Read bura-pabir Mjir Rom 4 Bible Online

Mjir Rom 4 - bura-pabir bible

Mjir Rom 4

¹Antə ka mburu pəla mi ata kəra Ibrahim, na kəkar mburu abwar dza ri? Man tə tsa nggaɓəla ata kəra hamta jiri nə ri?

²Kamnyar ma atar kəthlərərni antə tsa ndzi kula biku akəma Hyel, tsa ka su tə tsa ata mzhi gaya ata kər, amma aɗi akəma Hyel wa.

³Kamnyar kakaɗər Hyel ku pəla, “Ibrahim ku hamta jiri aka Hyel, antə Hyel wuta abbər hamta jirərni ni ku namtə ni kalkal akəma Hyel.”

⁴Mdə na ana hara kəthlər kamnyar watsəɓa, mda amzhi pəla watsəɓərni ni cautə wa, amma watsəɓər kəthlər tə tsa hara.

⁵Tsuwa mdə na aɗi mbərsa ka kəthlərərni wa, amma tsa ku mbərsa ka Hyel na ana kəcimta mda, to, hamta jirərni ni ata namtə ni kalkal akəma Hyel.

⁶Tsu apani antə Dauda vədzə barka aka mdə tə Hyel namtə ni kalkal akəmari atar kəthlərərni. Tsa pəla,

⁷“Msəra aka mji tə mdə ku tifəmta ala mji tə mdə ku hartə bikər ɗa.

⁸Msəra aka mda natə Mthlaku aɗi ata jika bikərni wa”

⁹Antə msərakur ngəni ni ata ndzi aka mjir Yahudi daci ya, nənga wala aka durayeri damwa ri? Kamnyar mburu ana karata akwa kakaɗu abbər, “Hamta jirər Ibrahim ku namtə ni tə tsa ndzi kalkal akəma Hyel.”

¹⁰Amma akwa laku madi antə su ngəni hara nə ri? Akəmata Ibrahim athla kaciya nənga, aghəla nda ri? Akəmata Ibrahim athla kaciya, aɗi aghəla nda wa.

¹¹Ibrahim hir tə mdə thla alari kaciya ni kamnyar ka kaciya ni ndzi seɗa abbər Hyel ku kurtə dlu Ibrahim ka namtə ni kalkal akəmari təng akəmata mda athla alari kaciya ni. Antə apani Ibrahim ku ndzi tədda na atəbwar mambəl aka shanga mji na ku hamta jiri aka Hyel, amma mda aɗi thla ala ɗa kaciya wa. Antə Hyel ku namtə ɗa kalkal akəmari, kamnyar hamta jirər ɗa.

¹²Tsuwa Ibrahim ku ndzi təddar shanga mji na ku thla kaciya, tsuwa aɗi kaciya ni ndzang wa, amma mji na ka jili hamta jiri natə Ibrahim na təddar mburu kəgari akəmata tsa athla kaciya ni.

¹³Alkawal tə Hyel hara aka Ibrahim kəga kəkayeri arni, abbər ka da ndzi mjir fa kifər duniya ni, aɗi si atar ɓəla tsawu wa, amma atar hamta jirərni na namtə ni kalkal akəma Hyel.

¹⁴Kamnyar ma ku ndzi abbər tar mjir ɓəla tsawa shiɗa an ata fa kifə ni, to hamta jiri ni ata ndzi kula ampani, tsuwa alkawal ni ata ndzi gapani

¹⁵Kamnyar tsawa ana səntə ɗəffə bwarbwarkur ar Hyel, kamnyar akwa vəi tə tsawa aɗi wa, mda aɗi gari ɓəli tsawa hwatu wa.

¹⁶Apani mdə wutə alkawal ni ma atar hamta jiri, kamnyar ka alkawal ni ndzi cautə tə Hyel hamta aka shanga kəkayeri ar Ibrahim, aɗi aka mjir ɓəla tsawa shiɗa wa, amma ba aka mjir hamta jiri apatə Ibrahim ku hara. Kamnyar Ibrahim an baba' mburu shanga mburu.

¹⁷Apatə kakaɗər Hyel ku pəla, “I ku namtə nga baba' durayeri hang.” Mdə hara alkawal ngəni aka Ibrahim kamnyar tsa ku hamta jiri aka Hyel, na ana hamta mpika aka mji na mtəmtari, ka namtə su na aɗi wa ka da ndzi aɗi.

¹⁸Wala akwa sakatə su aɗi tə mda amzhi vəkər kəgari wa, Ibrahim ku vu akwa ɗəffari akwa hamta jiri abbər tsa ata sə ndzi baba durayeri hang. Kamnyar Hyel ku pəla alari, “Kəkayeri ar nga ata sə ndzi hang apani.”

¹⁹Apani wala tə məva Ibrahim ku hara aru pal ni, hamta jirərni aɗi kəmtadzi wa, wala tə tsa akwa wul apa su aɗi tə dzari akuri kəra wa, ka tsuwa apatə Saratu na mwalankiɗa amzhi kətə hur wa ni.

²⁰Su aɗi na kədzantə hamta jirərni ata kəra alkawal tə Hyel hara alari nə wa. Har ma alkawal ngəni ku jakjaka alari hamta jirərni, tə tsa pəla, “Hyel, gə sal kadzang!”

²¹Tsa ku hamta jiri swaiswai abbər Hyel ata mzhi hara su tə tsa hara alkawalari ni.

²²An su na hara tə Hyel namtə hamta jirər Ibrahim ni apa jirkur ni.

²³Tsuwa ndər na pəla abbər, “Mdə namtə hamta jirərni ni jirkur” ni aɗi kamnyar ni shini wa,

²⁴amma kamnyar mburu tsuwa, ka mburu sənda abbər Hyel ata sə jikau mburu akwa nca mji na ka jirkur, ma mburu ku hamta jiri alari, tsa na thlentə Mthlakər mburu Yesu akwa mtəmta,

²⁵Hyel hamta Yesu ka tsa mtə kamnyar bikər mburu, tsuwa tsa ku thlentə ni ka mpika kamnyar ka tsa namtə mburu kula biku akəmari.