Read bura-pabir Kəth Apos 5 Bible Online

Kəth Apos 5 - bura-pabir bible

Kəth Apos 5

¹Amma mdə laga aɗi ka thləmari Hananiya, ka mwalankiɗa Safiratu, na ɗələmta kariyir ɗa laga.

²Antə tsa ku ɗuwar bwadukwa kwabari ka səndər mwalankiɗa, ka kətə bwadukwa kwaba ni ka mwanta akəma aposəlayeri ni.

³Amma Bitrəs pəla alari abbər, “Hananiya, kamnyar mi tə gə zhar ka Shatan ləkwa ɗəffa ga, har tə gə thlandər aka Mambəl na Ɓɗakkarkara, ka ɗuwamta bwadukwa kwabar fakər ngə nə ri?

⁴Akəmata ga aɗələmta fakə ni aɗi ar ngə wa ya? Tsuwa aghəla tə ga ku ɗələmta, aɗi sai su tə gə hir ka hara kəgari wa ya? Ka, apa madi tə gə hara dzam ngəni ɗimi ni akwa ɗəffa gə tsu ri? Ai ga aɗi thlandər aka mji wa, amma aka Hyel!”

⁵Sakatə Hananiya nggatə ndər ngəni, antə tsa ndla ka mta. Antə shanga mji na nggatə su ngəni ku thlivər ka duna.

⁶Antə mji na kusta səmbwa ka bartə mshiyirni akwa zhaɓi, ka ləɓəla ka tsa, ka ra harəmta ni.

⁷Aghəla awur makər, antə mwalankiɗa səmbwa tsuwa kula səndər su na hara wa.

⁸Antə Bitrəs pəla alari, “Pəla ali, ngəni an hangkur kwaba tə giri ɗələmta fakər giri ni kəgari ni ya?” Antə mwala ni pəla, “I, apani.”

⁹Antə Bitrəs pəla alari abbər, “Kamnyar mi tə giri ka salngkiri paktə kər abbər ka giri ngkərtə Mambələr Mthlaku ri? Ngga kuraka səla mji na thlata akwa vəi har salngkiri akwa nyarmbwa, da ata kəɓəla ngə tsuwa!”

¹⁰Təkəma antə tsa ndla adzə səlari ka mta. Antə mji na kusta ni səmbwa ka wutə ni mtəmtari, antə da kəɓəla ni ka ra harəmta ni adzə salngkiɗa.

¹¹Antə shanga mjir ikələziya ka mji damwa na nggatə su ngəni ku thlivər ka duna.

¹²Antə apani aposəlayeri ni ku hara surndatayeri kəga seɗayeri hang akwa nca mji. Tsuwa shanga mji na hamta jiri ni tsu ata vəi duku akwa Vərandar Solaman.

¹³Amma mda aɗi akwa nca mambila mji ni na nggitə ləkwa nca ɗa wa, wala tə mji ni ana na ala ɗa olkur.

¹⁴Amma aghəla nda mji hang ku sə hamta jiri aka Mthlaku, ka jakəngkərdzi ala ɗa, shili kəga mwanki.

¹⁵Apani antə har mji ləkwa mwantə mjir ɗa na nggawa nggawa akwa lakwayeri ar kuta di, da akwa pwi ɗa ata katsarayeri kəga sərpiyayeri, natə ma sakatə Bitrəs ata təramta, to wala ka shanggurari təra ata kəra ɗa.

¹⁶Antə mji hang ku thlata akwa diyayeri na kalaktə Urushalima ka si ka tsaptədzi. Da akwa səntə mji na nggawa nggawa, kəga mji tə mambəl na ɗimi akwa ɗar bwani ala ɗa, antə shanga ɗa ku wutə mbantədzi.

¹⁷Antə prist na ol ni ka shanga mji na adzə ni, na mjir Saddukiya ni, ku səlkər aposəlayeri ni ka duna.

¹⁸Antə da thlata ka ngkəi aposəlayeri ni, ka ra pu ɗa akwa pərsənar mji na ndzang.

¹⁹Amma mdərthlentər Mthlaku ku si aviri, ka kəlar nyarmbwayeri ar pərsəna ni, ka səɓəla ka da, ka pəla,

²⁰“Mwar giri, ka giri ra thləthlata akwa mbwar vəngkər səli, ka pəla aka mji shanga ndərayeri na ar mpika bilən ngəni.”

²¹Sakatə aposəlayeri ni ku nggatə ndər ni, antə da ləkwa mbwar vəngkər səli ni ɗəɗəpə mbing ka ləkwa thlipa. Sakatə prist na ol ni ku si ka mji na adzə ni, ka kəga mjir majalisa ka shanga mji na ol'olər Israila akwa tsaptədzi, ka thlentə kuraku akwa pərsəna ni abbər ka mdə sənta ala ɗa aposəlayeri ni akəma ɗa.

²²Amma sakatə mjir gadi ni si, da aɗi wutə aposəlayeri ni akwa pərsəna wa, antə da ngka ka ra pəla aka mjir majalisa abbər,

²³“Yeru wutə nyarmbwar pərsəna ni harharari ɓəɓal, ka shanga mjir gadi ni athləthlata akwa nyarmbwayeri ni, amma sakatə yeru kəlar nyarmbwa ni, yeru aɗi wutə mda ambwa wa!”

²⁴Sakatə olər mjir gadi mbwar vəngkər səli ni ka pristayeri na ol'ola ni nggatə ndər ni, da ku ndəndatədzi ka duna, ka ləkwa damitədzi ata kəra laku tə su ni ata sə kura akwa.

²⁵Antə mdə laga si ka pəla ala ɗa abbər, “Mji tə giri pu akwa pərsəna ni, da athləthlata akwa mbwar vəngkər səli akwa thlipa aka mji.”

²⁶Antə olər mji gadi mbwar vəngkər səli ni mwari kəga mjirni na ol'ola ka səntə aposəlayeri ni, amma aɗi ka dunar ɗəvə wa, kamnyar da akwa thlivər mji asi ndzəndzəhtə ɗa ka pela.

²⁷Sakatə da ku səntə aposəlayeri ni, ka mwantə ɗa akəma mjir majalisa ni, antə prist na ol ni yu ɗa abbər,

²⁸“Yeru ku ndəkərtə thləma giri abbər giri aɗiya jaktə thlipa akwa thləma mdə ngəni kəra wa, amma nggədza giri akwa ndlətə shanga Urushalima ka surthlipər giri ni, har giri akwa bara vəngkər watsəɓər bikər mtərni ni ata kəra yeru.”

²⁹Amma Bitrəs ka mambila aposəlayeri shinau ka pəla, “Ku ndzi dwali ka yeru kələngkər aka Hyel, ta aka mji!

³⁰Hyelər kəkayeri ar mburu ku thlentə Yesu natə giri tsi ni atar kukwamta ni ata udzəm ni.

³¹Antə Hyel haptə səliyirni ka vəi ni abwa mazəmari, ka tsa ndzi Mdə na ola ata kəra shanga mji ka Mdər mbanta, kamnyar ka mjir Israila wutə lakur tubi ata kəra bikayeri arɗa, ka mdə yafitə ɗa.

³²Antə yeru an seɗar shanga su nayeri ni, ka tsuwa Mambəl na Ɓɗakkarkara, natə Hyel ku hamta aka mji na ana kələngkər alari.”

³³Sakatə mjir majalisa nggata apani, antə ɗəffa ɗa ɓzə ka duna, har tə da bara ka da tsi aposəlayeri ni.

³⁴Amma mdər Farisi laga akwa majalisa ni, na ka thləmari Gamaliyel, maləmər thlipə tsawur Musa, natə shanga mji ana nar səli, thlata akwa nca ɗa ka thləthlata, ka tsawa abbər ka mdə ləɓəla ka aposəlayeri ni katagu.

³⁵Antə tsa pəla aka mjir majalisa ni, “Mjir Israila, ka giri hara hangkal ka su tə giri ata hara aka mji nayeri ni.

³⁶Kamnyar akwa məvayeri na təramta ni, mdə laga aɗi ka thləmari Thleudas na thlatə ka namtə kərni abbər tsa mdə laga na ola. Antə mji ku hara kudzəhə ka aru nfwar na nu, amma mdə ku tsi ni, ka titiləmta shanga mji na nu ni, antə su tə tsa baɗitə ni ku mti.

³⁷Aghəla nda tsuwa antə mdə laga ka thləmari Yahuda, mdər Galili ku thlata akwa sakar jika mji, ka səvatə mji hang aghəlari. Amma tsa mdə ku sə tsi ni tsuwa, ka titiləmta shanga mji na nu ni.

³⁸Antə akwa su ngəni tsuwa, I akwa pəla ka giri psi lakur mji ngəni, zhar giri ɗa. Kamnyar ma su na akwa ɗəffa ɗa ni wala su tə da akwa harari ni an kəthlər mda, suari ata kura.

³⁹Amma ma su ni thlata akəla Hyel, giri aɗi ata mzhi nggyari ɗa kasəla wa. Kamnyar ta su ni asə ndzi abbər giri akwa mpa ka Hyel!” Antə majalisa ni ku dlu sauriyirni ni.

⁴⁰Antə da jaktə kəgambwa aposəlayeri ni, ka dlaɓu ɗa, ka ndəkərtə thləma ɗa abbər da aɗiya jaktə gari akwa thləma Yesu kəra wa, kambəla da psi ɗa tə da təra.

⁴¹Antə aposəlayeri ni ləɓəla kazhar mjir majalisa ni, ka təra akwa kucali kamnyar har tə da ku mzhi tə Hyel ku namtə ɗa mji na pwa, na amzhi ka mdə hara ala ɗa bwani ka kəli səliyir ɗa kamnyar thləma Yesu.

⁴²Antə tədək viri, da akwa ləkəma ka thlipa ka ngkər labar na msəra ata kəra Yesu abbər tsa an Kristi ni, akwa mbwar vəngkər səli ka akwa kəyayeri ar mji.