Read bura-pabir Kəth Apos 22 Bible Online

Kəth Apos 22 - bura-pabir bible

Kəth Apos 22

¹“Mji ol'ola kəga maɗaməma, psi giri thləma giri kəi ngkərɓəla ala giri su na hara, kamnyar ncanta ala giri abbər I kula biku.”

²Sakatə da nggatə ni akwa gari ala ɗa akwa mnyar mjir Aramiya, antə da dləɓ səri. Antə tsa pəla,

³“I mdər Yahudi, mdə yaɓəla ra ahar Tarsus akwa tsəɗi Kilikiya, amma mdə kəlantə ra azi ahar Urushalima. I karata akira Gamaliyel. Akwa karatərna akirari, tsa ku thlipa ali ka jirkur shanga su na ku tsəkwar tsawayeri ar kəkar mburu, kəga surharar mburu. Tsuwa I aɗi gyal ka su na ku tsəkwar bwar Hyel wala raka wa, tsu apatə shanga giri akwa harari ashina.

⁴“I ku hara bwani aka mjir nu Laku ngəni ni har tə I tsəgəi ɗa. I ku ngkəi shili kəga mwanki ka mbwamta ɗa, ka hambwa ɗa akwa pərsəna.

⁵Prist na ola ka shanga mjir majalisa ata mzhi ndzi seɗarna ata kəra suayeri ngəni. Kamnyar I ku dlu wasikayeri akəla ɗa kəi mwanta aka maɗama mburu mjir Yahudi na ahar Damaska. I mwari anda ni kamnyar kəi ngkəgəi mji nayeri ni, kəi səntə ɗa mbwambwari ahar Urushalima ka mdə ɗi ɗa.”

⁶“Saka tə I ata kəra lənggu ni, tə I hara kudzəhə ka Damaska, apa pci təpkər, təng təkəma parakə laga na ka duna thlata amtazi, ka mbəlantə vəi tə I ata ni.

⁷Antə I ndla ata di, ka nggatə kuraku laga akwa pəla ali, ‘Shawulu, Shawulu! Kamnyar mi tə ga akwa hara bwani ali ri?’

⁸Antə I pəla, ‘Gə wa ri, Mthlaku?’ Antə tsa pəla ali, ‘I an Yesu mdər Nazareth, natə ga akwa hara bwani alari ni.’

⁹Mji na adzə ra ni ku wutə parakə ni, amma da aɗi nggatə kuraka mdə na akwa gari ali nə wa.

¹⁰Antə I pəla, ‘Man su tə kəi harari, Mthlaku?’ Antə Mthlaku pəla ali abbər, ‘Thlatə ka ra mwari ahar Damaska, anda antə mda ata pəla ala gə shanga su tə Hyel ata bara ka gə hara.’

¹¹Təng tə I aɗi akwa mzhi wutə su wa kamnyar parakkurər mbəl ni, antə mji na adzə ra ni tamtə tsi ka ləkwa ndəkər ra har tə yeru ləkwa kuta Damaska.”

¹²“Antə mdə laga ka thləmari Hananiya si adzə ra. Tsa mdər nu Hyel ja jirkur apatə tsawur Musa thlamta, mdə tə shanga mjir Yahudi na akwa di nda ana ngkər ni ka ɓɗakkur.

¹³Səyir adzə ra antə tsa thləthlata ka pəla, ‘Ɓzərma'na Shawulu, ka nca gə wutə su.’ Təkəma ata saka nda antə nci kəlardzi tə I wutə ni.”

¹⁴“Antə tsa pəla, ‘Hyelər kəkayeri ar mburu ku carɓəla nga abbər ka gə səndə su tə tsa hira, ka gə wutə Mdə na Ɓɗakkarkara ni, tsuwa ka gə nggatə ndər akwa mnyari.

¹⁵Kamnyar ga ata ndzi mdər seɗarni aka shanga mji ata kəra su tə ga ku wutə ka nggata.

¹⁶Antə kulini, ga akwa sək mə damwa ri? Thlatə ka mdə hara ala gə baptizma, ka mdə hara ala gə adduwa ka bikər ngə kəcimtadzi.’ ”

¹⁷“Saka tə I ku jaktə ngka ahar Urushalima, tə I akwa hara adduwa akwa mbwar vəngkər səli, antə I wulsu

¹⁸ka wutə Yesu akwa pəla ali abbər, ‘Thlatə taktar ka gə ləɓəla akwa Urushalima, kamnyar da aɗi ata dlu seɗa tə ga ata harari ata kəri wa.’

¹⁹Antə I pəla, ‘Mthlaku da ka kəra ɗa ku sənda abbər I ku mwari akwa shanga mbwar vəngkər səli, ka dlaɓu mji na hamta jiri ala ga, ka hambwa ɗa akwa pərsəna.

²⁰Tsuwa sakatə mji ku tsi Istifanus na seɗar nga, I ka kəri I anda athləthlata, akwa kələngkər ka mdə tsi ni ni, har ma I akwa gadi ləptayeri ar mji na tsi ni ni.’

²¹Amma Mthlaku pəla, ‘Mwari, kamnyar I ata thlentə nga ciju aka durayeri damwa.’ ”

²²Mji ni ku psi thləma ɗa aka Bulus har ka vədza aka sakatə tsa pəla ndər ngəni. Antə da putə kuraku ka duna akwa pəla, “Tsi giri mdə ngəni, ka mdə shamta ni ata kəra duniya. Aɗi kalkal ka mdə zhar ni ka mpikə wa.”

²³Antə da ləkəma ka hara kurakə ni, da akwa kənggər ləptayeri arɗa akwa tsiya ɗa, ka pu bərbər ata hyel akwa shambar.

²⁴Antə olər sojayeri ni tsawa aka mjirni abbər ka mdə səntə ni akwa barki ni, ka mdə nggaɓəla su akəlari atar dlaɓu ni ka kwandeng, kamnyar nggaɓəla su na hara tə mjir Yahudi akwa hara kuraku apani ata kərari ni.

²⁵Amma sakatə da ku mbwamta ni ka dzər kamnyar ka mdə ɓu ni, antə Bulus pəla aka olər soja laga na athləthlata anda abbər, “Tsawu ku kələngkər ka mdə dlaɓu kambar Rom ka kwandeng kula mdə mwantə akəma shariya ya?”

²⁶Sakatə olər soja ni nggata apani, antə tsa mwari adzə olər sojayeri ni ka yu ni abbər, “Man tə ga akwa bara harari ri? Kamnyar diya mdə ngəni ni kambar Rom.”

²⁷Antə olər sojayeri ni si ka pəla aka Bulus abbər, “Pəla ali, gə kambar Rom ya?” Antə Bulus pəla, “I.”

²⁸Antə olər sojayeri ni pəla, “Arna I masə kambakur ar Rom ni ka kwaba na hang.” Amma Bulus pəla, “Arna mdə yaɓəla ra akwa kambakur ni.”

²⁹Apani antə mji na akwa bara yu ni psi wujir ni təkəma. Wala olər sojayeri ni ku thlivər sakatə tsa nggaɓəla abbər Bulus kambar Rom, amma tsa ku mbwamta ni ka can ni.

³⁰Amma səɓəla ɗəpari, sakatə olər sojayeri ni akwa bara səndə jirkur su na hara tə mjir Yahudi burkatə ni ni, antə tsa mpəli ni, ka pəla aka pristayeri na ol'ola ka shanga mjir majalisa abbər ka da tsaptədzi. Antə tsa səntə Bulus akəma ɗa.