Read bura-pabir 1 Korinthli 12 Bible Online

1 Korinthli 12 - bura-pabir bible

1 Korinthli 12

¹Kulini, ata kəra su tə giri rəbuta abwar cautayeri na thlata akəla Mambəl ni, maɗaməma, I akwa bara ka giri səndə jirkur na ata kəra ɗa.

²Giri ku sənda abbər akəmata giri andzi mjir nu Hyel, mdə ku shamta giri atar mwantə giri adzə haptayeri na amzhi mnya wa.

³I akwa bara ka giri sənda abbər mda aɗi natə Mambələr Hyel akwa pwar ni na ata mzhi jaktə pəla, “Yesu ni shushuwari wa!” Tsuwa mda aɗi mzhi pəla abbər, “Yesu an Mthlaku ni,” kula Mambələr Hyel an akwa pwar ni wa.

⁴Dunar səndər suayeri aɗi zumzum, amma shanga ɗa thlata akəla Mambələr Hyel.

⁵Lakwayeri zumzum aɗi tə mji ana hara kəthlər akwa, amma shanga mburu akwa hara kəthlər aka Hyel duku.

⁶Dunar səndə lakur hara kəthlərayeri aɗi zumzum, amma tsu Hyel duku andər na mburu dunar harari.

⁷Hyel ku hamta aka waskəi dunar hara su, kamnyar ka mburu mzhi dlar nvwadzi.

⁸Aka mdə laga Mambələr Hyel ku hamta alari ɗəɗukur ar hamta sauri aka mda, aka mdə damwa tsuwa dunar səndə su laga zum.

⁹Aka mdə laga Mambəl ku hamta alari dunar hamta jiri, aka mdə damwa tsuwa Mambəl ni hamta alari dunar mbantə mda.

¹⁰Aka mdə damwa Mambəl ni hamta alari dunar hara surndata, aka mdə damwa tsuwa Mambəl ni ku hamta alari dunar ngkər ndərər Hyel, aka mdə damwa tsuwa Mambəl ku hamta alari dunar nggaɓəla wala ndər ni thlata akəla Mambələr Hyel, wala akəla mambəl laga damwa. Aka mdə laga Mambəl ni ku hamta alari dunar gari ka mnya zumzum, aka mdə damwa tsuwa Mambəl hamta alari dunar ngkərɓəla ndərayeri tə mdə ngkər akwa mnya damwa.

¹¹Shanga suayeri ngəni tsu Mambəl duku shini andər harari, tsuwa tsa andər ndəkəmta shanga suayeri ngəni aka waskəi kalkal apatə tsa hira.

¹²Kamnyar tsu apatə dza an duku, wala tə tsa ka bwayeri hang ata, tsuwa shanga bwayeri an su duku wala tə da hang ni, to tsu apani antə Kristi aɗi.

¹³Kamnyar shanga mburu, mdə hara ala mburu baptizma ka Mambəl duku, wala mburu mjir Yahudi, wala mburu aɗi mjir Yahudi wa, wala mburu an mafa, wala an kamba, shanga mburu akwa kəthlər ka mambəl duku.

¹⁴Kamnyar dza aɗi namtədzi ka bwa duku wa, amma ka bwayeri hang.

¹⁵Antə ma səl ata pəla, “Təng tə I aɗi tsi wa, ai I aɗi bwadukwa dza wa.” Ngəni amzhi ngkatə ni akwa ndzi bwadukwa dza wa.

¹⁶Tsuwa ma thləm ata pəla, “Təng tə I aɗi nca wa, ai I aɗi bwadukwa dza wa.” Ngəni amzhi ngkatə ni akwa ndzi bwadukwa dza wa.

¹⁷Ma shanga dza an nca, apa madi tə tsa ata nggatə su ri? Tsuwa ma shanga dza an thləm, apa madi tə tsa ata nggatə shiwur su ri?

¹⁸Amma nggədza Hyel ku ɗəmhə dza mda ka bwayeri hang akwa, ka vəi kəlara pal akwa nca ɗa akwa vəi tə tsa wuta abbər kalkal.

¹⁹Ma shanga bwayeri na akwa dza an su duku daci, ai sakani dza ni ata ndzi jili laga!

²⁰Amma wala tə bwayeri aɗi hang ni, tsu shanga ɗa dza duku.

²¹Antə apani, nca amzhi pəla aka tsi abbər, “I aɗi akwa tur ngə wa” wa, wala ka kər mzhi pəla aka səl abbər, “I aɗi akwa tur ngə wa” wa.

²²Aɗi kamnyar ngəni ma daci wa, amma har ma bwayeri natə mburu ana wuta apa da aɗi ka dlar twar wa ni, mburu amzhi ndzi kula da wa.

²³Tsuwa bwayeri ar dza natə mburu ana wuta apa da aɗi ka daraja wa ni, da antə mburu ana wulwul ɗa ta shang, tsuwa bwayeri natə mburu ana wuta apa da aɗi ɓɗaku dzau wa ni, da antə mburu ana namtə ɗa ka jaktə dəɓatə ɗa.

²⁴Amma bwayeri na ɓɗakɓɗaku aɗi ana tur ka mdə jaktə dəɓatə ɗa wa. Amma Hyel ku ɗəmhə dza mda akwa laku laga tə mburu ata mzhi wutə darajar bwayeri na ndzi apa da aɗi ka daraja dzau wa ni.

²⁵Apani antə shanga bwayeri ni ata ndzi ka mnya ɗa duku, har tə kəlara akwa nca ɗa ata wulwul nvwani.

²⁶Ma bwa laga pal akwa ɗar bwani, shanga bwayeri ni ata ɗar bwani ata kəma duku ka tsa. Tsuwa ma bwa laga pal akwa nggatə msəra, shanga bwayeri ata kucali ata kəma duku.

²⁷Apani shanga giri an dza Kristi, antə waskəi akwa nca giri an bwar dza Kristi ni.

²⁸Tsuwa akwa nca mjir ikələziya, na ntangkəma Hyel carɓəla aposəlayeri, na suɗkur naɓiyayeri, na makərkur maləmayeri, aghəla ndaga mjir hara surndata, ka mjir mbantə mji na nggawanggawa, ka mjir dlara, ka mjir ɗəmhə kəthlər, ka mjir gari akwa mnyayeri zumzum.

²⁹Ai shanga mburu amzhi ndzi aposəlayeri. Tsuwa shanga mburu amzhi ndzi naɓiyayeri wa. Shanga mburu amzhi ndzi maləmayeri wa. Shanga mburu amzhi ndzi mjir hara surndatə wa.

³⁰Shanga mburu amzhi ndzi ka dunar mbantə mji wa. Shanga mburu amzhi gari akwa mnyayeri zumzum wa. Shanga mburu amzhi ngkərɓəla karapur ndərayeri wa.

³¹Amma ka giri vu duna giri akwa bara dunar hara suayeri na təramta nayeri ni. Tsuwa I ata ncanta ala giri laku laga na ɓɗakta shang.