Read bura-pabir Kəth Apos 28 Bible Online

Kəth Apos 28 - bura-pabir bible

Kəth Apos 28

¹Sakatə yeru ku msəri ka ləɓəla ata mnya yimi ni, antə yeru nggaɓəla abbər thləma ɗəɗəgəl ngəni an Malta.

²Antə mjir di ni hara ɓɗakkur laga ala yeru ka duna. Kamnyar da ku dlu yeru shang ka kucali, ka mbata ala yeru u'u, kamnyar yimi akwa təra antə vəi hara mtathlaku.

³Sakatə Bulus tsaptə udzəm kər pal ka puta ata u'u ni, antə pwapu laga səɓəla akwa udzəm ni kamnyar bwarbwarkur u'u ni, ka bartə tsiyari.

⁴Sakatə mjir di ni wutə pwapu bartə tsiya Bulus ni, antə da pəla akwa nvwa abbər, “Jiri, mdə ngəni mdər tsi mda. Kamnyar wala tə tsa msəra akwa manda ni, saɓalari tsu aɗi akwa nu ni har tar ma tsa kəl mpikari.”

⁵Amma Bulus ɓumta ni akwa u'u ni, antə tsa aɗi dəkəi ni wa.

⁶Da akwa dzama abbər nuhum tsa ata mbika wala ndla ka mta kula shamta saka, amma tə da sək ka səka, da aɗi wutə su na hara alari wa, antə da pali ndərər ɗa ka pəla abbər, tsa an hyel laga.

⁷Tsuwa kudzəhu ka vəi ndaga, fakayeri laga aɗi na ar mthlakər ɗəɗəgəl ni, na ka thləmari Publiyus. Tsa dlu yeru ka msərakur, ka wulwul yeru apa mətəpiyirni har vir makər.

⁸Tsuwa akwa saka nda antə baba' Publiyus ni pəpəi nggawa ka dzəkdzəku ka təha. Antə Bulus mwari ambwar ngkiɗa ka hara alari adduwa, ka vəngkər tsiyari ata kərari, ka mbantə ni.

⁹Sakatə da wutə su ngəni, antə mambila mji na nggawa nggawa ata ɗəɗəgəl ni si tsuwa, ka wutə mbantədzi.

¹⁰Antə da hamta ala yeru cautayeri hang. Sakatə yeru thlatə kamnyar təra akwa shar ni, antə da pu shanga suayeri tə yeru ata turari akwa shar ni.

¹¹Aghəla thliya makər antə yeru ləkwa shar laga ar Alekzandəriya, na kuri vəya ata ɗəɗəgəl ni. Tsuwa mdə namtə shar ni ka dludzər hyelayeri na ɓuli.

¹²Sakatə yeru si ahar Sirakus antə yeru hara vir makər anda.

¹³Sakatə yeru thlata anda antə kawartə ka si ahar Rigiyum. Aghəla vir pal, antə shambar laga thlata abwar anəm, akwa fya. Səɓəla ɗəpari antə yeru mzhitə ahar Putiyoli.

¹⁴Anda antə yeru wutə mjir nuwa laga, na kiɗə yeru abbər ka yeru hara vir murfa adzə ɗa. Apani antə yeru sə mzhitə ahar Rom.

¹⁵Sakatə mjir nuwa na anda nggata ata kəra yeru, antə mji thlatə ciju ka si adzə yeru har akwa Kasukur Appiyus, tə bwadukwa mji sə ra wutə yeru akwa Mbwar Na Makər. Sakatə Bulus wutə ɗa, antə tsa usar Hyel, ka wutə duna.

¹⁶Sakatə yeru si ahar Rom, antə mdə nar laku aka Bulus ka tsa ndzi shini, amma ka soja pal na ata gadi kərari.

¹⁷Aghəla vir makər antə Bulus kəga mji na ol'olər mjir Yahudi akwa tsaptədzi. Sakatə da tsaptədzi antə tsa pəla ala ɗa, “Mjir yeru na mjir Israila, wala tə I aɗi ɓzamtə su aka mjir mburu wa, wala ɓəli surharar kəkayeri ar mburu wa, amma mdə ku ngkəi ra akwa Urushalima, ka hamta ra mbwambwari aka kuthlikur ar mjir Rom.

¹⁸Aghəla tə da kuri yu ra, da ku bara msərantə ra, kamnyar da aɗi wutə ra ka biku na ku mzhi ka mdə tsi ra wa.

¹⁹Amma sakatə mjir Yahudi nggəlar ndər ni, ku ndzi dwali ali kəi kiɗə ka mdə mwantə shariya ni akəma Kaisar, wala tə arna I aɗi ka su tə kəi burkatə mjirna ata kər wa.

²⁰An su na hara tə I kəga giri ka mburu gari kəga giri, təng tə kamnyar mdə ngəni tə mjir Israila akwa səkari ni antə mdə mbwamta ra ka məsəsal apani ni.”

²¹Antə da pəla alari, “Yeru aɗi wutə wasika akəla mjir Yahudi ata kəra ga wa, tsuwa mda aɗi akwa nca mjir mburu na thlata anda, na ku sənta wala ngkər su laga ɗimi ata kara gə wa.

²²Amma yeru akwa bara ka yeru nggatə dzamər nga. Kamnyar su tə yeru sənda an abbər akwa kəlara bwa mji aɗi akwa hir mji ngəni wa.”

²³Sakatə da ku thlamta vir tə da ata sə jaktə kəɓa ka tsa, antə da fatədzi hang ka si akwa vəi tə tsa fəli akwa. Antə tsa baɗitə ngkərɓəla ala ɗa su ni təng ɗəɗəpa har ka mwanta ka tahaku, akwa ngkər ala ɗa kuthlikurər Hyel, ka ndəkər hangkala ɗa ata kəra Yesu akwa tsawur Musa ka kakaɗər naɓiyayeri.

²⁴Apani mji laga akwa nca ɗa ku hamta jiri aka su tə tsa pəla ni, amma mji bwaduku aɗi hamta jiri wa.

²⁵Təng tə da aɗi kələngkər aka nvwa ɗa wa, akəmata da atəra, antə Bulus jaktə pəla ala ɗa su pal, abbər, “Azha su tə Mambəl na Ɓɗakkarkara pəla ni jiri, kamnyar tsa pəla aka kəkayeri ar giri atar Naɓi Ishaya abbər,

²⁶“‘Mwari adzə mji ngəni, ka gə pəla ala ɗa, Jiri, giri ata ləkəma ka nggatə su, amma giri aɗi ata nggaɓəlari wala raka wa. Giri ata ləkəma ka wutə su, amma giri aɗi ata wulɓəlari wala raka wa.

²⁷Kamnyar ɗəffa mji ngəni ku hara ɓəɓal, tsuwa da ku dzəɓtə thləma ɗa ka hartə nca ɗa, kamnyar ta da asə wutə su ka nca ɗa, ka da sə nggatə su ka wutə su, ka dluwa akwa ɗəffa ɗa, tə ka da sə ngka adzə ra, kamnyar kəi mbantə ɗa.’

²⁸“Antə ka giri sənda abbər Hyel ku thlentə labar ar mbantədzi aka mji na aɗi mjir Yahudi wa, antə da ata sə psi thləma ɗa akari.”[6]

³⁰Antə Bulus hara məva suɗa akwa kəi tə tsa fəli akwa ni, akwa ntə kwaba haya ni ka kərari surni. Antə akwa kəi ngəni antə tsa dlu shanga mji na si adzə ni,

³¹akwa ngkər ala ɗa labar ata kəra kuthlikurər Hyel, ka thlipə ata kəra Mthlaku Yesu Kristi, ata bəbal kula thlivəra.