Read bura-pabir Kəth Apos 26 Bible Online

Kəth Apos 26 - bura-pabir bible

Kəth Apos 26

¹Antə Agrippa pəla aka Bulus abbər, “Mdə ku na gə saka ka gə pəla su tə gə kəgari. Antə Bulus haptə tsiyari ka baɗitə kəcimta kərni akwa pəla,

²“Jiri I ku hara sa'a, Kuthli Agrippa, təng tə akəma ga antə I ata kəcimta kərna ashina ata kəra shanga suayeri tə mjir Yahudi burkatə ra kamnyari ni.

³Na olari an kamnyar ga asəndə shanga sur hara mjir Yahudi kəga suayeri tə da ku kampiku ata kər. Antə I akwa kiɗə nga abbər ka gə kətə kanaɗi ka gə psi thləma ga ali.

⁴“Shanga mjir Yahudi asəndə laku tə I ana ndzəndzi akwa təng sakatə I ɓzərdakwi, watau su na baɗitə təng akwa diyir yeru, ka Urushalima, har ka vədza aka pci na ashina.

⁵Da səndə suayeri ngəni təng ɗəm, har ma da an ata hirari da ata mzhi seɗa ata kər abbər I akwa nca mjir Farisi, natə akwa shanga mbila mji na akwa addinər mburu da andər ɓəla tsawayeri ta shang.

⁶Antə kulini I athləthlata azi akwa shariya akwa vəkər ka alkawal tə Hyel kəta aka kəkayeri ar mburu.

⁷Alkawal natə durayeri ar mburu na kumnya suɗə ni akwa hamta jiri abbər da ata wutə nghyaɓəladzərni, təng tə da akwa kəɗar vəngkər səli aka Hyel pci ka viri ni. Bundi, kamnyar vəkər ngəni antə mjir Yahudi akwa burkatə ra akəma gə ni!

⁸Kamnyar mi tə akwa ndzi mwavər ala giri ka giri kələngkər abbər Hyel ata mzhi thlentə mda akwa mtəmta nə ri?

⁹“I ka kəri ku hamta jiri abbər ku ndzi dwali kəi hara suayeri hang kamnyar ɓzamtə thləma Yesu ar Nazareth.

¹⁰Antə I hara akwa Urushalima. Aɗi abbər təng I hambwa mji na ɓɗakkarkara akwa pərsəna daci sakatə dlu dunar harari akəla pristayeri na ol'ola wa. Har ma akwa sakayeri tə mda akwa tsəgəi ɗa, I ana mbwa kir ala ɗa abbər ka mdə tsi ɗa.

¹¹I ku kəɗar hara bwani ala ɗa ka hang akwa mbwayeri ar vəngkər səli, ka bara kəi vu ɗa ka da pəla su na ɗimi ata kəra Hyel. Tsuwa kamnyar ɗəffi na mbwa ata kəra ɗa, I ana hara bwani ala ɗa, kəi nu ɗa har ba akwa diyayeri na akwa tsəɗi damwa.”

¹²“Tsu kamnyar su ngəni antə vir laga I tamtə lakur mwari ahar Damaska ka kakaɗər izni tə I dlu akəla pristayeri na ol'ola.

¹³Sakatə pci ku hara təpkər, ka barkar nga, antə I wutə parakəu laga na thlata amtazi, parakta parakər pci, akwa mbəl ka kalaktə ra kəga mji tə yeru akwa lənggu ni ata kəma duku ni.

¹⁴Antə shanga yeru ku ndla ata di. Antə I nggatə kuraku laga akwa pəla ali akwa mnyar mjir Aramiya abbər, ‘Shawulu, Shawulu! Kamnyar mi tə ga akwa hara bwani ali ri? Ga akwa ghərantə kər ngə diya ata hara dawakur ka I ni.’

¹⁵Antə I pəla, ‘Gə wa ri, Mthlaku?’ Antə Mthlaku pəla, ‘I an Yesu, mdə tə ga akwa hara bwani alari ni.

¹⁶Amma thlatə kara thləthlata. I ncantə kərna ala gə ni, kamnyar I akwa bara ka gə hara ali kəthlər, tsuwa ka gə hara seɗar suayeri tə ga ku wuta ata kəri, ka tsuwa suayeri tə I ata ncanta ala ga akəmazi.

¹⁷I ata msərantə nga akwa tsiya mjir nga, ka tsuwa akwa tsiya durayeri damwa tə I ata sə thlentə nga ala ɗa.

¹⁸Ga ata sə kəlar nca ɗa, kamnyar ka da zhar surharar ɗa na akwa kuthlu ka da səkwa parakəu, ka da msər ta dunar Shatan ka ndzi akwa dunar Hyel. Kamnyar atar apani antə mda ata mzhi tifəmta ala ɗa bikər ɗa, ka wutə vəi ndzəndzi akwa nca mji na ɓɗakkarkara kamnyar hamta jirər ɗa akwa Iya.’ ”

¹⁹“Antə apani, kuthli Agrippa, I aɗi ndzi kula kələngkər aka su na kəlardzi ali amtazi nə wa.

²⁰Ntangkəma I baɗitə ngkər ni ahar Damaska, kambəla I mwari akwa Urushalima, kambəla I mwari akwa shanga tsəɗi Yahudiya, ka mwanta aka durayeri damwa tsuwa. I akwa ngkər ala ɗa abbər ka da tubi ka da ngka adzə Hyel, tsuwa ka da hara su na ata ncanta abbər da ku tubi jiri.

²¹Kamnyar su ngəni antə mjir Yahudi ngkəi ra sakatə I akwa mbwar vəngkər səli ni, ka kəɗar abbər ka da tsi ra.

²²Amma har ba ashina Hyel akwa dlar ra, an su na hara tə I mzhi thləthlata azi akwa hara seɗa ata kərari aka ol ka ntsaha, abbər tsu su tə naɓiyayeri ka Musa pəla ni an ata sə hara,

²³abbər tar ka Kristi ɗar bwani, ka tsa ndzi mdə na ntangkəma na ata thlata akwa mtəmta. Atar apani antə tsa ata psəmnya parakəu aka mjir Yahudi ka aka shanga durayeri damwa.”

²⁴Sakatə Bulus ku gari ar kəcimta kərni ni, antə Festus haptə kuraku ka pəla, “Bulus, gə ka cicu! Karatər nga na hang ni akwa shinantə nga ka cicu!”

²⁵Amma Bulus pəla, “Ka barkar nga, bundi, I aɗi ka cicu wa! Jirkur antə I akwa pəlari ka hangkali.

²⁶Kamnyar kuthli asəndə suayeri ngəni, an su na hara tə I akwa gari alari kula thlivər ni. Kamnyar I ka hamta jiri abbər su aɗi na hara akwa nca suayeri ngəni kula səndərni wa, təng tə mda aɗi hara ɗa akwa ɗuwari wa.

²⁷Kuthli Agrippa, ga ku hamta jiri aka naɓiyayeri ya? I ku sənda abbər ga ku hamta jiri ala ɗa.”

²⁸Antə Agrippa pəla aka Bulus, “Akwa saka ngəni raka ni, antə gə tamata abbər ga ata namtə ra kəi ndzi Krishan ya?”

²⁹Antə Bulus pəla, “Wala akwa saka na raka, wala akwa saka na saɓəlari, adduwarna aka Hyel abbər an aɗi təng gə shingə daci wa, amma har kəga shanga mji na akwa nggatə ra ashina ni, ka da ndzi apa iya, təng canayeri ni an aɗi akwa wa.”

³⁰Antə Kuthli ni thlata, ka gwamna, ka Barnis, ka shanga mji na andzəndzi adzə ɗa ni.

³¹Ləɓəlar ɗa antə da pəla aka nvwa ɗa abbər, “Ai mdə ngəni aɗi hara su na ku mzhi ka mdə tsi ni wa, wala mdə hambwa ni akwa pərsəna wa.”

³²Antə Agrippa pəla aka Festus abbər, “Mda ata mzhi psi mdə ngəni ma abbər tsa an aɗi pəla ka mdə mwantə shariya ni akəma Kaisar wa.”