Read bura-pabir 1 Korinthli 15 Bible Online

1 Korinthli 15 - bura-pabir bible

1 Korinthli 15

¹Kulini, mjir yeru, I akwa ɗangtə ala giri ata kəra labar na msəra natə I ngkər ala giri, tə giri dlu ka kəsi ɓəɓal ni.

²Labar ngəni msəra ni an ata mbantə giri, ma giri ku kəsi ɓəɓal. Ma apani wa hamta jirər giri ni ata ndzi gapani.

³Kamnyar I ku ngkər ala giri su na olta shang tə I dluwa, abbər Kristi ku mti kamnyar bikər mburu tsu apatə kakaɗər Hyel ku pəla,

⁴antə mdə harəmta ni, antə tsa thlatə ka mpika aghəla vir na makərkur, apatə kakaɗər Hyel ku pəla.

⁵Antə tsa ncantə kərni aka Bitrəs ka aka shanga aposəlayeri na kumnya suɗə ni.

⁶Aghəla nda antə tsa ncantə kərni aka mjir nuwa natə hangkurər ɗa ku təramta aru ntəfu, sakatə da ata kəma duku, natə bwar ola ɗa tsu aɗi, wala tə bwadukwa ɗa ku mtəgəmtadzi.

⁷Tsuwa tsa ncantə kərni aka Yakub, ka tsuwa aka shanga aposəlayeri

⁸Na aghəl ta shang, tsa ncantə kərni ali tsuwa, wala tə I ndzi apa mdə tə mdə yaɓəla ni akwa saka na kalkal wa.

⁹Kamnyar I an gajir shanga aposəlayeri, ɓɗakkurərna aɗi mzhi ka mdə kəga ra aposəl wa, kamnyar I ku hara bwani aka ikələziyar Hyel.

¹⁰Amma Hyel kətadzə ra ka hara ali ɓɗakkur, ka namtə ra apatə I aɗi ashina. Tsuwa ɓɗakkur tə tsa hara ali ni aɗi ata ndzi gapani wa. Kamnyar I ku hara kəthlər ka duna təramta shanga aposəlayeri ni, wala tə jiri aɗi I an hara ka duni wa, amma Hyel an akwa hara kəthlərərni ka iya atar kətadzərni.

¹¹Antə wala iya an ngkər ala giri ndərər Hyel ni, wala da an ngkəra, antə giri hamta jiri ni, shang duku ala yeru.

¹²Kulini ma har yeru akwa ngkər abbər Kristi ku thlata akwa mtəmta, apa madi tə mji laga akwa nca giri akwa pəla abbər mdə na ku mti aɗi ata mzhi thlatə ka mpikə wa nə ri?

¹³Kamnyar ma mda aɗi ata jaktə thlatə ka mpikə wa, ata ncanta abbər Kristi aɗi thlata akwa mtəmta wa.

¹⁴Antə ma Kristi an aɗi thlata akwa mtəmta wa, shanga ngkər tə mburu akwa harari ni ata ndzi gapani, tsuwa hamta jirər giri ni ata ndzi gapani.

¹⁵Tsuwa ata ndzi abbər yeru akwa thlandər ata kəra Hyel, kamnyar yeru ku hara seɗa ata kəra Hyel abbər tsa ku thlentə Kristi akwa mtəmta. Antə ma ku ndzi jiri abbər mji na ku mti aɗi ata thlatə ka mpikə wa, to Hyel aɗi thlentə Kristi jiri wa.

¹⁶Kamnyar ma mda aɗi thlentə mji na mtəmtari wa, ata ndzi abbər Kristi aɗi thlatə wa ja.

¹⁷Antə ma Kristi aɗi thlata akwa mtəmtə wa, hamta jirər giri ni ku ndzi gapani, antə giri tsu akwa ndzi akwa bikər giri.

¹⁸Antə ata ncanta abbər mji na mta akwa Kristi ni ku sha gapani.

¹⁹Antə ma shanga vəkər tə yeru kəgari akwa Kristi ni kamnyar duniya ngəni daci, yeru ata ndzi sur kətadzə na olta shang.

²⁰Amma jirkur na aɗi an abbər Kristi ku thlata akwa mtəmta. Tsa an yarakəmar thlata akwa mtəmta ar shanga mji na ku mti.

²¹Kamnyar tsu apatə mtə ku si atar mdə pal, antə thlata akwa mtəmta ku si atar mdə pal.

²²Kamnyar tsu apatə atar Adam shanga mburu ata mta, apani tsuwa atar Kristi shanga mburu ata sə jaktə ndzi ka mpika.

²³Amma mburu ata sə thlata ata ata. Mdə na ntangkəma an Kristi na yarakəmar mjir thlata akwa mtəmtə ni, kambəla akwa sakar səyirni shanga mji na ku ndzi arni ata thlata.

²⁴Aghəla tə Kristi ku dlərəmta shanga kuthli, ka dunar kuthlikur, ka shanga suayeri na ka duna, antə shanga su ata kura, antə tsa ata hamta kuthlikur ni aka Hyel na Tədda.

²⁵Kamnyar ku ndzi dwali ka Kristi hara kuthlikur, har ka tsa pungkir shanga dawayeri arni akira səlari.

²⁶Dawa na aghəlta shang tə ka mdə dlərəmta an mta.

²⁷Kamnyar kakaɗər Hyel ku pəla, “Hyel ku pwi shanga suayeri akira səlari.” Amma sakatə mdə pəla, “Shanga suayeri ku ndzi akirari,” ni, ata bəbal abbər aɗi vu Hyel ka kərari akwa wa, kamnyar tsa an ku pwi shanga su akira Kristi ni.

²⁸Ma sakatə shanga su ku ndzi akira kuthlikur ar Kristi, antə Ɓzər ka kərari ata hamta kərni akwa tsiya Hyel, na hamta shanga su akwa tsiyari ni, kamnyar Hyel ndzi ola ata kəra shanga su akwa shanga bwa.

²⁹Kamnyar ma mji na ku mti aɗi ata thlatə ka mpikə wa, kamnyar mi tə har mji laga akwa dlu baptizma ata vəya yangkura ɗa na ku mtə ri? Man ampaniyir harari ri? Ai tar ma mji na mtə ni ata sə thlatə ka mpika vir laga.

³⁰Tsuwa kamnyar mi tə yeru akwa kəl asar ar mpika yeru tədək saka ri?

³¹Kamnyar I akwa kahyel ala giri mjir yeru, abbər tədək viri I akwa kəl asar ar mpikəi. Tsuwa I akwa hara ngəni ka kucali, kamnyar tə giri ku wutə mpika akwa Kristi Yesu na Mthlakər mburu.

³²Ma mpa tə I hara ka mwaɓiyayeri ar mtaku ahar Afisa ni an kamnyar sur duniya, man ata dlar ra akwa ri? Ma har mda aɗi ata sə jaktə ndzi ka mpikə wa, “Kuji ka mburu səm ka sa, ma ku ndzi mburu ata mtə ɗəpa.”

³³Giri aɗiya hir ka mjir hara jili suayeri ngəni pwaktəmta giri wa. Kamnyar mji ana tsa karapu abbər, “Ndzi ka pazhi na ɗimi ana hilantə mda.”

³⁴Ngka giri akwa hangkala giri, ka giri zhar hara biku. Kamnyar ata ndzi sur səli ala giri ka giri nggata abbər har ba kulini mji laga aɗi akwa nca giri na aɗi səndə Hyel wa.

³⁵Amma nuhum mdə laga ayuwa abbər, “Apa madi tə mda ata thlentə mji na ku mtə nə ri? Ka jili dza na madi antə da ata thlatə ri?”

³⁶Gə caku ya! Ai tar ma hila hwulfə tə gə thləkamta akwa di ni ku hiɗa katagu, kambəla tsa ptsa.

³⁷Tsuwa hwulfə daci antə gə thləkamta ni, apa mthli, wala munya su damwa, aɗi mthli na ku kurtə kəl kasha wa.

³⁸Amma Hyel andər carɓəla jili dza tə tsa ata hamta alari, kəlara hwulfə ka jili laku tə dzari ata ndzi akwa.

³⁹Kamnyar aɗi shanga suayeri na ka mpika an jili duku wa. Mdə ka jili kumər dza ɗa zum, mwaɓi ka jili kumər dza ɗa zum, ɗika ka jili kumər dza ɗa zum, tsuwa kəlfa ka jili kumər dza ɗa zum.

⁴⁰Suayeri aɗi na amtazi, tsuwa suayeri aɗi na akwa duniya. Amma ɓɗakkur suayeri na amtazi an zum, tsuwa ɓɗakkur suayeri na akwa duniya zum.

⁴¹Pci ka jili ɓɗakkurərni, thliya ka jili ɓɗakkurərni, sasəlkayeri ka jili ɓɗakkurər ɗa, har ma ɓɗakkurər sasəlkayeri laga zum ta nvwa ɗa.

⁴²Tsu apani antə suayeri ata sə hara akwa sakatə mji na ku mti ata thlatə ka mpika. Ma mburu ku mti, mda ata harəmta dza mburu ni akwa di ka tsa hiɗa, amma mda ata thlentə ni ka tsa ndzi ka mpika ba saka madi.

⁴³Mda ana harəmta dza mburu kula daraja, amma mda ata thlentə ni ka daraja. Mda ana harəmta dza mburu kula duna, amma mda ata thlentə ni ka duna bilən.

⁴⁴Mda ana harəmta dza mburu na ar kum ka mamshi, amma mda ata thlentə mburu ka dza na ar mambəla. Kamnyar apatə dza na ar kum ka mamshi aɗi, apani tsuwa dza na ar mambəl aɗi.

⁴⁵Kamnyar kakaɗər Hyel ku pəla, “Adam, mdə na ntangkəma ku ndzi mdə na ka mpika.” Amma Yesu natə mda ata mzhi kəga ni abbər Adam na aghəlta shang ni ku ndzi Mambələr hamta mpika.

⁴⁶Na si ntangkəma ni an dza na ar kum ka mamshi, kambəla dza na ar mambəl ni si aghəlari.

⁴⁷Adam mdə na ntangkəma ni thlata akwa di, mdə nam ni ka bərbər, amma Yesu mdə na suɗkur ni thlata amtazi.

⁴⁸Mjir duniya ni akwa ndzi akwa laku tə Adam ndzi akwa. Mji na ku hamta jiri aka Yesu na thlata amtazi ni tsuwa, akwa ndzi akwa laku tə Kristi ndzi akwa.

⁴⁹Tsu apatə mburu ku kətə jili dza mdər duniya ni, vir laga tsuwa mburu ata sə kətə jili dza mdə na amtazi ni.

⁵⁰Su tə I akwa pəla ala giri ni, mjir yeru, an abbər dza mburu tə mburu kəgari kulini ni amzhi ləkwa kuthlikur Hyel wa. Dza mburu na ata hiɗa ni amzhi ləkwa vəi na ata ndzi ba saka madi wa.

⁵¹Ndzi kəi ngkər ala giri ashir laga! Aɗi shanga mburu ata mtə wa, amma shanga mburu mda ata pali ala mburu laku tə mburu akwa.

⁵²Su ngəni ata sə hara akwa kutar saka laga raka, akwa məcikər nca, sakatə mdə ku mbur təmbəl na aghəlta shang. Kamnyar mda ata sə mbur təmbəl, antə mji na ku mti ata thlatə ka dza na ahiɗa wa. Antə mburu na tsu ka mpikə ni, mda ata pali ala mburu dza mburu.

⁵³Kamnyar tar ka mdə pali dza ngəni na ata hiɗa ni ka tsa ndzi dza na aɗi ata hiɗa wa, ka dza na ata mtə ni kətə dza na aɗi ata mtə wa.

⁵⁴Antə ma sakatə dza ngəni na ata hiɗa ni ku palidzi ka ndzi dza na aɗi ata hiɗa wa ni, tə dza na ata mtə ni ku kətə dza na aɗi ata mtə wa ni, antə su tə mdə rəbuta akwa kakaɗər Hyel ni ata sə nghyaɓəladzi, abbər, “Mdə ku mula aka mta, ka ndasəmnya ni,

⁵⁵Mtə ragai, azha su aɗi tə ga anggyari kwang wa! Mtə ragai, azha ga amzhi dəkəi mdə na ku mtə wa!”

⁵⁶Ai biku an dunawakur mta, tsuwa dunawakur biku an tsawa.

⁵⁷Amma usa aka Hyel na na ala mburu dunar nggyari su atar Mthlakər mburu Yesu Kristi.

⁵⁸Antə, mjir yeru natə I hirhira, ka giri ləkəma kula ntsarsəl, giri aɗiya hir ka su laga kənggərantə giri wa. Tədəku giri akwa hara kəthlər ar Mthlaku, kamnyar giri ku sənda abbər ghərər giri aka Mthlaku ni aɗi ata ndzi gapani wa.