Read bura-pabir 1 Korinthli 14 Bible Online

1 Korinthli 14 - bura-pabir bible

1 Korinthli 14

¹Ka giri bara ndzi mdər hir mda. Tsuwa ka giri vu duna giri akwa bara wutə dunar hara suayeri na təbwar mambəla, na olta shang ka giri wutə dunar ngkər ndərər Hyel.

²Kamnyar ma ga akwa gari akwa mnya damwa zum, ga aɗi akwa gari aka mji wa, amma aka Hyel, təng tə mda aɗi na ata mzhi nggaɓəla su tə ga akwa pəlari wa ni. Jiri, ga akwa gari ni atar dunar Mambəla, amma tsa gari na akwa ashir.

³Amma ma ga akwa ngkər ndərər Hyel, ga akwa gari aka mji, kamnyar kəlantə ɗa, ka dunautə ɗa, ka shiktə ɗa.

⁴Ma ga akwa gari akwa mnya natə mji asəndə wa ni, təng ga akwa dlar kər ngə daci. Amma ma ga akwa ngkər ndərər Hyel, ga akwa dlar akwa kəlantə ikələziya.

⁵I hir abbər ka shanga giri gari akwa mnyayeri natə mda asəndə wa, amma na təramta ta shang I hir abbər ka giri ndzi mjir ngkər ndərər Hyel. Kamnyar kəthlər ar ngkər ndərər Hyel ku təramta kəthlər gari akwa mnyayeri tə mda anggaɓəla wa, tar ma mdə laga aɗi na ata ngkərɓəla karapur su tə ga akwa pəlari ni, antə shanga ikələziya ni ata wutə duna.

⁶Apani maɗama'na, ma I mwari adzə giri akwa gari akwa mnyayeri natə mda səndə wa, man ata dlar giri akwa ri? Ai tar ma I ngkər ala giri su tə Hyel ncanta ali, wala hamta ala giri səndə laga, wala hara ala giri naɓikur laga, wala thlipa ala giri su laga, antə giri ata səm riɓari.

⁷Ndzi tsu apa surtsayeri, apa shwala, wala yakandi. Ma kuraka ɗa aɗi ləɓəla yang wa, apa madi tə mda ata mzhi nggaɓəla su tə mda akwa tsari wala mburari nə ri?

⁸Tsuwa ma kuraka təmbəl aɗi ləɓəla karara wa, wan ata ɗəmhədzi kamnyar mpa ri?

⁹Tsu apani ala giri. Ma ga akwa gari aka mji akwa mnya natə da amzhi nggaɓəlari wa, apa madi tə da ata mzhi nggaɓəla su tə ga akwa pəlari nə ri?

¹⁰Jiri, mnyayeri aɗi zumzum hang akwa duniya, tsuwa shanga ɗa ka karapur ɗa.

¹¹Amma ma I aɗi akwa nggaɓəla mnya tə mda akwa gari ali akwa nə wa, təng japwa yeru ka mdə na akwa gari ali ni ata wuldzi apa mətəpi ka nvwani kərəngnga.

¹²Tsu apani antə su ni ata ndzi ala giri. Antə təng tə giri akwa mwaɓa abbər ka giri wutə dunar hara suayeri na atəbwar Mambəl na Ɓɗakkarkara ni, ka giri vu duna giri akwa bara suayeri na ata dlara akwa kəlantə ikələziya.

¹³Apani kəlara sakatə ga akwa gari akwa mnyayeri natə mda anggaɓəla wa, ka gə hara adduwa kamnyar ka gə wutə dunar ngkərɓəla karapur su tə ga akwa pəlari ni.

¹⁴Kamnyar ma I akwa hara adduwa akwa mnya tə mda anggaɓəla wa, mambələrna akwa hara adduwa jiri, amma I aɗiya nggaɓəla su tə I akwa pəlari nə wa.

¹⁵Apani man tə kəi hara ri? I ata hara adduwa akwa mambələrna, kəi hara adduwa akwa ɗəffi tsuwa. Tsuwa I ata hara ha akwa mambələrna, kəi hara ha akwa ɗəffi tsuwa.

¹⁶Kamnyar ma ga akwa usar Hyel akwa mambəl daci, apa madi tə mdə na akwa ngga nga ata mzhi paktə kər ka ga ka pəla, “Amin” aka adduwar usa ar ngə nə ri, təng tə tsa aɗi akwa nggatə su tə ga akwa pəlari wa ni.

¹⁷Kamnyar ga ata mzhi usar Hyel ɓɗak laga, amma ga aɗi akwa dunautə mdə na akwa ngga ngə ni wa.

¹⁸I akwa usar Hyel kamnyar tə I ana gari akwa mnyayeri tə mda anggaɓəla wa ni təramta shanga giri.

¹⁹Amma wala apani, ma akwa sakar vəngkər səli, kuji kəi pəla ndərayeri ntəfu natə mji ata nggaɓəlari, kamnyar ka mji thliptə su akwa, ta I apəla ndərayeri dəpu kuma akwa mnyayeri tə mda anggaɓəla wa.

²⁰Maɗaməma, giri aɗiya dzam su apa maɗankyar wa. Ka giri ndzi kula kəmanggarkur apa maɗankyar na tsu ata uwa, amma ka giri dzam su apa mji ol'ola.

²¹Kamnyar rəbutə rəbutari akwa kakaɗər Hyel abbər, “I ata gari aka mjirna akwa mnyayeri tə mda asəndə wa, atar mji na mətəpi. Amma wala apani, da aɗi ata psi thləm ali wa, ndə Mthlaku.”

²²Apani gari akwa mnyayeri tə mda anggaɓəla wa ni aɗi seɗa kamnyar mji na ku hamta jiri wa, amma kamnyar mji na kula hamta jiri. Tsuwa dunar ngkər ndərər Hyel an kamnyar dlar mji na ku hamta jiri, amma aɗi kamnyar mji na kula hamta jiri wa.

²³Apani, ma shanga mjir ikələziya tsaptədzi tə waskəi akwa gari akwa mnya tə mda anggaɓəla wa, ma mji na aɓəla, wala ka mdə pəla mji na kula hamta jiri səmbwa, da aɗi ata pəla abbər shanga giri ka cicu wa ya?

²⁴Amma ma waskəi an akwa ngkər ndərər Hyel, antə mji na kula hamta jiri, wala mji na aɓəla səmbwa, ai ndərər shanga ɗa ni ata tsəkwar ni, har ka tsa tubi.

²⁵Akwa sakatə da akwa ngga ndərayeri ni, dzamər ɗa na akwa ɗuwar ni ata səɓəla ata bəbal, antə da ata zuzuri ata ɓunja ɗa, ka vəngkər səli aka Hyel, ka pəla, “Jiri Hyel akwa nca giri!”

²⁶Apani, man tə ka mdə hara ri, mjir yeru? Kəlara sakatə giri ku tsaptədzi kamnyar vəngkər səli, ka mdə laga hara ha, ka mdə laga thlipa, ka mdə laga ngkər su tə Hyel ncanta alari, ka mdə laga gari akwa mnya tə mda asəndə wa, wala tsuwa ka mdə laga ngkərɓəla gari tə mdə pəla akwa mnya natə mda asəndə wa ni. Tsuwa ka giri hara shanga su kamnyar kəlantə ikələziya.

²⁷Tsuwa mji aɗiya təramta suɗə wala makər na ata gari akwa mnya tə mda asəndə wa ni wa. Tsuwa da aɗiya gari ata saka duku wa, amma mdə pal pal, tsuwa ka mdə laga ngkərɓəla.

²⁸Ma mda aɗi anda na ata mzhi ngkərɓəlari wa, ka waskəi akwa nca ɗa dləɓ səri akwa sakar vəngkər səli ni, ka waskəi bara saka laga tə tsa ata gari akwa mnya ndagə ni aka Hyel, da suɗə shiɗa.

²⁹Tsuwa mji suɗə wala makər ata mzhi ngkər ndərər Hyel, ka mambila mji dzama ata kəra ndər ni.

³⁰Amma ma Hyel ku gari aka pal akwa nca mji na akwa tsaptədzi ni, to ka mdə na akwa ngkər ndərər Hyel ni thləthlata.

³¹Kamnyar shanga giri ata mzhi ngkər ndərər Hyel, mdə pal pal, kamnyar ka kəlara mdə thliptə su ka wutə duna.

³²Mji na ana ngkər ndərər Hyel ana ndzi ka dunar ngkahə mambələr ɗa ka thləthlata, kamnyar ka mji damwa gari tsuwa.

³³Kamnyar Hyel aɗi ana hir su na ndəndandəndari wa, sai su na ata səntə msərakur. Tsuwa akwa shanga ikələziyayeri ar mji na ɓɗakkarkara,

³⁴ka mwanki ndzi ɗiɗi akwa tsaptədzər ikələziyayeri, kamnyar mda aɗi hir ka da gari wa. Amma ka da nu su tə mdə pəla apatə tsawa ku pəla.

³⁵Ma su laga aɗi natə da akwa bara səndə su ata kər, ka da yu shilər ɗa tsu aviyar ɗa. Kamnyar ata ndzi sur səli ka mdə mwala gari akwa nca mjir ikələziya.

³⁶Mə ri! Ala giri antə Hyel baɗitə gari ni ya? Nənga təng ala giri shi giri antə mdə pəla gari ni ri?

³⁷Ma mdə laga akwa dzama abbər tsa naɓi, wala mambəl an akwa pwar ni, to ka tsa sənda abbər su tə I akwa rəbuta ala giri ni an tsawur Mthlaku.

³⁸Ma mdə na aɗi vədzə hangkalari aka su ngəni wa, mda aɗi ata damitədzi ka tsa tsu wa.

³⁹Antə apani, maɗaməma, ka giri vu hangkala giri akwa ngkər ndərər Hyel, tsuwa giri aɗiya ngkatə gari akwa mnyayeri tə mda asəndə wa wa.

⁴⁰Amma ka giri wuta abbər mda akwa hara shanga su ka hangkal ɓɗak laga, tsuwa akwa lakwari.