Read bura-pabir Mjir Rom 10 Bible Online

Mjir Rom 10 - bura-pabir bible

Mjir Rom 10

¹Maɗaməma, su tə ɗəffi hir ka su tə I ana kiɗa akəla Hyel an kamnyar ka da na mjirna, abbər ka da sə mbantədzi.

²I ata mzhi hara seɗa ata kəra ɗa ala giri abbər da ana bara Hyel dzau, amma lakur bara Hyel arɗa ni aɗi ndzi abwar səndər jirkur wa.

³Da aɗi səndə laku tə Hyel ana namtə mji ka da ndzi kula biku akəmari nə wa, antə atar bara lakur kəra ɗa atar ɓəla tsawu ni, da ku nggəlar kələngkər aka lakur Hyel na ata namtə ɗa kula biku ni.

⁴Kamnyar Kristi an tsikəra tsawa, antə kəlara mdə na ku hamta jiri alari, tsa ata ndzi kula biku akəma Hyel.

⁵Kamnyar Musa ku rəbutə su ata kəra bara ndzi kula biku akəma Hyel atar ɓəla tsawu ni. Tsa rəbuta abbər, “Kəlara mdə na ata ɓəlatə tsawayeri ngəni ni, tsa ata ndzi ka mpika atar ni.”

⁶Amma ndzi kula biku akəma Hyel atar hamta jiri akwa pəla, “Ga aɗiya pəla akwa ɗəffa ga abbər, ‘Wan ata ləmtazi kamnyar ka tsa səghəi ka Kristi?’ ”

⁷Wala tsuwa, “Wan ata ləghəi akwa duniyar mji mtəmta ka tsa səɓəla ka Yesu ri?”

⁸Su tə tsa akwa pəlari an apani, “Ndər ni kudzəhə ka ga, tsa akwa mnya ga, ka akwa ɗəffa gə tsuwa.” Tsuwa ndər ngəni an ndərər hamta jiri natə yeru akwa ngkərari.

⁹Kamnyar ma ga ku hara pəla ka mnya gə sur nga abbər Yesu an Mthlaku ni, ka hamta jiri akwa ɗəffa ga abbər Hyel ku thlentə ni akwa mtəmta, tsa ata mbantə nga.

¹⁰Kamnyar atar hamta jiri akwa ɗəffa ga, antə ga ata ndzi kula biku akəma Hyel, tsuwa atar pəlari ka mnya gə sur nga antə ga ata wutə mbantədzi.

¹¹Kamnyar kakaɗər Hyel ku pəla, “Kəlara mdə na ku hamta jiri alari tsa aɗi ata ləkwa səli wa.”

¹²Kamnyar zumzumkur aɗi akwa daɓwa mjir Yahudi ka mjir Helleni wa. Kamnyar Mthlaku duku an Mthlakər shanga mji, tsuwa tsa andər hamta su ka tsiyari bwang aka shanga mji na ku kiɗa akəlari.

¹³Kamnyar, “Kəlara mdə na ku kiɗa akwa thləma Mthlaku, tsa ata wutə mbantədzi.”

¹⁴Amma apa madi tə mji ata mzhi kiɗə su akəla mdə tə da aɗi hamta jiri alari wa ri? Tsuwa apa madi tə da ata mzhi hamta jiri aka mdə tə da aɗi ɗar nggatə su ata kərari wa ri? Tsuwa apa madi tə da ata mzhi nggatari kula mdə laga an ngkər ala ɗa ri?

¹⁵Tsuwa apa madi tə mji ata mzhi ngkər ndərər Hyel ma mda aɗi thlentə ɗa wa ri? Apatə mdə ku rəbuta akwa kakaɗər Hyel abbər, “Kəmar ɓɗakkur səla mjir səntə labar na msəra aɗi wa!”

¹⁶Amma aɗi shanga mji an dlu labar na msəra nə wa. Kamnyar Ishaya pəla abbər, “Mthlaku, wan ku hamta jiri aka ndərər yeru ri?”

¹⁷Apani hamta jiri ana thlata ata kəra su tə mdə ku nggata, tsuwa su tə mdə nggata ana thlata atar ngkər labar ata kəra Kristi.

¹⁸Amma I akwa yu su, “Jiri ya abbər da aɗi nggatə wa ni? Ai da ku nggati. Kamnyar kakaɗər Hyel akwa pəla, “Ndər ni ku dlarhə shanga duniya, gari ni ku mzhitə shanga datər duniya.”

¹⁹I akwa jaktə yu su. Mjir Israila ni aɗi ana nggaɓəla su ng? Kamnyar wala akwa sakar Musa Hyel ku pəla, “I ata hara ka giri səlkər mji na aɗi suma wa, ka ɗəffa giri ɓza ata kəra mji na kəgaɓu.”

²⁰Tsuwa aghəla nda Ishaya ku gari kula thlivəra, abbər Hyel pəla, “I ku ncantə kərna aka mji na aɗi ghər pakə ra wa. I ku ncantə kərna aka mji na aɗi ghər yu su ata kəri wa.”

²¹Amma ata kəra Israila, Hyel akwa pəla, “I ana zhar nyarmbwarna ka tsa ɓukci bwang, kamnyar mjirna na nggyarɗu ka kəra ɗa ɓəɓal ni.”