Read bura-pabir Mjir Rom 8 Bible Online

Mjir Rom 8 - bura-pabir bible

Mjir Rom 8

¹Antə kulini shariyar mta aɗi ata ngkəi mji na ku ndzi ar Kristi Yesu wa.

²Kamnyar tsawur mambəl na ana hamta mpikə akwa Kristi Yesu ni, ku msərantə giri akwa tsawur biku na ana mwantə mda akwa mtə ni.

³Tsawur Musa aɗi mzhi mbantə mburu wa, kamnyar mtathlakkur dza mburu na ka biku ni. Antə Hyel hara su tə tsawa aɗi mzhi harari wa. Tsa thlentə Ɓzərni tə tsa si akwa dza, tsu akwa laku tə dza mburu na mjir biku akwa. Tsuwa akwa dza ndaga, antə Hyel thləthlatə ka dunar biku ata kəra mburu atar hamta Ɓzərni apa saɗaka kamnyar bikər mburu.

⁴Hyel hara apani kamnyar ka mburu hara su tə tsawu thlamta atar kələngkər aka su tə mambəl pəla, ata vəya nu nggukayeri ar dza mburu.

⁵Kamnyar mji na ana nu nggukər dza ana dzama ata kəra su tə dza ɗa akwa barari daci. Amma mji tə mambəl ana pwar ɗa, da ana dzama ata kəra su na təbwar mambəla.

⁶Kamnyar dzamər su na abwar dza ana səntə mta, amma dzamər su na abwar Mambəl ana səntə mpika ka msərakur.

⁷Kamnyar kəlara mdə na ku vətə hangkalari ata kəra sur duniya, tsa ata ndzi dawar Hyel, kamnyar tsa aɗi ana kələngkər aka tsawur Hyel wa, tsuwa jiri tsa amzhi wa.

⁸Kamnyar mji na ana kələngkər aka nggukər dza ɗa aɗi ana mzhi hara su na ata kəskəra Hyel wa.

⁹Amma ar giri, aɗi nggukər dza an akwa mwa ka giri wa, amma mambəl an akwa pwar giri, ma giri an ka Mambələr Hyel akwa ɗəffa giri. Tsuwa ka giri ɗangta abbər kəlara mdə na aɗi ka Mambələr Kristi wa, tsa aɗi arni hwatu wa.

¹⁰Amma ma Kristi akwa ɗəffa giri, to wala ma dza giri an mtəmtari kamnyar biku, mambələr giri tsu ka mpika kamnyar giri ku namtədzi ka jirkur akəma Hyel.

¹¹Tsuwa ma Mambələr Hyel na thlentə Yesu akwa mtəmtə ni aɗi akwa ɗəffa giri, tsa na thlentə Kristi akwa mtəmtə ni, tsa ata nar mpika aka dza na ar mtə ni, atar mambələrni na akwa ɗəffa giri ni.

¹²Antə mjir yeru, mburu ka kəthlər, amma aɗi ar nu su tə dza mburu akwa barari wa.

¹³Kamnyar ma giri ku nu su tə dza giri akwa barari, giri ata mta. Amma ma giri an ata mzhi nggəlar nggukər dza tə barkar Mambələr Hyel, to giri ata ndzi ka mpika.

¹⁴Kamnyar shanga mji tə Mambələr Hyel an akwa pwar ɗa, da an maɗa' Hyel.

¹⁵Kamnyar Hyel aɗi na giri mambələr mafakur na ana vu ka mdə thlivər nə wa, amma mambələr ndzi maɗa' Hyel. Tsuwa atar mambəl ni, antə mburu ana kəga Hyel abbər, “Baba! Tədda!”

¹⁶Mambələr Hyel ka kərari surni an akwa pəlari abbər mburu maɗa' Hyel ni.

¹⁷Antə mburu an maɗa'ni, mburu ku ndzi mjir fa kifərni, mjir fa kifər Hyel ata kəma duku ka Kristi, ma har mburu ku ɗar bwani ata kəma duku ka Kristi, kamnyar ka mdə sə haptə səliyir mburu ata kəma duku kəga tsa.

¹⁸Akwa dzamərna bwaniyayeri natə mburu akwa ɗarari kulini ni, aɗi ləkwa retar səli na mda ata sə ncanta ala mburu akəmazi nə wa.

¹⁹Kamnyar shanga suayeri tə Hyel alakta akwa səkari ka kucali, vir tə Hyel ata sə ncantə mji na ata ndzi maɗa'ni ni.

²⁰Kamnyar Hyel alaktə shanga suayeri na aɗi ni abbər ka da sə hiɗa. Tsuwa ngəni aɗi abbər ka hirər ɗa wa, amma an hirər Hyel na ɗəmha apani ni. Tsuwa tsa hara ngəni ka vuwur su akwa ɗəffu

²¹abbər vir laga suayeri tə tsa alaktə ni ka kərɗa, ata sə msərantədzi akwa mafakurər ɗa ni, ka hiɗamtadzi, ka sə ndzi ka səli ar msərmsərkur ar maɗa' Hyel.

²²Kamnyar mburu asənda abbər shanga suayeri tə Hyel alaktə ni akwa nggyinggya ka ɗar bwani apa mwala kutərya ba kulini.

²³Aɗi suayeri tə Hyel alaktə daci an akwa nggyinggyi nə wa, amma purəm kəga mburu. Wala mburu na ka Mambəl na Ɓɗakkarkara na ntangkəma akwa nca cautayeri tə Hyel hamta ala mburu, mburu ana nggyinggya akwa ɗəffa mburu, akwa sək sakatə Hyel ata sə ncanta abbər mburu maɗa'ni ni, sakatə mburu ata msəra akwa dzar biku ka bwani ni.

²⁴Kamnyar atar hamta jiri ngəni, antə mburu wutə mbantədzi. Amma ma mburu ku kurtə wutə su tə mburu vu akwa ɗəffa mburu ni, tsa aɗi ata ndzi su tə mda avəkər kari kəra wa. Kamnyar mda aɗi ana vəkər ka su tə tsa ku kurtə wutə wa.

²⁵Amma ma mburu akwa vəkər ka su tə mburu aɗi wutə wa, mburu ata mbwi ɗəffa mburu ka mburu səka.

²⁶Tsu apani tsuwa Mambəl na Ɓɗakkarkara ni ana dlar mburu akwa sakatə mburu mtathlaku. Kamnyar mburu aɗi səndə laku tə kalkal ka mburu hara adduwa akwa wa, amma Mambəl na Ɓɗakkarkara surni andər gari ata vəya mburu aka Hyel, akwa kiɗə ni ka nghyinghyi na mwavər tə mda amzhi ngkərɓəlari wa.

²⁷Tsuwa Hyel na ana wul su na akwa ɗəffa mda, asəndə dzamər Mambəl ni, kamnyar Mambəl ni ana kiɗa ata vəya mjir Hyel kalkal apatə Hyel ata barari.

²⁸Tsuwa mburu ku sənda abbər akwa shanga su Hyel ana hara su na ata ndzi ɓɗaku aka mji na ana hir ni, mji natə mdə ku kəga ɗa apatə tsa ku ɗəmha.

²⁹Kamnyar Hyel ku səndə mji təng ɗəm, ka ɗəmhə ɗa abbər ka da sə ndzi akwa dludzər Ɓzərni, kamnyar ka tsa ndzi yarakəma akwa nca shanga maɗaməma na hang ni.

³⁰Tsuwa mji tə tsa ɗəmhə ɗa ni an mji tə tsa kəga ɗa, tsuwa mji tə tsa kəga ɗa ni an mji tə tsa namtə ɗa kula biku akəmari, tsuwa mji tə tsa namtə ɗa kula biku akəmari ni an mji tə tsa haptə səliyir ɗa.

³¹To man tə ka mburu pəla ata kəra su ngəni ri? Ma Hyel an adzə mburu, wan ata mzhi ndzi dawar mburu ri?

³²Təng tə Hyel aɗi ngkata ala mburu Ɓzər ni wa, amma tsa ku hamta ni ala mburu shang ni, tsa aɗi ata na ala mburu shanga su ka tsiyari bwang wa ya?

³³Wan ata nggitə mzhi pəla su na ɗimi ata kəra mji tə Hyel an carɓəla ri? Ai mdari aɗi wa. Kamnyar Hyel ka kərari surni an namtə ɗa tə da ndzi kula biku akəmari.

³⁴Nənga wan ata mzhi pəlangkər ala ɗa ri? Jiri mdari aɗi wa. Kamnyar Kristi Yesu na mtə kamnyar mburu, tə mdə ku thlentə ni ka mpika kamnyar mburu, na andzəndzi abwa mazəma Hyel ni, an akwa kiɗə akəla Hyel ata vəya mburu.

³⁵Antə wan an ata mzhi ndəkəmta mburu ka hirkur tə Kristi ana hara ala mburu nə ri? Bwani ya, nənga ɗəffə ɓzəɓzə ri, nənga kədlə ri, nənga mi ri, nənga ngguɗikur ri, nənga asar ri, nənga mpa ri?

³⁶Apatə mdə ku rəbuta abbər, “Kamnyar nga antə mda akwa tsəgəi yeru tədəku, mdə namtə yeru apa təma tə mda akwa bara thla wulyari.”

³⁷Ai, akwa shanga suayeri ngəni, mburu ku təra kərathla ka mdə pəla abbər mburu ku səm daci, tsuwa mburu wutə ngəni atar mdə na hir mburu ni.

³⁸Kamnyar I ku mbərsa abbər wala mta, wala mpika, wala mjirthlentərhyel, wala shatanayeri, wala kuthlikurayeri na amtazi, wala sur thlivərantə mda na ashina, wala damitədzayeri na ɗəpa,

³⁹wala nalkurər su, wala zurangkurər su, jiri su aɗi akwa duniya ni, na ata mzhi ndəkəmta mburu ka hirkurər Hyel na atar Kristi Yesu na Mthlakər mburu wa.