Read bura-pabir 1 Korinthli 1 Bible Online

1 Korinthli 1 - bura-pabir bible

1 Korinthli 1

¹Wasika ngəni thlata akəli I na Bulus. Hyel ku carɓəla ra kəi ndzi mdərthlentər Kristi Yesu, atar hirər Hyel, ka ɓzərma' mburu Swasthlenes.

²I akwa rəbuta ala giri, giri na ikələziyar Hyel na ahar Korinthli, ka aka shanga mji tə Yesu Kristi ku kəcimta bikər ɗa, ka namtə ɗa tə da ndzi mji na ɓɗakkarkara, ata kəma duku ka shanga mji na akwa kəlara vəi, na ana hara adduwa akwa thləma Mthlakər mburu Yesu Kristi, Mthlakər ɗa ka ar mburu ata kəma duku.

³Ka Hyel na Təddar mburu, ka Mthlaku Yesu Kristi, hara ala giri ɓɗakkur, ka tsa na ala giri msərakur.

⁴I ana usar Hyel arna tədəku kamnyar giri, kamnyar ɓɗakkur tə tsa hara ala giri atar Kristi Yesu ni.

⁵Kamnyar atar ni, Hyel ku na giri shanga suayeri na ɓɗakɓɗaku akwa kəlara bwa, apa dunar səndə gari, ka səndər su ata kəra shanga suayeri na abwar mambəla.

⁶Ngəni an kamnyar ncanta ala giri abbər su tə I pəla ala giri ata kəra Kristi ni an jiri.

⁷Apani giri aɗi ata ni ka cautə laga na abwar mambəl wa, apatə giri akwa sək səyir Mthlakər mburu Yesu Kristi ni.

⁸Tsuwa tsa ata dunautə giri har ka vədza aka tsikərari, kamnyar ka giri ndzi kula biku akwa vir tə Mthlakər mburu Yesu Kristi ata sə ngka.

⁹Hyel ata haratari, kamnyar tsa aɗi ana ɓəli su tə tsa pəla wa, tsuwa tsa an kəga giri kamnyar ka giri mwardzi ka Ɓzərni Yesu Kristi na Mthlakər mburu ni.

¹⁰Maɗaməma, I akwa kiɗa akəla giri, akwa thləma Mthlakər mburu Yesu Kristi, abbər ka mnya giri ndzi duku. Giri aɗiya ndzi ka mnya giri zumzum wa, amma ka giri paktə kəra giri, ka dzamər giri ndzi duku, tsuwa ka mwaɓər giri ndzi duku.

¹¹Kamnyar mji laga akwa nca mjir kutakəyir Kuluwi ku pəla ali abbər beɗi ku thlata akwa daɓwa giri.

¹²Da pəla ali abbər waskəi akwa nca giri akwa pəla su zum ta ar nvwani. Mdə laga akwa pəla, “Arna, I akwa nu Bulus.” Mdə laga tsuwa akwa pəla, “Arna, I akwa nu Apollos,” wala “Arna, I akwa nu Kefas,” wala “Arna, I akwa nu Kristi.”

¹³Kaha, Kristi ni zumzum ya? Nənga I na Bulus ni antə mdə kukwamta ata udzəm kadləkadla kamnyar giri nə ri? Nənga mda aɗi akwa nca giri tə mdə hara ala baptizma akwa thləma Bulus ri?

¹⁴I ku usar Hyel, kamnyar I aɗi hara baptizma aka mda akwa nca giri wa, təng aka Krispus ka Gayus.

¹⁵Antə mda aɗi na amzhi pəla abbər tsa ku dlu baptizma akwa thləmi wa.

¹⁶Tsuwa I ku hara baptizma aka mjir kutakəyir Istifanus. Ma da kəra wa, I amzhi ɗangtə mdə damwa tə I hara alari baptizma wa.

¹⁷Kamnyar Kristi aɗi thlentə ra abbər kəi ra hara baptizma wa, amma kamnyar kəi ngkər labar na msəra, tsuwa aɗi atar gari ka ɗəɗukurər mdə wa, ta dunar mtər Kristi ata udzəm kadləkadlə ni asə sha gapani.

¹⁸Kamnyar gariyir udzəm kadləkadla an cakukur aka mji na akwa hila, amma ala mburu na ku mbantədzi tsa an dunar Hyel.

¹⁹Kamnyar rəbutə rəbutari akwa kakaɗər Hyel abbər, “I ata hilantə ɗəɗukur ar mji na ɗəɗuɗəɗu, kəi shamta səndər mji na kəta abbər da asəndə su ni.”

²⁰Apani ama mji na ɗəɗuɗəɗu nə ri? Ama maləmayeri ar thlipə tsawur Musa nə ri? Ama mji na ana kəta abbər da an asəndə shanga su na akwa zaman ngəni nə ri? Hyel aɗi ncanta abbər ɗəɗukur ar duniya ngəni an cakukur wa ya?

²¹Təng tə Hyel, akwa ɗəɗukurərni, wuta abbər mjir duniya aɗi ata səndə ni atar ɗəɗukurər mdə wa, antə tsa kəthlər ka ngkər labar na ndzi apa cakukur ni kamnyar mbantə mji na ku hamta jiri.

²²Kamnyar hang akwa nca yeru na mjir Yahudi ni, hir ka yeru wutə seɗayeri na ata ndatə mda. Hang akwa nca giri na aɗi mjir Yahudi wa ni tsuwa, hir ka giri ndzi ka ɗəɗukur na ar duniya.

²³Amma ar yeru, kəlara sakatə yeru akwa ngkər ata kəra Kristi tə mdə kukwamta ni, ɗəffa mjir yeru Yahudi ana ɓza, tsuwa mjir giri na aɗi Yahudi wa ni ana kəta abbər yeru akwa gariyir cakukur.

²⁴Amma aka mji tə Hyel ku kəga ɗa ka da wutə mbantədzi, wala mjir Yahudi, wala ka mji na aɗi mjir Yahudi wa, gariyir yeru ni an abbər, Kristi an dunar Hyel ka ɗəɗukur ar Hyel.

²⁵Kamnyar wala ma Hyel an caku, cakukurərni ku təramta ɗəɗukurər mda. Tsuwa wala ma Hyel an ɓuɓushu, ɓuɓushkurərni ku təramta dunawakurər mda.

²⁶Ɗangtə giri laku tə giri akwa, maɗaməma, sakatə Hyel kəga giri. Sakanda mji laga yiɗauwa akwa nca giri daci an ɗəɗu, ma atar wulər mjir duniya, aɗi mji hang an ka duna wa, tsuwa aɗi mji hang an maɗa' mji na ol'ol wa.

²⁷Amma Hyel carɓəla mji na cakucaku akwa duniya ni ka da kəli səli mji na ɗəɗuɗəɗu, ka carɓəla mji na kula duna ka da kəli səli mji na ka duna.

²⁸Tsa carɓəla mji na kula daraja ka rutərutari akwa duniya, har kəga suayeri na aɗi wa, kamnyar ka da shamta suayeri na aɗi.

²⁹Hyel hara suayeri ngəni shang kamnyar ta mdə laga asə gaya akəma Hyel.

³⁰Hyel an hara tə giri ndzi akwa Kristi Yesu, natə Hyel namtə ni tə tsa ndzi ala mburu ɗəɗukur. Tsuwa atar ni antə mburu mzhi ndzi kula biku akəma Hyel. Tsa an kəcimta ala mburu bikər mburu, ka pəli mburu akwa watsəɓər bikər mburu.

³¹Antə tsu apatə ku rəbutədzi akwa kakaɗər Hyel, abbər, “Kəlara mdə na ata gaya, ka tsa gaya ata kəra Mthlaku.”