Read bura-pabir Mjir Rom 1 Bible Online

Mjir Rom 1 - bura-pabir bible

Mjir Rom 1

¹Wasika ngəni thlata akəli I na Bulus, na mafar Yesu Kristi. Hyel ku carɓəla ra kəi ndzi mdər thlentərni, ka vəi ra dzak kamnyar ngkər labar na msəra na ar Hyel ni.

²Labar ngəni msəra ni Hyel an hara alkawalari təng ɗəm atar naɓiyayeri arni apatə mdə ku rəbuta akwa Kakaɗayeri na Ɓɗakkarkara.

³Tsuwa labar ngəni msəra ni an ata kəra Ɓzərni, Yesu Kristi na Mthlakər mburu. Atar dza mdə yaɓəla ni akwa nyarmbwar Dauda,

⁴amma atar Mambəl na Ɓɗakkarkara mdə ku ncaɓəla ata bəbal abbər tsa an Ɓzər Hyel na ka duna, sakatə tsa thlata akwa mtəmtə ni.

⁵Atar Yesu Kristi antə Hyel ku na ala yeru laku ka dunar ndzi mjirthlentərni na ata səntə shanga mjir duniya, ka da hamta jiri akwa thləmari, ka kələngkər alari.

⁶Tsuwa gari ngəni ku tsəkwar giri, giri tə Hyel ku kəga giri ka giri ndzi ar Yesu Kristi ni.

⁷I akwa rəbuta aka shanga giri na ahar Rom natə Hyel ku hir giri ka kəgaɓəla giri ka giri ndzi mjirni. Ka Hyel na Təddar mburu, ka Mthlaku Yesu Kristi hara ala giri ɓɗakkur, ka tsa na ala giri msərakur.

⁸Na ntangkəma, I akwa usar Hyelərna akwa thləma Yesu Kristi kamnyar shanga giri, kamnyar mji akwa ngkər hamta jirər giri akwa shanga duniya.

⁹Kamnyar Hyel natə I akwa hara kəthlər alari ka ɗəffi duku, atar ngkər labar na msəra ar Ɓzərni ni, an seɗarna abbər tədəku I akwa ɗangtə giri,

¹⁰akwa kəlara sakatə I akwa hara adduwa. I akwa kiɗə kəra Hyel abbər, ma tsa an ahira ka tsa hara kəi mzhi mwari adzə giri akwa saka na ngəni.

¹¹Kamnyar I akwa mwaɓər wutə giri ka duna, kamnyar kəi na giri cauta laga na təbwar mambəl na ata dunautə giri.

¹²Su tə I akwa pəlari ni an abbər ka shanga mburu kəga giri dunautə nvwadzi, watau kəi dunautə giri akwa hamta jiri, ka giri dunautə ra tsuwa ka ar giri.

¹³Maɗaməma, I akwa bara ka giri sənda abbər I ku kəɗar bara kəi si adzə giri, amma tədəku su laga ana ngkatə ra ta si. I akwa bara si ni kamnyar kəi səvatə mji laga akwa nca giri, tsu apatə I ku wuta akwa nca durayeri damwa na aɗi mjir Yahudi wa.

¹⁴Kamnyar I ka təmbəl ar shanga mji ata kəri, mjir bərni kəga mjir kauya, mji na ku karata kəga mji na aɗi karatə wa, mji na ɗəɗu ka mji na caku.

¹⁵An su na hara tə I akwa mwaɓər si adzə giri ahar Rom kamnyar kəi ngkər ala giri labar na msəra ni tsuwa.

¹⁶Kamnyar I aɗi akwa ngga səliyir ngkər labar na msəra nə wa, kamnyar tsan dunar Hyel na akwa mbantə kəlara mdə na ku hamta jiri, ntangkəma aka mjir Yahudi, kambəla tsuwa mji na aɗi mjir Yahudi wa.

¹⁷Kamnyar labar na msəra ni akwa ngkərɓəla laku tə Hyel namtə mji ka da ndzi kula biku akəmari atar hamta jiri, təng akwa baɗitari har kurari. Apatə kakaɗər Hyel pəla abbər, “Atar hamta jiri antə mji na ku ndzi ka jirkur akəma Hyel ata sə ndzi ka mpikə na jirari.”

¹⁸Kamnyar Hyel akwa vəi ndzəndziyirni na amtazi akwa ncantə ɗəffə bwarbwarkurərni ata kəra shanga mjir biku kəga mji na kəmanggar na akwa ntsari jirkur ka kəthlər kəmanggarkurər ɗa.

¹⁹Kamnyar da asəndə shanga su tə kalkal ka da sənda ata kəra Hyel, kamnyar Hyel ku ncanta ala ɗa shanga su ata bəbal.

²⁰Kamnyar təng tsu akwa sakatə Hyel namtə duniya antə tsa ncaɓəla halayeri arni natə mda amzhi wutari wa, apa kuthlikurərni na ba saka madi, ka laku tə tsa akwa. Kamnyar mda ata mzhi nggaɓəla ɗa atar suayeri tə tsa namta. Antə apani da aɗi ka sur vətə kəra wa.

²¹Kamnyar wala tə da ku səndə Hyel, da aɗi na alari səli apatə kalkal ka mdə hamta aka Hyel wa, tsuwa da aɗi usar ni wa. Antə da baɗitə dzam gapangapani, tə kəra ɗa na kula nggaɓəla su ni ku ndzi kuthlu.

²²Da akwa pəla abbər da ɗəɗu, amma da caku.

²³Ata vəya ka da vəngkər səli aka Hyel na ka səli, na aɗi ba saka madi, da akwa vəngkər səli aka haptayeri na dludzi ka mda, wala ɗika, wala mwaɓiyayeri, wala suayeri na ana mwa ka yimər kuta ɗa, na aɗi ata ndzi ba saka madi wa.

²⁴Antə Hyel zhar ɗa ka da hara shanga suayeri na ɗimi ɗimi tə da ku nggukta akwa ɗəffa ɗa, ka hara sur səli kəga dza ɗa akadzi.

²⁵Da nggəlar hamta jiri aka jirkur ata kəra Hyel, ka hamta jiri aka thlandər. Antə da vəngkər səli ka hara mafakur aka su tə Hyel namta, ata vəya vəngkər səli aka Hyel ka kərari, natə kalkal ka mdə hu ni ba saka madi. Amin.

²⁶An su na hara tə Hyel zhar ɗa ka da hara shanga sur səli tə da akwa barari ni. Har mwankir ɗa zhar kəɓa ka sal akwa laku tə Hyel vəi, ka ləkwa bara nvwa ɗa.

²⁷Wala mji shilər ɗa ma ku zhar kəɓa ka mwanki akwa laku tə Hyel vəi, ka ləkwa nu nggukər dza na ku səm dza ɗa, har tə da akwa bara nvwa ɗa. Mji shili nggwa an akwa hara sur səli kəga shili nvwa ɗa! Antə apani da ku ndəkərəngkər bwani na ku kəɓa ka ɗimikur tə da hara ni aka kəra ɗa.

²⁸Təng tə da aɗi damitədzər səndə Hyel wa, antə Hyel zhar ɗa aka dzamər ɗimikur, ka da hara suayeri na aɗi kalkal wa.

²⁹Antə da ku nghyi ka shanga halər kəmanggarkur, ka ɗimikur, ka ngguka, ka mwavərkur. Da nghyinghyari ka halər səlka, ka tsi mda, ka mpa, ka thlandər, ka ɗəffər dawakur. Tsuwa da ku ndzi mjir gha mda,

³⁰ka mjir ngkər mda, mji na ku nggəlar Hyel, ka mjir nggənggəl su, ka mjir haptə kər, ka mjir gaya, ka mjir ɗəmhə ɗimikur, ka mji na kula kələngkər aka mjir yar ɗa,

³¹ka mji na caku, ka mjir ɓəli alkawal, mji na kəmanggar, ka mji na kula kətadza.

³²Da ku sənda abbər tsawur Hyel ana pəla abbər shanga mji na ana hara suayeri ngəni ata kəɓa ka shariyar mta. Amma aɗi abbər da akwa hara suayeri ngəni ni daci ma wa, amma har da akwa ntsətə mji damwa ka da hara tsuwa.