Read bura-pabir Kəth Apos 8 Bible Online

Kəth Apos 8 - bura-pabir bible

Kəth Apos 8

¹Antə Shawulu tsuwa ku kələngkər aka mtər Istifanus. Tsu vir nda antə bwani na mwavər baɗitə si ata kəra mjir ikələziya na ahar Urushalima. Antə shanga ɗa titiləmtadzi akwa tsəɗi Yahudiya ka Samariya. Təng aposəlayeri daci an aɗi hwi wa.

²Antə mji laga na ana vəngkər səli aka Hyel ku harəmta Istifanus, ka tuwa ni ka duna.

³Amma ar Shawulu, tsa akwa hara bwani aka mjir ikələziya, akwa nu ata kəi ata kəi, ka ndəkərɓəla mjir nuwa, shili kəga mwanki, ka pu ɗa akwa pərsəna.

⁴Antə mjir nuwa na titiləmtadzi ni ku mwari akwa vəyayeri zumzum akwa ngkər labarər Hyel.

⁵Antə ar Filibus tsa mwari akwa bərni Samariya ka ngkər labar ata kəra Kristi anda.

⁶Antə mji dlama dlama ku psi thləma ɗa aka su tə Filibus akwa ngkər ala ɗa, sakatə da nggatə labar ni ka wutə surndatayeri tə tsa hara.

⁷Kamnyar mambəlayeri na ɗimi ɗimi ku səɓəla akwa dza mji hang akwa tuwa ka kuraku. Antə mji na ka dza ɗa mtəmtari kəga mji na nggurdəkəi shang ku wutə mbantədzi.

⁸Antə mji ku hara kucali na ola akwa bərni ndaga.

⁹Amma mdə laga aɗi akwa di nda ka thləmari Siman, na ku hara ɗeaghakurərni ni akwa bərni ni akwa saka na təramta, ka ndatə mjir Samariya, tə har tsa ka kərari akwa pəla abbər tsa mdə laga na ola.

¹⁰Antə shanga mji akwa bərni ngəni akwa psi thləm alari, ol ka ntsaha. Da akwa pəla, “Mdə ngəni an dunar Hyel natə mda ana pəla Duna na Ol ni.”

¹¹Apani antə da ana psi thləm alari, kamnyar tə tsa ku fəi akwa hara sur ndatə ka ɗeaghakurərni ni.

¹²Amma sakatə da ku hamta jiri aka labar na msəra tə Filibus ngkər ata kəra kuthlikurər Hyel ka thləma Yesu Kristi, antə mdə hara ala ɗa baptizma, shili kəga mwanki.

¹³Har wala Siman ka kərari ku hamta jiri. Antə aghəla tə mdə hara alari baptizma, tsa ləkwa nu ghəla Filibus. Sakatə tsa wutə Filibus akwa hara seɗayeri kəga surndatayeri na ol'ol ni, su ni ku ndatə ni ka duna.

¹⁴Sakatə aposəlayeri na ahar Urushalima nggata abbər mjir Samariya ku dlu ndər Hyel, antə da thlenta ala ɗa Bitrəs ka Yahwana.

¹⁵Sakatə da si antə da hara adduwa ata kəra mjir nuwa abbər ka da dlu Mambəl na Ɓɗakkarkara.

¹⁶Kamnyar Mambəl na Ɓɗakkarkara aɗi si ata kəra wala pal akwa nca ɗa katagu wa, amma da dlu baptizma daci akwa thləma Mthlaku Yesu.

¹⁷Antə Bitrəs ka Yahwana ku pungkər tsiya ɗa ata kəra ɗa, antə da dlu Mambəl na Ɓɗakkarkara.

¹⁸Sakatə Siman wutə mdə hamta mambəl ni akwa sakatə aposəlayeri pungkər tsiya ɗa ata kəra mji ni, antə tsa hamta kwaba aka Bitrəs ka Yahwana,

¹⁹akwa pəla, “Na giri ali duna ngəni tsu bu, kamnyar ka kəlara mdə tə I ku vəngkər tsi alari, ka tsa wutə Mambəl na Ɓɗakkarkara ni.”

²⁰Amma Bitrəs pəla alari, “Japwa giri ka kwabar ngə ni ata ləkwa u'u! Kamnyar ga akwa kəta abbər ga ata mzhi mastə cautər Hyel ka kwaba!

²¹Ngəni aɗi kəthlərər ngə wa, antə su aɗi na paktə ngə kəgari wa, kamnyar ɗəffa ga aɗi kalkal akəma Hyel wa.

²²Antə kuji gə tubi ata kəra kəmanggarkur ngəni akwa ɗəffa gə ni, ka gə kiɗa akəla Mthlaku, ma ahara ka tsa tifəmta ala gə su ngəni akwa ɗəffa gə ni.

²³Kamnyar I wuta abbər gə nghyinghyari ka səlka ɗimi, tsuwa gə mbwimbwiyari akwa biku.”

²⁴Antə Siman pəla, “Hara giri ali adduwa aka Mthlaku bu usa, ta wala pal akwa nca suayeri tə giri pəla ni asə wutə ra.”

²⁵Aghəla tə Bitrəs ka Yahwana ku pəla su tə da asənda ata kəra Yesu, ka kəɗar ngkər ndərər Mthlaku, antə da ngka ahar Urushalima. Tsuwa akwa lakur ngkar ɗa akwa Urushalima ni, da ku ngkər labar na msəra ni akwa kauyayeri hang ar Samariya.

²⁶Vir laga mdərthlentərhyel laga si ka pəla aka Filibus abbər, “Thlatə ka gə mwari abwar anəm, akwa laku na thlata ahar Urushalima ka ləghəi ahar Gaza.” Ngəni an lakur mtaku, kula mji.

²⁷Antə Filibus ku thlatə ka təra mwari. Təng kula səndərni tsa wutə mdər Ithliyopiya laga na kulaɓu, na mdə ola akwa kuthlikurər Kandis, na kuthli mwala ar Ithliyopiya. Mdə ngəni an ata kəra shanga gənar kuthli mwala ni. Antə mdə ngəni si ahar Urushalima kamnyar vəngkər səli aka Hyel.

²⁸Sakatə tsa akwa ngka avi akwa wagənərni, antə tsa ndzəndzi akwa karata akwa kakaɗər naɓi Ishaya.

²⁹Antə Mambəl na Ɓɗakkarkara pəla aka Filibus abbər, “Mwari adzə wagən ngəni, ka giri paktə mwa ata kəma duku.”

³⁰Antə Filibus ku hwi mwari adzə ni, ka nggatə ni akwa karata akwa kakaɗər naɓi Ishaya. Antə Filibus yu ni abbər, “Ga akwa nggaɓəla su tə ga akwa karatari ni ya?”

³¹Antə mdə ni pəla, “Apa madi tə I ata mzhi nggaɓəlari kula mdə ngkərɓəla ali ri.” Antə tsa kiɗə Filibus abbər ka tsa fəlwa wagən ni, ka tsa ndzəndzi adzə ni.

³²Ngəni an bwa tə tsa akwa karatari akwa kakaɗə ni, na pəla, “Mdə ku ndəkərtə ni apa təma tə mda akwa mwantari aka mdər thla wulyari, tsuwa apatə ɓzər gam ana dləɓ səri akəma mdər pamta shishirni, tsa aɗi mburar mnyari wa.

³³Mdə ku taratə ni ka kəli səliyir ni, mda aɗi hir hara alari shariyar jirkur wa. Wan amzhi ngkərɓəla jili zamanərni nə ri? Kamnyar mdə ku kəl farni akwa duniya.”

³⁴Antə mdə na kulaɓu ni pəla aka Filibus, “Pəla ali bu usa. Ata kəra wa antə naɓi ni akwa gari nə ri? Ata kərari surni nənga, ata kəra mdə damwa ri?”

³⁵Antə Filibus baɗitə tsu akwa Kakaɗər Ishaya ni, akwa ngkərɓəla alari labar na msəra na ata kəra Yesu ni.

³⁶Akwa mwar ɗa da ku sə mzhitə yimi laga, antə mdə na kulaɓu ni pəla, “Nggədza yimi diya. Man ata ngkatə ta mda a hara ali baptizma ri?”[2]

³⁸Antə tsa ku tsawa abbər ka wagən ni thləthlata, antə japwa ɗa ku ləghəi ka ləkwa yimi, antə Filibus ku hara baptizma aka mdə na kulaɓu ni.

³⁹Sakatə da səɓəla akwa yimi, antə Mambələr Mthlaku kətə Filibus, tə mdə na kulaɓu aɗi jaktə wutə ni kəra wa. Antə tsa ləkəma akwa lənggurni akwa kucali.

⁴⁰Amma mdə ku sə wutə Filibus ahar Azotus. Antə tsa ləkəma ka dlarhə shanga diyayeri akwa ngkər labar na msəra, har tə tsa mzhitə Kaisariya.