Read bura-pabir Kəth Apos 4 Bible Online

Kəth Apos 4 - bura-pabir bible

Kəth Apos 4

¹Sakatə Bitrəs ka Yahwana tsu akwa gari aka mji, antə pristayeri ka olər mbwar vəngkər səli ni, ka mjir Saddukiya adzə ɗa,

²ka ɗəffa ɗa ɓzəɓzari kamnyar tə aposəlayeri ni akwa thlipa aka mji ka ngkər ala ɗa abbər akwa Yesu thlata akwa mtəmta aɗi.

³Antə da ngkəi Bitrəs ka Yahwana ka pu ɗa akwa pərsəna abbər tar səɓəla ɗəpari, kamnyar tə viri ku kurtə hara.

⁴Amma mji hang na ku nggatə ndər ni ku hamta jiri akari, antə hangkurər ɗa ku hara apa dəpu ntəfu.

⁵Səɓəla ɗəpari, antə mjir kuthlikur kəga mji na mji ol'olər ɗa, kəga maləmayeri ar thlipə tsawur Musa, tsaptədzi ahar Urushalima.

⁶Da tsaptədzi ni kəga Annas prist na ola, ka Kayafas, ka Yahwana, ka Alekzanda, ka shanga mji na nyarmbwar prist na ol ni.

⁷Sakatə da ku thlenta aposəlayeri ni akwa nca ɗa, antə da yu ɗa abbər, “Ka duna na madi, tsuwa akwa thləma wa antə giri hara su ngəni ri?”

⁸Antə Bitrəs, na nghyinghyari ka Mambəl na Ɓɗakkarkara pəla ala ɗa abbər, “Giri na mjir kuthlikur ka mji na ol'ola,

⁹ma mda ata yu yeru ashina ata kəra kəthlər ar ɓɗakkur tə mdə hara aka nggurdəkəi ngəni, abbər apa madi tə nggurdəkəi ngəni wutə lapiyakur nə ri?

¹⁰To, ka shanga giri kəga shanga mjir Israila sənda abbər, akwa thləma Yesu Kristi ar Nazareth, natə giri kukwamta, amma Hyel ku thlentə ni akwa mtəmtə ni. Atar ni antə mdə ngəni athləthlata akəma giri lapiya ni.

¹¹Yesu ngəni ni, an mdə tə mdə rəbuta ata kərari akwa kakaɗər Hyel abbər, “ ‘Pela natə giri na mjir hən mbwa ku nggəlari ni, tsa an sə ndzi pela ɓɗakta shang ar nci səla mbwa ni.’ ”

¹²“Mda aɗi ata wutə mbantədzi akəla mdə damwa wa, kamnyar mdə damwa aɗi akwa duniya ni natə Hyel hamta aka mji, abbər ka mdə wutə mbantədzi akwa thləmari wa.”

¹³Sakatə mjir majalisa wutə katsalakur ar Bitrəs ka Yahwana, ka nggaɓəla abbər da aɗi hara makarantə wa, tsuwa talakayeri ndzang, təng su ni ndatə ɗa. Antə da nggaɓəla abbər mji ngəni ku ndzi ata kəma duku ka Yesu.

¹⁴Amma sakatə da wutə mdə tə mdə mbantə ni athləthlata adzə ɗa, su aɗi na ɗimi tə da amzhi pəlari kəra wa.

¹⁵Antə da pəla ala aposəlayeri ni ka da ləɓəla akwa nca majalisa ni. Sakatə da ku ləɓəla akwa nca ɗa, antə da hara mnya duku abbər,

¹⁶“Man tə ka mburu hara aka mji ngəni ri? Kamnyar jiri shanga mji na akwa Urushalima ku sənda abbər mdə ku haratə surndatə na olari atar mji nayeri ni, tsuwa laku aɗi tə mburu ata mzhi beɗəmtari wa.

¹⁷Amma laku tə mburu ata ngkatə ta ndər ni aləkəma ka titiləmtadzi akwa nca mji, an kuji ka mburu tsaktə ɗa abbər da aɗiya jaktə ngkər labar aka wama akwa thləma Yesu kəra wa.”

¹⁸Antə da ku jaktə kəga ɗa, ka pəla ala ɗa abbər da aɗiya jaktə ngkər gari wala thlipa akwa thləma Yesu kəra wa.

¹⁹Amma Bitrəs ka Yahwana shinau ala ɗa ka pəla, “To, giri akwa dzama abbər ata ndzi kalkal akəma Hyel, ka mdə kələngkər ala giri, ta aka Hyel ya? Dzamtə giri su na kalkalari!

²⁰Kamnyar ar yeru, yeru amzhi zhar gari ata kəra su tə yeru wuta wala nggatə wa.”

²¹Antə mjir majalisa jaktə ndəkərtə thləma ɗa, ka psi ɗa ka da təra, təng tə da aɗi wutə su tə ka da ɗi ɗa ata kər wa. Kamnyar shanga mji akwa hu Hyel ata kəra su na hara ni.

²²Kamnyar məva mdə tə mdə mbantə ni akwa shilkərni ni ku təramta nfwarkumari.

²³Sakatə mdə psi Bitrəs ka Yahwana, antə da mwari adzə mjir nuwa nvwa ɗa, ka jikata ala ɗa su tə olər pristayeri ka mji na ol'ola pəla ala ɗa ni.

²⁴Sakatə da nggatə gari ni, antə da haptə kuraku ata kəma duku aka Hyel akwa pəla, “Mthlaku, na ka Duna ta Shang, ga an namtə vəi na amtazi, ka duniya, ka manda, ka shanga su na akwa kuta ɗa!

²⁵Atar Mambəl na Ɓɗakkarkara antə ga ku gari atar mafar nga, watau kəkar yeru Dauda, abbər “ ‘Kamnyar mi tə ɗəffa mjir tsəɗiyayeri akwa thlata, ka mji ɗəmhə ɗimikur gapani nə ri?

²⁶Kuthlyayeri ar duniya ana paktə mnya ɗa, mji ol'olər tsəɗi ana ɗəmhə ɗimikur ata kəra Mthlaku, ata kəra kuthli tə tsa carɓəla.’ ”

²⁷“Kamnyar jiri tsu akwa bərni ngəni, antə Hirudus ka Pontiyus Bilatus paktə kər kəga dur gapani, ka mjir Israila, ka ndzi dawar Mafar nga Yesu, mdə na ɓɗakkarkara tə ga an vəi ni kuthli.

²⁸Da tsaptədzi kamnyar haratə shanga su tə ga ku ɗəmhə təng ɗəm abbər ka tsa sə haratədzi.

²⁹Antə kulini, Mthlaku, wul jili suayeri tə da akwa thlivərantə yeru kəgari ni, ka gə hamta ala yeru dunar ngkər labar ar nga kula thlivəra.

³⁰Ka gə ləkəma ka ndərar tsiya ga kamnyar mbantə mda, ka gə hara seɗayeri kəga surndatayeri tə barkar thləma Ɓzər nga na Ɓɗakkarkara, Yesu.”

³¹Sakatə da kuri hara adduwa ni, antə vəi tə da tsaptədzi akwa ni kənggərantədzi. Antə shanga ɗa nghyantədzi ka Mambəl na Ɓɗakkarkara, tə da ləkwa ngkər ndərər Hyel kula thlivəra.

³²Antə shanga mji na hamta jiri ni ku ndzi ka mnya duku, ka dzam duku, mda aɗi akwa nca ɗa na ata pəla abbər surni ni an ar kərari tsa shini wa, amma shanga ɗa ku ndzi ata kəra sur ɗa kəga nvwa ɗa.

³³Antə aposəlayeri ni ku hara seɗa na ka duna ata kəra thlatər Yesu akwa mtəmta, antə Hyel ku pungkər barkarni hang ata kəra shanga ɗa,

³⁴har tə mda aɗi akwa nca ɗa na akwa tur su wa. Kamnyar shanga mji na ka fakayeri wala kəyayeri ku ɗəgələmta ɗa, ka səntə kwabari,

³⁵ka pwi akəma aposəlayeri ni. Antə da ndəkəmta kwaba ni aka shanga mji, tə waskəi dlu kalkal ka turərni.

³⁶Apani antə Yusuf natə aposəlayeri ana kəga ni abbər Barnabas ni ku hara. Karapur Barnabas ni an “Mdər ntsantə mda,” tsuwa tsa mdər Lawi, na thlata ahar Saiprus.

³⁷Tsa ɗələmta fakərni ka səntə kwabari, ka pwi akəma aposəlayeri.