Read bura-pabir Mjir Rom 14 Bible Online

Mjir Rom 14 - bura-pabir bible

Mjir Rom 14

¹Ka giri dlu mdə na mtathlaku atar hamta jiri, tsuwa giri aɗiya beɗi ata kəra suayeri natə dzamərni ku ndzi zum ka ar giri wa.

²Mdə laga ku hamta jiri abbər tsa ata mzhi səm kəlara su. Amma mdə na ka hamta jirərni raka ata səm səkwa thlali daci.

³Apani mdə na ana səm kəlara su ni aɗiya rutə mdə na ana səm wa ni wa. Tsuwa mdə na ana səm səkwar thlali daci ni aɗiya ngkər mdə na ana səm kəlara su ni wa, kamnyar tə Hyel ku kurtə dlu ni.

⁴Gə wa ri, tə ga ata pəlangkər aka buɗar mdə damwa ni? Mthlakərni shini an ata mzhi pəla su ata kərari, wala tsa ku hara kalkal wala tsa aɗi hara kalkal wa. Tsuwa ma Hyel hira tsa ata səma, kamnyar Mthlaku ata mzhi hara ka tsa səma.

⁵Mdə laga ana wuta apa vir laga təramta virayeri damwa. Mdə laga tsuwa ana wuta apa shanga virayeri ni jili duku. Antə ka waskəi akwa nca giri mbərsa akwa ɗəffari abbər kəlara vir tə tsa ku carɓəla ku hara alari.

⁶Mji na ana vəngkər səli aka Hyel akwa vir laga zum ni, ana hara kamnyar nar olkur aka Mthlaku. Mji na ana səm kəlara susəm ni tsuwa, ana hara kamnyar nar olkur aka Mthlaku, təng tə da ana usar Hyel kambəla da səm ni. Tsuwa mji na ana nggəlar susəmayeri laga ni, ana nggəlar kamnyar nar olkur aka Mthlaku, ka usar Hyel ata kər.

⁷Mda aɗi akwa nca mburu ni na akwa ndzi kamnyar kərari daci wa, tsuwa mda aɗi na akwa mtə kamnyar kərari daci wa.

⁸Ma mburu ka mpika, mburu akwa ndzi kamnyar Mthlaku, tsuwa ma mburu ku mti, mburu mtə kamnyar Mthlaku. Apani wala mburu ka mpika, wala mburu an mta, mburu ar Mthlaku.

⁹Kamnyar an su na hara tə Kristi mtə ka jaktə thlatə ka mpikə ni, ka tsa ndzi Mthlakər mji na ka mpika ka mji na mtəmta.

¹⁰Antə gə na ana səm thlali səkwar daci ni, kamnyar mi tə ga akwa ngkər ɓzərma' ngə ri? Tsuwa gə na ana səm kəlara su ni, kamnyar mi tə ga akwa rutə ɓzərma' ngə ri? Kamnyar shanga mburu ata sə thləthlata akəma Hyel ka tsa hara ala mburu shariya.

¹¹Kamnyar rəbutə rəbutari akwa kakaɗər Hyel abbər, “Jiri, apatə I na Mthlaku aɗi ka mpika, kəlara mda ata sə zuzuri akəmi,” ndə Mthlaku. “Tsuwa waskəi ata sə pəlari ka mnyari surni abbər I an Hyel ni.”

¹²Apani kəlara mda akwa nca mburu ata sə hamta labar ata kəra su tə tsa hara akwa duniya ni aka Hyel.

¹³Apani mburu aɗiya jaktə pəlangkər aka nvwa mburu kəra wa. Ata vəya ndaga, kuji ka mburu thlamta akwa ɗəffa mburu abbər mburu aɗi ata jaktə vu ni ka tsa tsamta səlari wala ndla akwa hamta jirərni wa.

¹⁴Kamnyar I ku sənda, tsuwa atar hamta jirərna akwa Mthlaku Yesu, I ku mbərsa abbər ka susəma aɗi na kula kəcəkəcari akwa ndzəndziyirni wa. Amma ma mdə na ku wuta abbər aɗi kalkal ka tsa səm susəm laga wa, susəm nda ata ndzi dlimbur alari.

¹⁵Antə ma jili susəm tə ga akwa səmari ni akwa ɓzamtə ɗəffa ɓzərma' nga, ga aɗiya akwa ncantə hirkur wa. Ga aɗiya hir ka susəm tə ga ana səm ni dəkəi mdə tə Kristi ku mti kamnyar ni wa.

¹⁶Apani ga aɗiya hir ka su tə gə wuta abbər ɓɗaku ni ndzi su na ɗimi aka mji wa.

¹⁷Kamnyar kuthlikurər Hyel ni aɗi ata kəra səm ka sa wa, amma ata kəra ɓɗakkur, ka msərakur, ka kucali, akwa Mambəl na Ɓɗakkarkara.

¹⁸Kamnyar ma ga akwa kəthlər aka Kristi akwa laku ngəni, Hyel ata nggatə msərakur nga, tsuwa mji ata mbərsa ka ga.

¹⁹Antə ka mburu bara suayeri na ata səntə ndzəndzi lapiyakur ka dlara akwa jakə duna aka nvwa mburu.

²⁰Giri aɗiya hir ka mji laga pumta kəthlərər Hyel, təng kamnyar abbər giri ata mzhi səm kəlara susəm wa. Jiri shanga susəma an kəcəkəcari, amma aɗi kalkal ka mdə səm su na ata vu ka nvwa ni ndla wa.

²¹Kuji ka mdə zhar ɓɗə kum, wala sa yimər anap, wala hara su laga na ata vu ka ɓzərma' ngə ndla.

²²Kəsi dzam tə gə kəgari ata kəra suayeri apani akwa daɓwa giri ka Hyelər nga. Tsa ka barka mdə tə ɗəffari aɗi ata pəlangkər alari ata kəra su tə hangkalari wuta abbər kalkal wa.

²³Amma ma gə ka nuhum akwa ɗəffa ga ata kəra jili su tə ga akwa səmari ni, ga akwa hara biku, ma ga ku ləkəma ka səmari. Kamnyar ga aɗi akwa nu dzam na akwa ɗəffa gə nə wa. Kamnyar kəlara su tə ga akwa harari na aɗi kəɓa ka hamta jirər ngə wa, ku ndzi ga akwa hara biku.