Read bura-pabir Kəth Apos 23 Bible Online

Kəth Apos 23 - bura-pabir bible

Kəth Apos 23

¹Sakatə Bulus ku wul mjir majalisa ni njingnga, antə tsa pəla, “Mjir yeru, akwa shanga surna, I ku ndzi ka jirkur akəma Hyel kula ɓzamtə su, har ba shina.”

²Antə Hananiya na prist na ol ni, tsawa aka mji na athləthlatə adzə Bulus ni abbər ka mdə tsa mnyari ni.

³Antə Bulus pəla alari, “Hyel ata tsa ngə tsuwa, shimnya ragai! Gə jili alkali məmə ri, tə ga ata ɓəli tsawa atar pəla ka mdə tsa ra kula suari aɗi ni?”

⁴Antə mji na adzə ni pəla, “Ah, ga ata nggəl prist na ola ar Hyel!”

⁵Antə Bulus pəla, “Mjir yeru, I aɗi sənda abbər tsa prist na ol wa. Kamnyar mdə ku rəbuta akwa kakaɗu abbər, ‘Ga aɗiya mnya ɗimi aka mdə na ola ata kəra mjir ngə wa.’ ”

⁶Sakatə Bulus wuta abbər bwadukwa ɗa mjir Saddukiya, ka bwaduku mjir Farisi, antə tsa haptə kuraku ka pəla aka majalisa ni abbər, “Mjir yeru, I mdər Farisi, ɓzər mjir Farisi gwang. Kamnyar hamta jiri tə I kəgari akwa thlata akwa mtəmta antə mda akwa hara ali shariya ngəni ni.”

⁷Sakatə tsa pəla ndər ngəni, təng təkəma mjir Farisi ka mjir Saddukiya baɗitə beɗi akwa daɓwa ɗa, tə tsaptədzi ni ndəkəmtadzi ka bwa suɗa.

⁸Kamnyar mjir Saddukiya akwa pəla abbər thlata akwa mtəmta aɗi wa, mjirthlentərhyel aɗi wa, tsuwa mambəl aɗi wa. Amma ar mjir Farisi da ku hamta jiri abbər shanga suayeri ngəni makər ni aɗi.

⁹Antə kurakər beɗi ni vərvəra. Antə maləmayeri laga akwa mjir Farisi ni thlatə ka beɗi akwa pəla, “Yeru aɗi wutə mdə ngəni ka biku wa. Wa an asəndə ri? Nuhum mambəl laga wala mdərthlentərhyel laga ku gari alari jiri.”

¹⁰Sakatə beɗi ni ku hara mwavər kamta, antə olər sojayeri ni thlivər abbər mji asə thləthləhumta Bulus. Antə tsa tsawa aka sojayeri arni abbər ka da ləghəi ka da kətə Bulus ka dwalikurari, ka da səntə ni akwa barki soja ni.

¹¹Tsu vir nda aviri antə Mthlaku thləthlata adzə Bulus ka pəla alari, “Ga aɗiya damitədzi wa! Kamnyar apatə ga hara seɗa ata kəri azi ahar Urushalima, antə ga ata hara seɗa ata kəri ahar Rom.”

¹²Səɓəla ɗəpari, antə mjir Yahudi laga ɗəmhədzi abbər ka da tsi Bulus. Antə da kahyel abbər da aɗi ata səm susəma wala sa yimi wa, har tar ma da ku tsi Bulus.

¹³Hangkur mji na pəli mnya ku təramta mji nfwarkumari.

¹⁴Antə da mwari adzə pristayeri na ol'ola ka mji na ol'ola, ka pəla ala ɗa, “Yeru ku kahyel abbər yeru aɗi ata səm susəma wala sa yimi wa, har tar ma yeru ku tsi Bulus.

¹⁵Antə kulini giri kəga mjir majalisa ni, ka giri thlentə kakaɗu aka olər sojayeri ni, ka mdə səntə ni ala giri. Ka giri namta apa giri akwa bara yuɓəla jirkurər su ata kərari. Antə ar yeru, yeru ɗəmhəɗəmhari ka yeru tsi ni, təng akəmata tsa mzhitə giri.”

¹⁶Amma ɓzər ngkwarma' Bulus ku nggatə abbər da akwa bara tsi ni ni, antə tsa mwari akwa barki soja ni ka pəla aka Bulus.

¹⁷Antə Bulus kəga pal akwa nca sojayeri na ol'ola ka pəla alari abbər, “Mwantə ɓzərdakwi ngəni adzə olər sojayeri, kamnyar tsa ka su laga tə ka tsa pəla alari.”

¹⁸Antə soja na ol ni kətə ni ka mwantə ni adzə olər sojayeri ni. Olər soja ni pəla, “Bulus na akwa pərsəna ni an kəga ra ka pəla ali kəi səntə ɓzərdakwi ngəni adzə nga, kamnyar tsa ka su laga tə ka tsa pəla ala ga.”

¹⁹Antə olər mji sojayeri ni tamtə tsiya ɓzərdakwi ni, ka kəgamta ni abwa duku, ka yu ni akwa ɗuwari abbər, “Man su tə ga akwa bara pəla ali nə ri?”

²⁰Antə tsa pəla, “Mji na ol'ola ar mjir Yahudi ku ɗəmha abbər da ata sə yu nga abbər ka gə mwantə ala ɗa Bulus akwa majalisa ɗəpa. Da ata hara apa da akwa bara yuɓəla jirkur su laga ata kərari.

²¹Amma ga aɗiya kələngkər ala ɗa wa, kamnyar mji aɗi na ku təramta nfwarkumari na ata sə ɗuwardzi, ka thla ni ka da tsi ni. Har da ku kahyel abbər da aɗi ata səm susəm wa, wala sa yimi wa, har tar ma da ku tsi ni. Tsuwa da ɗəmhəɗəmhari kulini akwa sək ka gə kələngkər ala ɗa.”

²²Antə olər sojayeri ni tsawa alari abbər, “Ga aɗiya pəla aka wama abbər ga ku pəla ndər ngəni ali wa.” Antə tsa salamtə ɓzərdakwi ni tə tsa təra.

²³Antə olər sojayeri ni kəga mji suɗa akwa nca mji na ol'olər soja, ka pəla, “Ɗəmhə girdzi, kamnyar giri ata thlata apa saka əmdla na aviri ka giri təra mwari ahar Kaisariya, ata kəma duku ka sojayeri aru suɗa, ka sojar fəl taku murfəkumari, ka mjir mwasu aru suɗa.

²⁴Tsuwa ka giri pwi takwayeri aka Bulus kamnyar ka tsa sə mwa ata, ka giri mwantə ni lapiya aka gwamna Feliks.”

²⁵Antə olər sojayeri ni rəbutə wasika apani,

²⁶“Thlawardzi na hang akwa thlata akəli Klaudiyus Lisiyas, ka mwari aka Mdə na ola, gwamna Feliks.

²⁷Mdə ngəni, mjir Yahudi an ngkəi ni, tsuwa da abaka tsi ni. Amma sakatə I nggaɓəla abbər tsa kambar Rom, antə I mwari ka sojayeri ka mbuli ni.

²⁸Sakatə I akwa bara nggaɓəla su na hara tə da akwa nggəlar ni kamnyar ni, antə I mwantə ni akəma majalisar ɗa.

²⁹Antə I nggaɓəla abbər da akwa burka ni ata kəra suayeri laga na ku tsəkwar tsawur ɗa, amma aɗi su na ku mzhi ka mdə tsi ni wala hambwa ni akwa pərsəna wa.

³⁰Antə sakatə I sə nggaɓəla abbər mdə ku ɗəmhə ɗimikur ata kəra mdə ni, antə I wuta abbər kuji kəi thlentə ni ala ga kula shamta saka. Tsuwa I ku tsawa abbər ka mji na akwa burka ni ni ra jikata ala ga damitədzər ɗa ata kərari ni.”

³¹Antə sojayeri ni kətə Bulus ka mwantə ni tsu aviri nda ahar Antipatris apatə mdə pəla ala ɗa.

³²Səɓəla ɗəpari antə sojayeri na mwa ka səl ni ngka akwa barki soja, da zhar mjir fəl taku ka da mwantə ni.

³³Sakatə da ku mwari ahar Kaisariya, antə da ku hamta wasika ni aka gwamna, ka hamta Bulus akwa tsiyari.

³⁴Sakatə gwamna karatə kakaɗə ni antə tsa yu Bulus abbər tsa mdər tsəɗi madə ri. Sakatə tsa nggaɓəla abbər tsa mdər tsəɗi Kilikiya,

³⁵antə tsa pəla, “I ata sə nggatə su na aɗi akəla ga ma sakatə mjir burkatə nga ku si.” Antə tsa tsawa abbər ka mdə kəsi ni akwa kəyir Kuthli Hirudus.