Read bura-pabir 1 Korinthli 10 Bible Online

1 Korinthli 10 - bura-pabir bible

1 Korinthli 10

¹Maɗaməma, I akwa bara ɗangta ala giri abbər kəkayeri ar mburu shang ku mwa akira dlamba, tsuwa shanga ɗa ku təramta akwa Manda Duwathlu lapiya.

²Akwa dlamba ni, ka akwa manda ni, antə mdə hara baptizma ar ndzi mjir nu Musa aka shanga ɗa.

³Shanga ɗa səm susəmər mambəl jili duku,

⁴ka sa sur yimər mambəl jili duku. Kamnyar da sa yimər mambəl na thlata akwa pelar mambəl, na akwa nu ɗa ni. Tsuwa pela ndaga an Kristi.

⁵Amma wala apani, Hyel aɗi nggatə msərakur bwar ola ɗa wa, antə da ku mtəgəmtadzi akwa mtaku akwa vəyayeri zumzum.

⁶Suayeri ngəni shang hara kamnyar tsaktə mburu ta mburu asə mwaɓə suayeri na ɗimi ɗimi apatə da hara ni.

⁷Giri aɗiya ndzi mjir nu haptu apatə mji laga akwa nca ɗa ku hara wa. Kamnyar rəbutə rəbutari akwa kakaɗər Hyel abbər, “Mji nayeri ni ku ndzəndzi ka səm ka sa, ka thlatə har ka ləkwa ɓathla.”

⁸Antə mburu aɗiya ndzi mjir hara karwakur apatə mji laga akwa nca ku hara wa, har tə mji dəpu sərkumari ka makər ku ndla ka mta akwa kuta vir duku ɗeng.

⁹Tsuwa mburu aɗiya ngkərtə Mthlaku wa, apatə mji laga akwa nca ɗa ku hara, har tə pwapwayeri ku kurəmta ɗa.

¹⁰Mburu aɗiya nggungguni wa, apatə mji laga akwa nca ɗa ku hara, har tə mdərthlentərhyel na ar tsi mda ku kurəmta ɗa.

¹¹Suayeri ngəni hara ala ɗa ni shang kamnyar tsaktə mburu. Tsuwa mdə rəbutə ɗa kamnyar ka da ndzi sur tsaktə mburu, mburu tə kurər duniya ku si ata kəra mburu ni.

¹²Antə kəlara mdə na akwa tamata abbər tsa ku thləthlatə gyang, ka tsa hara hangkal ta tsa asə ndla.

¹³Ngkərtədzi aɗi na wutə giri, na kula ana hara aka mji damwa wa. Tsuwa giri ata mzhi mbərsa ka Hyel, abbər tsa aɗi ata hir zhar ngkərtədzi təramta duna giri wa. Akwa kəlara ngkərtədzə na ana wutə giri, tsa ana na ala giri dunar nggitari, ka kəlar ala giri laku tə giri ata mzhi ləɓəla akwa.

¹⁴Antə mjir yeru,[3] giri aɗiya vəngkər səli aka haptu wa.

¹⁵I akwa gari ala giri apa mji na ka nggaɓəlar su, na ata mzhi nggaɓəla su tə I akwa gari ata kər ni.

¹⁶Kəlara sakatə mburu ku kətə kwapə na ar barka, ka usar Hyel ata kər ni, aɗi tsa an mwardzi tə mburu ana hara akwa mamshir Kristi ni wa ya? Tsuwa buradi natə mburu ana ɓəgəlwa ni, aɗi tsa an mwardzi tə mburu ana hara akwa dza Kristi ni wa ya?

¹⁷Kamnyar buradi duku an aɗi, antə mburu na hang ni an dza duku, kamnyar shanga mburu ana kwasə buradi ngəni duku ni.

¹⁸Wul gir mjir Israila bu! Ai mji na ana səm susəmər saɗaka ni ana paktə kər akwa saɗakayeri tə mdə hamta ata bagaɗi ni.

¹⁹Man tə I akwa bara pəlari ri? I akwa pəla abbər susəm tə mdə thla haptu kəgari ni su na pwa ya? Wala tsuwa haptu ni su na pwa ya?

²⁰Awa! Su tə I akwa pəlari ni an abbər saɗaka tə mji na aɗi səndə Hyel wa ana hamta ni, da ana hamta aka shatanayeri, amma aɗi aka Hyel wa. Antə I aɗi akwa bara ka giri paktədzi kəga shatanayeri wa.

²¹Giri amzhi sa akwa kwapər Mthlaku ka giri jaktə sa akwa na ar shatanayeri wa. Tsuwa giri aɗi mzhi səm susəma akwa vəi səm susəmər Mthlaku, ka jaktə səm susəma akwa vəi səm susəmər shatanayeri wa.

²²Nənga mburu akwa bara vu ka Mthlaku səlkə ri? Nənga giri tamata abbər mburu təramta ni ka duna ri?

²³Mji laga ata mzhi pəla abbər, “Mdə ku hira ali kəi hara kəlara su tə I hira.” Amma aɗi shanga su an ka dlar wa. I ata mzhi pəla, “Mdə ku hira ali kəi hara kəlara su tə I hira.” Amma aɗi kəlara su andər namtə mdə wa.

²⁴Ga aɗiya bara su ɓɗaku kamnyar kər ngə wa, amma bara su na ɓɗaku kamnyar ntəwulər nga.

²⁵Giri ata mzhi səm kəlara kum natə mda ana ɗəla akwa kasəkur kum, kula giri yu su ata kər, ta asə damitə hangkala giri.

²⁶Kamnyar kakaɗər Hyel ku pəla, “Duniya ka shanga su na akwa an ar Mthlaku.”

²⁷Ma mdə na kula hamta jiri ku bara ka giri ra səm susəma aharngkiɗa, antə giri mwari, to ka gə səm kəlara su tə mdə ku vəi akəma ga, kula gə yu su ata kər, ta asə damitə hangkala ga.

²⁸Amma ma mdə laga ku pəla ala ga abbər, “Amma diya mdə ku hamta susəma ngəni aka haptu,” to ga aɗiya səm wa, aɗi kamnyar hamta jirər ngə wa, amma kamnyar hamta jirər mdə na pəla ala gə ni.

²⁹I akwa pəla kamnyar hamta jirərni, aɗi ar giri wa. Amma nuhum mdə laga asə pəla, “Kamnyar mi tə su na akwa ɗəffa mdə damwa ata mzhi ngkata ali su tə I akwa bara harari ri?

³⁰Ma I ku usar Hyel ata kəra susəmərna, kamnyar mi tə mda ata nggəl ra ata kəra susəm tə I ku usar Hyel ata kər ri?”

³¹Apani, kəlara su tə giri akwa harari, wala su tə giri akwa səmari, ka giri hara shanga su kamnyar nar səli aka Hyel.

³²Giri aɗiya səntə damitədzi aka mjir Yahudi wa, wala aka mjir Helleni wa, wala aka mjir ikələziyar Hyel wa.

³³Ka giri hara apatə I ana hara. I ana bara kəi namtə ɗəffa waskəi akwa shanga su tə I akwa harari ni, aɗi kamnyar kəri shira wa, amma kamnyar shanga mji, abbər ka da wutə mbantədzi.