Read bura-pabir Mjir Rom 2 Bible Online

Mjir Rom 2 - bura-pabir bible

Mjir Rom 2

¹Kamnyar ngəni, gə na ana pəlangkər aka mda, ga aɗi ka sur vətə wa, wala ga an wa ri! Kamnyar kəlara sakatə ga akwa wul bikər mda, ga akwa pəlangkər aka kəra ga sur nga, kamnyar ɗimikur tə ga akwa wul mda akwa harari ni, gə ka kəra ga akwa harari tsuwa.

²Mburu asənda abbər Hyel ana thlamta shariya na kalkalari ata kəra shanga mjir hara jili suayeri ngəni.

³Antə mdə ragai, gə na ana hara shariya aka mjir hara jili suayeri ngəni, natə gə ka kəra ga ana hara ni, ga ana wul apa ar ngə ga ata sə msər ta shariyar Hyel ya?

⁴Nənga ga akwa rutə hangkalkurərni na hang, ka kəmar, ka mbwiɗəffu tə tsa ana hara ka gə nə ri? Ga aɗi sənda abbər tsa ana mbwi ɗəffari ni kamnyar tsu nuhum nggwa ga asə tubi wa ya?

⁵Amma kamnyar ɓəɓalkur ɗəffa ga na ahir tubi wa ni, ga akwa tsaɓə ɗəffə bwarbwarkurər Hyel aka kər nga. Kamnyar vir tə Hyel ata sə tuzhi ɗəffə bwarbwarkurərni ni akwa si, vir tə tsa ata hara shariyarni na ka jirkur ni.

⁶Kamnyar Hyel ata sə hamta aka waskəi watsəɓərni kalkal ka kəthlər tə tsa hara.

⁷Tsa ata hamta mpikə na akur wa aka mji na ana mbwiɗəffu akwa hara su na ɓɗaku, kamnyar bara səli, ka daraja, ka mpikə na akur wa akəla Hyel.

⁸Amma tsa ata puɓəla ɗəffə bwarbwarkurərni ka ɗəffari na ɓzi ni ata kəra mji na ka hirkər, na aɗi ana kələngkər aka jirkur wa, tar hara kəmanggarkur ni.

⁹Kamnyar bwani ka asar ata sə si ata kəra kəlara mdə na akwa hara ɗimikur, ntangkəma aka mjir Yahudi, kambəla aka mjir Helleni.

¹⁰Amma Hyel ata sə nar səli, ka olkur, ka msərakur aka shanga mji na ana hara ɓɗakkur, ntangkəma aka mjir Yahudi, kambəla aka mjir Helleni.

¹¹Kamnyar Hyel aɗi ana nca zumzumkur wa.

¹²Kamnyar mda ata sə ɗi shanga mji na ku hara biku, wala tə da aɗi ɗar səndə tsawur Hyel wa ni, kamnyar suayeri tə da ɓzamta. Tsuwa mda ata hara kəthlər ka tsawu ni kamnyar ɗi shanga mji na ku səndə tsawu ni, kamnyar suayeri tə da ɓzamta.

¹³Kamnyar aɗi atar nggatə tsawu ni daci antə mda ata ndzi kalkal akəma Hyel wa, amma tar atar nu su tə tsawu ni pəla.

¹⁴Kamnyar wala durayeri damwa na aɗi ka tsawu wa ni, ana ncanta abbər da asəndə tsawurni ni, kəlara sakatə da akwa kələngkər alari akwa ɗəffa ɗa, wala tə da aɗi ɗar nggatari wa ni.

¹⁵Da ana ncanta abbər tsawur Hyel ni rəbutə rəbutari ata ɗəffa ɗa. Kamnyar dza ɗa ka ɗəffa ana ncanta ka pəlangkər ala ɗa abbər da ku ɓzamtə su, wala msərantə ɗa abbər da aɗi ɓzamtə su wa.

¹⁶Antə ngəni an su na ata sə hara apatə I akwa pəlari akwa labar na msəra ni, abbər vir nda Hyel ata sə hara shariya atar Yesu Kristi, ata kəra shanga su tə mji hara akwa ɗuwari.

¹⁷Bwadukwa giri akwa kəga kər giri abbər giri mjir Yahudi, har giri akwa vəkər ka tsawa, ka gaya ata kəra daɓwa giri ka Hyel.

¹⁸Atar karatə kakaɗər Hyel giri ku nggaɓəla su tə Hyel hira ka su na kalkal tə ka giri hara.

¹⁹Tsuwa giri kələngkər abbər giri an mjir nca laku aka mji na mdlyang, ka parakəu aka mji na ku sha akwa kuthlu.

²⁰Giri an akwa thlipa aka mji na bəlku, ka mjir thlipa aka maɗankyar na raka raka, kamnyar giri ku sənda abbər tsawur Hyel akwa hamta ala giri səndə na kalkalari ka jirkur.

²¹Təng tə giri akwa thlipa aka mji ni, kamnyar mi tə giri aɗi akwa thlipa aka kər giri wa ri? Giri akwa ngkər aka mji abbər mda aɗiya həl wa, ka kamnyar mi tə ar giri, giri tsu akwa həl nə ri?

²²Giri akwa ngkər aka mji abbər mda aɗiya ləkə wa, ka kamnyar mi tə ar giri, giri tsu akwa ləkə nə ri? Giri akwa nggəlar haptu, ka kamnyar mi tə giri akwa həl su akwa mbwayeri ar haptə ri?

²³Giri akwa gaya ata kəra tsawur Hyel, ka kamnyar mi tə giri akwa kəli səliyir Hyel atar ɓəli tsawurni ri?

²⁴Ai an su na hara tə kakaɗər Hyel pəla abbər, “Kamnyar giri mjir Yahudi, antə durayeri damwa akwa mnya ɗimi ata kəra Hyel ni.”

²⁵Kamnyar jiri kaciya ka ampani, ma giri an akwa ɓəla tsawu ni. Amma ma giri aɗi akwa ɓəlari wa, kaciyar giri ata ndzi apa giri aɗi ka kaciya wa.

²⁶Azha ma mji na kula kaciya ləkwa ɓəla tsawur Hyel ni, Hyel amzhi namtə kula kaciyakurər ɗa ni apa mji na ka kaciya wa ya?

²⁷Jiri, mji na akwa ɓəla tsawa, amma da aɗi thla kaciya ar dza wa ni, an ata sə hara ala giri shariya giri na mjir Yahudi! Kamnyar giri ka tsawa rəbutə rəbutari japu ka kaciya ni, amma giri aɗi akwa ɓəla tsawu nə wa.

²⁸Kamnyar mdə na mdər Yahudi atar dza daci, aɗi an mdər Yahudi na jirari nə wa, kaciya ni aɗi sur dza tə mda ata wutari daci wa.

²⁹Amma mdər Yahudi na jirari an mdə na mdər Yahudi atar ɗəffari, mdə na ku thla kaciya aka ɗəffari atar mambəla, aɗi na atar tsawa na rəbutə rəbutari wa. Antə jili mdə na apani ana bara ka Hyel an hu ni, aɗi mdə wa.