Tsuwa kulini I ku sənda abbər shanga giri natə I ku ngkər kuthlikur Hyel akwa nca giri ni, mda akwa nca giri na ata jaktə wutə ra kəra wa.

²⁶Antə I akwa pəla ala giri ashina abbər I ku pəla ala giri jirkur, antə mda aɗi na ata nu ra watsəɓər bikərni wa.

²⁷Kamnyar I ku pəla ala giri shanga su tə Hyel akwa bara ka giri sənda.

²⁸Ka giri wulwul kəra giri, ka shanga ciɓa natə Mambəl na Ɓɗakkarkara ku vu akwa tsiya giri abbər ka giri wula. Ka giri wulwul ikələziyar Hyel natə tsa ku wuta aka kərari atar mamshir Ɓzərni.

²⁹“Kamnyar I ku sənda abbər ma sakatə I ku təra, kilamtakayeri aɗi ata sə si akwa nca giri, tsuwa da aɗi sə zhar ciɓa nə wa.

³⁰Har ma akwa nca giri kəga kər giri, mji laga ata sə thlata ka thlandər aka mji, kamnyar ka da ndəkərəmta mjir nu ni abwar ɗa.

³¹Antə ka giri ndzi ɗəmhəɗəmhari, ka giri ɗangta abbər kulini məva makər pci ka viri I akwa dingngga tsaktə giri, har ka shimwi.

³²“Antə kulini I akwa hamta giri akwa tsiya Hyel, ka ndərərni na nghyinghyari ka ɓɗakkur, na ata mzhi kəlantə giri ka na ala giri kifa ata kəma duku ka shanga mji na ɓɗakkarkara.

³³I aɗi ɗar ngguktə sur mdə wa, wala an kwaba wala kari hatə wa.

³⁴Giri ka kəra giri ku sənda abbər I ku hara kəthlər ka tsi, kamnyar ka yeru kəga mji na adzə ra, wutə shanga su tə yeru akwa turari.

³⁵Akwa shanga suayeri ngəni I ku ncanta ala giri abbər ku ndzi dwali ka giri hara kəthlər apani, kamnyar ka giri mzhi dlar mji na kula duna. Tsuwa ka giri ɗangtə su tə Mthlaku Yesu pəla, abbər, ‘Barkar hamta su ku təramta na ar dlu su.’ ”

³⁶Sakatə Bulus ku kuri gari ni, antə tsa zuzuri ka hara adduwa ata kəma duku kəga da.

³⁷Antə shanga ɗa putə tuwa, ka bəbartə wulya Bulus akwa vədza kəsəm mnya ɗa alari.

³⁸Na olari da ndzi ka ɗəffə ɓzəɓza kamnyar gari tə tsa pəla ala ɗa abbər da aɗi ata jaktə wutə ni kəra wa ni. Apani antə da pwar ni ka mwantə ni adzə shar ni.