Read bura-pabir Mjir Rom 11 Bible Online

Mjir Rom 11 - bura-pabir bible

Mjir Rom 11

¹To I akwa yu su, Hyel ku nggəlar mjirni Israila ya? Awa, hun wa! Kamnyar wala I ma I mdər Israila, kəkar Ibrahim, akwa nyarmbwar Benjamin.

²Hyel aɗi nggəlar mjirni tə tsa carɓəla tsu akwa baɗitari nə wa. Nənga giri aɗi səndə su tə kakaɗu pəla ata kəra Iliya wa ri? Ai Iliya ku kiɗə Hyel ata kəra mjir Israila abbər,

³“Mthlaku, da ku tsəgəi naɓiyayeri ar nga, ka huzamta vəi hamta saɗakayeri ar nga, antə təng I duku an mbila, tsuwa da akwa bara tsi ra.”

⁴Amma man amsa natə Hyel hamta alari ri? Tsa pəla, “I ku pwi mji dəpu murfa aka kəri natə da aɗi ɗar vəngkər səli aka Baal wa.”

⁵Apani tsuwa mji aɗi na ku mbili tə Hyel carɓəla atar kətadzərni.

⁶Tsuwa car ngəni tə Hyel hara ni tsa hara cauta kamnyar kətadzərni, aɗi atar ɓɗakkur kəthlər tə da hara wa. Kamnyar ma apani wa, su na cautə ni aɗi ndzi cautə kəra wa.

⁷Antə man aɗi ri? Ai mjir Israila aɗi wutə su tə da akwa barari nə wa, təng mji tə mdə carɓəla yiɗauwa daci an wuta. Mambila mji ni namtə ɗəffa ɗa ɓəɓal.

⁸Tsu apatə kakaɗər Hyel pəla, “Hyel ku na ɗa ɗəffər mdlangur, ka nca na awutə su wa, ka thləm na anggatə su wa. Tsuwa su ngəni ku ləkəma har ba ashina.”

⁹Tsuwa Dauda ku pəla, “Namtə ka vəi səm susəmər kucali arɗa, ndzi apa dərku ka shiwi na ata ngkəi ɗa. Ka tsa ndzi apa kur kəmanggarkur, ka ndzi watsəɓər ɗimikur tə da hara!

¹⁰Hara ka nca ɗa mbwi kuthlu har tə da amzhi wutə su wa, ka gə hara ka hila ɗa ndzi ɗukɗukwari har ba saka madi.”

¹¹I akwa yu su. Tə mjir Israila tsamta səla ɗa ka ndla ni, an dlar ɗa na ba saka madi ya? Awa, hun wa! Amma atar biku tə da hara ni mji na aɗi mjir Yahudi wa ku wutə mbantədzi, kamnyar ka mjir Israila sə səlkər ɗa.

¹²Antə ma biku tə da hara ni ku səntə barka hang aka duniya, tsuwa ma ndzəndziyir ɗa na kula su ku səntə barka hang aka mji na aɗi mjir Yahudi wa, to hangkur barkari ata ndzi məmi, ma sakatə bwar ola mjir Yahudi ku nghyi akwa ri?

¹³Kulini I akwa gari ni ala giri, giri na aɗi mjir Yahudi wa. Təng tə I aposəl ar mji na aɗi mjir Yahudi wa, bwar ola gariyirna ata ndzi kəra kəthlərərna ni, kəi haptə darajar kəthlər ni.

¹⁴I akwa hara ngəni ni abbər nuhum I amzhi mbwantə ɗəffa mjirna ka da səlkər giri, nuhum tsu mji laga akwa nca ɗa awutə mbantədzi.

¹⁵Kamnyar ma ku ndzi atar nggəlar ɗa, antə mjir duniya shwalatədzi ka Hyel, ka ma sakatə mdə ku dlu ɗa hwatu, ai ata ndzi apa jaktə hamta mpika aka mji na ku mti!

¹⁶Ma mdə ku ɓəli bwadukwa buradi ka hamta aka Hyel, ndzi apa tsa ku hamta buradi ni swakti alari. Antə ma mdə ku hamta nggilanga nfwa aka Hyel, ata ndzi apa mdə ku hamta shanga tsiyayerari ni tsuwa.

¹⁷To mdə ku nthləgəmta bwadukwa tsiya nfur zaitun na jirari ni, ka mbwadza alari tsiya zaitun laga na ar mtaku. Antə kulini giri na dur gapani, na ndzi apa nfur zaitun na ar mtaku ni, giri akwa dlu barka natə Hyel hara alkawalari aka Ibrahim kəga maɗa'ni ni, akwa nggatə msərakur akwa nggilanga nfur zaitun ar Hyel ni kəga da.

¹⁸Antə giri aɗiya gaya abbər giri ku təramta tsiya nfu tə mdə nthləgəmta ka putə giri ata vəya ɗa nə wa. Kamnyar ar giri diya, giri tsiya nfu daci, aɗi giri an ata nggilang nə wa, tsuwa nggilang ni an akwa vəi giri.

¹⁹Amma ga ata mzhi pəla, “Mdə ɓəgələmta tsiya nfu ni kamnyar ka mdə vətə ra ata vəya ɗa.”

²⁰Ngəni an jiri. Mdə ɓəgələmta ɗa kamnyar da aɗi hamta jiri wa, amma ar nga ga anda ni ka kəra hamta jirər nga. Antə ga aɗiya gaya wa, amma ka gə hara su ka hangkal.

²¹Kamnyar ma Hyel an aɗi zhar tsiya nfwayeri na jirari nə wa, sakani wala gə ma tsa aɗi ata zhar ngə ka mpikə wa.

²²Azi mburu ata mzhi wutə hangkalkurər Hyel ka mwavərkurərni. Tsa ana ndzi mwavər ata kəra mji na ku nggəlar kələngkər alari, amma tsa ata ndzi ka hangkal ala ga, ma ga akwa ləkəma akwa mbərsa ka kətadzərni. Kamnyar ma ga aɗi hara apani wa, wala gə ma, mda ata nthləmta nga.

²³Antə wala da na mjir Yahudi ni, ma da ku hamta jiri, mda ata jaktə ngka ka da akwa vəi ndzəndziyir ɗa ni, kamnyar Hyel ka dunar jaktə dləɓzə ɗa.

²⁴Hwatu ar giri, giri ndzi apa tsiya nfur zaitunər mtaku tə mdə nthləi. Antə ma har Hyel ata hir hara su laga zum ka giri atar dləɓdzə giri aka nfur zaitun tə mda an nca, ai tsa ata hir jaktə dləɓdzə ɗa akwa vəi ndzəndziyir ɗa ka kucali.

²⁵Maɗaməma, I aɗi akwa bara ka giri ndzi kula səndər su ata kəra ashir ngəni wa, kamnyar ta giri andzi mjir haptə kər. Bwadukwa mjir Israila ni ka hir hara kər ɓəɓalkur, antə da ata ləkəma kəgari apani har tar ma sakatə hangkur giri na aɗi mjir Yahudi wa na ata səkwa adzə Hyel ku nghyaɓəladzi.

²⁶Atar apani antə shanga mjir Israila ata wutə mbantədzi. Apatə ku rəbutədzi akwa kakaɗər Hyel abbər, “Akwa Sihiyona antə mdər mbanta ata sə səɓəla, tsa ata kələmta kərɗikur kazhar nyarmbwar Yakub.

²⁷Ngəni an alkawalərna ka da ma sakatə I ku kələmta bikayeri arɗa.”

²⁸Hang akwa nca mjir Israila ku nggəlar labar na msəra ni, antə ar giri, ku ndzi ala giri ndəmun. Amma wala apani, tsu da antə tsa hirhira, kamnyar tsa ku carɓəla ɗa atar kəkayeri arɗa.

²⁹Kamnyar Hyel aɗi ana hamta cauta aka mda wala kəga mda ka tsa jaktə pali mnyari aghəla nda wa.

³⁰Waci giri na aɗi mjir Yahudi wa ku nggəlar ndərər Hyel. Amma kulini mjir Israila ku nggəlar ndərər Hyel, antə Hyel ku kətadzə giri.

³¹Apani tsuwa kulini mjir Yahudi ku nggəlar ndərər Hyel, kamnyar apatə Hyel ku kətadzə giri ni, ka Hyel kətadzə ɗa tsuwa.

³²Kamnyar Hyel ku pu shanga mji akwa zarar mji na ka kər ɓəɓalkur, kamnyar ka tsa sə kətadzə shanga mji.

³³Wan ata mzhi səndə hangkur gənar Hyel, ka zurangkur ɗəɗukurərni, ka ar səndə surni ri? Wan ata mzhi nggaɓəla su tə tsa ɗəmha akwa ɗəffari, wala mzhi ngkərɓəla laku tə tsa ana hara su akwa ri?

³⁴Kamnyar kakaɗər Hyel ku pəla, “Wan ku ɗar səndə su na akwa ɗəffa Mthlaku ri? Wala wan ku ɗar ndzi mdər na alari sauri ri?

³⁵Nənga wan ku ɗar hamta alari cauta laga natə ku ndzi dwali ka tsa ntəmta alari ri?”

³⁶Kamnyar shanga su thlata akəlari, atar ni antə mdə ku namtə ɗa, tsuwa shanga sur an kamnyar ni. Antə ka səli ndzi alari ba saka madi. Amin.