Read bura-pabir Kəth Apos 6 Bible Online

Kəth Apos 6 - bura-pabir bible

Kəth Apos 6

¹Tsu akwa saka ndaga, sakatə hangkurər mjir nuwa akwa jakjaka, antə mjir Yahudi na ana gari akwa mnyar mjir Helleni ləkwa nggungguni ata kəra mjir Yahudi na ana gari akwa mnyar mjir Aramiya. Da pəla abbər mda aɗi akwa vədzə hangkal aka mwankir ɗa na kughung akwa sakar ndəkə su tə mda ana hara tədək viri nə wa.

²Antə aposəlayeri na kumnya suɗə ni tsaptə shanga mjir nuwa ata kəma duku, ka pəla ala ɗa, “Aɗi kalkal ka yeru zhar ngkər ndərər Hyel ka yeru ləkwa wul wujirər susəm wa.

³Antə maɗaməma, carɓəla giri mji murfa akwa nca giri, mji na ka səli, na nghyinghyari ka Mambəl na Ɓɗakkarkara, ka ɗəɗukur, ka mburu pu ɗa akwa kəthlər ngəni ni.

⁴Amma ar yeru, antə yeru ata vu duna yeru shang akwa hara adduwa ka ngkər ndərər Hyel ni.”

⁵Antə shanga mji ku nggatə msərakur su tə aposəlayeri pəla ni. Antə da carɓəla Istifanus, mdə na nghyinghyari ka hamta jiri ka Mambəl na Ɓɗakkarkara, ka Filibus, ka Prokorus, ka Nikanor, ka Timon, ka Parminas, ka Nikolawus, dur gapani na ləkwa addinər mjir Yahudi, tsa thlata ahar Antakiya.

⁶Mji ngəni antə mdə sənta akəma aposəlayeri ni. Antə aposəlayeri ni pungkər tsiya ɗa ata kəra ɗa, ka hara adduwa ata kəra ɗa.

⁷Antə ndərər Hyel ku ləkəma ka titiləmtadzi. Antə hangkurər mjir nuwa ku ləkəma ka jakjaka akwa Urushalima, tsuwa pristayeri hang ku sə kələngkər aka addin ngəni.

⁸Antə Istifanus, mdə tə Hyel hara alari ɓɗakkur ka nar duna, ku hara surndatayeri ol'ola kəga seɗayeri akwa nca mji.

⁹Amma mji laga na thlata akwa vəi vəngkər səli ar mji tə mda ana kəga ɗa Mji Msərmsəra, baɗitə beɗi kəga Istifanus. Da an mjir Yahudi na thlata ahar Sayirin, ka Alekzandəriya, ka Kilikiya, ka ahar Asiya.

¹⁰Amma da aɗi mzhi nggyari ni akwa beɗi ni wa, kamnyar tsa akwa gari ka ɗəɗukur, tsuwa Mambələr Hyel ata kərari.

¹¹Antə da zwalitə mji laga akwa ɗuwari ka da pəla abbər, “Yeru ku nggatə ni akwa gari ɗimi ata kəra Musa ka ata kəra Hyel.”

¹²Apani antə da mbwantə ɗəffa mji, kəga mji na ol'ola, kəga maləmayeri ar thlipə tsawur Musa, ata kəra Istifanus. Antə da si ata kərari ka ngkəi ni, ka mwantə ni akəma mjir majalisa.

¹³Antə da ɗəmhə mji na ata hara seɗayeri ar thlandər na pəla, “Mdə ngəni aɗi ɗar zhar ngkər ndər na ɗimi ata kəra vəi na ngəni ɓɗakkarkar ni ka tsawu nə wa.

¹⁴Kamnyar yeru ku nggatə ni akwa pəla abbər, Yesu ngəni na mdər Nazareth ni ata sə huzamta mbwar vəngkər səli ni, ka pali shanga surharar mburu natə Musa hamta ala mburu ni!”

¹⁵Antə shanga mji na andzəndzi akwa majalisa ni ləkwa wul Istifanus njingnga, ka wuta abbər kəmari akwa palidzi ka ndzi apa mdərthlentərhyel.