Read bura-pabir 1 Korinthli 13 Bible Online

1 Korinthli 13 - bura-pabir bible

1 Korinthli 13

¹Wala ma I an ka dunar gari akwa mnyayeri zumzum, ka mzhi gari ka mnyar mjirthlentərhyel, amma I aɗi ka hirkur wa, I ata ndzi apa liya laga tə mdə akwa tsari, wala kengkeng laga an akwa tuwa.

²Wala ma I an ka dunar hara naɓikur, har tə I asəndə shanga ashirayeri, tə I asəndə shanga su, tsuwa wala ma I an ka hamta jiri, har tə I ata mzhi kələmta garayeri, amma ma I aɗi ka hirkur wa, to I aɗi suma wa.

³Wala ma I an ata hamta shanga su tə I kəgari, har ka hamta dzi ka mdə mbanta, amma ma I aɗi ka hirkur wa, to sur dlar ra aɗi akwa wa.

⁴Hirkur ana vu ka mdə ndzi ka mbwiɗəffu ka mdəkur. Mdə na ka hirkur aɗi ana səlka wala gaya wa,

⁵wala haptə kərari wa, wala hara kər ɓəɓalkur wa. Tsa aɗi ana bara su kamnyar kərari wa, tsa aɗi ana bara mpa wa, wala kəsi mda akwa kutari wa.

⁶Mdə na ka hirkur aɗi ana hara kucali ata kəra ɗimikur wa, amma tar ata kəra sur jirkur.

⁷Mdə na ka hirkur ana mbwi ɗəffari ata kəra shanga su, ka mbərsatə shanga su, ka vəkər ka shanga su, ka nggitə shanga su.

⁸Hirkur aɗi ana kur wa. Naɓikur ata sə kura, gari akwa mnyayeri damwa ata sə mta, sənda ata sə kura.

⁹Kamnyar səndə sur mburu ka naɓikurər mburu aɗi nghyinghyari wa.

¹⁰Amma ma sakatə na nghyinghyari ni ku si, na aɗi nghyinghyari wa ni ata ndzi kula ampani.

¹¹Sakatə I ngkyar, I ana gari apa ngkyar, ka dzam su apa ngkyar, ka hara su apa ngkyar. Amma sakatə I hara ola, antə I pumta halər ngkyarkur ni.

¹²Kamnyar kulini mburu akwa wutə dludzər su zhimzhima akwa kutəram, amma vir nda mburu ata sə wutə ni nca ka nca. Kulini bwadukwa su daci antə I sənda, amma vir nda I ata nggaɓəlari karkar, kalkal apatə Hyel ku səndə ra karkar ni.

¹³Kulini suayeri aɗi makər na ata ndzi ba saka madi, watau hamta jiri, ka mbərsa, ka hirkur, amma na olta shang akwa nca ɗa ni an hirkur.