Read bura-pabir 1 Korinthli 11 Bible Online

1 Korinthli 11 - bura-pabir bible

1 Korinthli 11

¹Ka giri nu surhararna, tsu apatə I akwa nu surharar Kristi. Azi akwa mnyar mjir Helleni, mdə kəthlər ka surharar kəkayeri.

²I ana hu giri kamnyar giri akwa ɗangtə ra akwa shanga su, tsuwa giri akwa kəsi thlipə[4] tə I hamta ala giri.

³Amma I akwa bara ka giri nggaɓəla abbər Kristi an ola ata kəra kəlara mda, tsuwa sal an ola ata kəra mwalankiɗa, ka tsuwa Hyel an ola ata kəra Kristi.

⁴Apani kəlara mdə sal na akwa hara adduwa wala ngkər labarər Hyel ka kərari harharari, tsa akwa tsi səliyir Kristi.

⁵Amma kəlara mdə mwala na akwa hara adduwa wala ngkər labarər Hyel kula bartə kərari ka ɗangkwali, tsa akwa tsi səliyir salngkiɗa, kamnyar ndzi apa tsa ku shimta kərari.

⁶Kamnyar ma mwala na aɗi ata bartə kərari ka ɗangkwali wa, ka tsa shimta shishir kərari. Amma təng tə ku ndzi sur səli aka mwala ka tsa shimta kərari wala pamta kərari ni, ka tsa bartə ɗangkwali.

⁷Ar mdə sal aɗi kalkal ka tsa hartə kərari wa, kamnyar tə tsa an dludzər Hyel ka səliyirni.

⁸Kamnyar mdə sal aɗi səɓəla adzə mwala wa, amma mwala an səɓəla adzə sal.

⁹Tsuwa mda aɗi alaktə sal aka mwala wa, mwala antə mdə alakta aka sal.

¹⁰An su na hara tə dwali ka mwala bartə kərari ka ɗangkwali ni, kamnyar ka mjirthlentərhyel sənda abbər tsa ku wutə dunar harari.

¹¹Amma wala apani, akwa Mthlaku, mwala aɗi ka kərari adzə sal wa, tsuwa sal aɗi ka kərari adzə mwala wa.

¹²Kamnyar apatə mwala ku səɓəla adzə mdə sal, antə kulini tsuwa mwala an ata yaɓəla mdə sal. Tsuwa shanga su thlata akəla Hyel.

¹³Wul gir ka kər giri ɓɗaku. Kalkal ka mwala hara adduwa aka Hyel ka kərari bwang ya?

¹⁴Wala laku tə Hyel namtə mburu akwa ma, ai akwa thlipa ala mburu abbər ma mdə sal na ku zhar shishir kərari saɓəl saɓəl, tsa akwa tsi səliyir kərari.

¹⁵Amma ma mdə mwala an ka shishirni saɓəl saɓəl, ata ndzi alari sur dəɓa. Kamnyar Hyel hamta alari shishir kər ngəni ni kamnyar hartə kərari.

¹⁶Amma ma mdə laga akwa bara beɗi ata kər, to ar mburu, ka tsuwa shanga ikələziyayeri ar Hyel, aɗi na səndə lakur vəngkər səli damwa na zum ta ngəni wa.

¹⁷Amma ata kəra surthlipayeri ngəni, I amzhi hu giri wa. Kamnyar kəlara sakatə giri ka tsaptədzi, giri aɗi ana tsaptədzər dlar wa, tar ar hilantə su.

¹⁸Kamnyar na ntangkəma ma sakatə giri ku tsaptədzi na ikələziya, I ana nggata abbər mnya giri aɗi ana ndzi duku wa, har I akwa bara mbərsa kəgari.

¹⁹Jiri, dwali ka mnya giri ndzi zumzum, kamnyar ka mdə mzhi nggaɓəla mjir nu Hyel na jirari.

²⁰Azha kəlara sakatə giri ku tsaptədzi ni, giri aɗi ana səm susəmər tahaku na ar Mthlaku jiri wa.

²¹Kamnyar ma giri ku baɗitə səm susəm ni, waskəi ana ləkəma ka səm susəmərni, har ka zhar mji laga ka mi, amma mji laga har apa ka da wika.

²²Mə ri! Giri aɗi ka kəi tə giri asəm ka sa akwa wa ya? Nənga giri akwa bara rutə ikələziyar Hyel, ka kəli səliyir mji na aɗi ka su wa ri? Man tə giri akwa bara kəi pəla ala giri ri? Kəi hu giri akwa hara su ngəni ya? Awa, I amzhi hu giri akwa su ngəni wa.

²³Kamnyar su tə I dlu akəla Mthlaku antə I akwa hamta ala giri, abbər akwa vir tə mdə ɓəli ni aka dawarni, antə Mthlaku Yesu kətə buradi,

²⁴ka usar Hyel ata kər, ka ɓəgəlwa, ka pəla, “Ngəni an dzi, natə mdə ku hamta kamnyar giri. Ka giri hara ngəni tədəku kamnyar ɗangtə ra.”

²⁵Tsu apani, aghəla susəm ni, antə tsa kətə kwapu, akwa pəla, “Ngəni an kwapər alkawal na bilən na akwa daɓwa Hyel ka mjirni, alkawal tə mdə hara ka mamshirna. Ka giri hara ngəni, kəlara sakatə giri akwa sari, kamnyar ɗangtə ra.”

²⁶Kamnyar kəlara sakatə giri akwa kwasə buradi ngəni, ka sa akwa kwapə ngəni ni, giri akwa psəmnya mtər Mthlaku har ka vədza aka sakar səyirni.

²⁷Antə kəlara mdə na ata kwasə buradi ngəni ka sa akwa kwapər Mthlaku, akwa laku na aɗi kalkal wa, tsa ku hara biku ar hilantə darajar dza Mthlaku ka mamshirni.

²⁸Antə ka waskəi wulhə kərni, kambəla tsa kwasə buradi ni ka sa akwa kwapə ni.

²⁹Kamnyar kəlara mdə na ku kwasə buradi ni ka sa akwa kwapə ni, kula dzama ata kəra darajar dza ni, tsa ku səntə shariya ata kərari surni.

³⁰An su na hara tə bwar ola giri kula duna ka nggawa, har ma mji laga ku mti.

³¹Amma ma mburu an wulhə kər mburu ɓɗak laga, sakani shariya aɗi ata ngkəi mburu wa.

³²Amma wala apani ma Mthlaku an ata hara ala mburu shariya ni, ata ndzi hərku. Kamnyar ata ndzi abbər tsa akwa ɗiɓəla mburu kamnyar ta mda asə shamta mburu ata kəma duku kəga mjir duniya.

³³Apani maɗama na, kəlara sakatə giri ku tsaptədzi ata kəma duku kamnyar səm susəm ni, ka giri səkə nvwa giri.

³⁴Ma mdə na akwa ngga mi, ka tsa səm susəma tsu avi akəmata tsa asi, kamnyar ta giri asə ndəkərəngkər bwani aka kəra giri akwa tsaptədzər giri ni. Ata kəra suayeri na damwa, ma sakatə I ku si, I ata pəla ala giri su tə ka mdə hara ata kər.