Read bura-pabir 1 Korinthli 16 Bible Online

1 Korinthli 16 - bura-pabir bible

1 Korinthli 16

¹Kulini ata kəra tsaptə kwaba kamnyar dlar mjir Hyel na ahar Urushalima, usa ka giri hara tsu apa su tə I pəla aka ikələziyayeri na ahar Galatiya.

²Akwa kəlara vir na ntangkəma ar sati ka waskəi akwa nca giri dingngga kəɓəla kwaba laga akwa su tə tsa ku mzhi wutari, ka tsa vəi. Giri aɗiya səka abbər tar ma sakatə I ku si kambəla giri ləkwa tsaɓari ka huvə wa.

³Antə ma sakatə I ku si, I ata rəbutə wasika aka mji tə giri ku carɓəla, kəi thlentə ɗa ka su tə giri hamta ni ka da mwanta ahar Urushalima.

⁴Ma mburu an ku wuta abbər ata ndzi kalkal kəi mwari tsuwa, təng yeru ata pakta.

⁵I ata mwari adzə giri aghəla tə I ku dlarhə Makidoniya, kamnyar I akwa bara nuwa atar Makidoniya.

⁶Nuhum ma I ku si I ata ɗarndzi adzə giri, nuhum har kəi kuri vəya anda, kambəla giri sə pwarɓəla ra kəi ləkəma ka lənggurna akwa kəlara vəi tə I ata sə mwari akwa.

⁷I aɗi akwa bara ma I ku si adzə giri kəi təramta təkəma wa, I akwa bara kəi ɗarndzi adzə giri, ma Mthlaku ku hira.

⁸Amma akwa saka ngəni I akwa bara kəi ɗarndzi azi ahar Afisa, har ka vədza aka vir Pentikost.

⁹Kamnyar kulini nyarmbwa laga bau ku kəlardzi ali kamnyar kəthlər na ola azi, wala tə mji aɗi hang na akwa hirari wa.

¹⁰Ma Timothli ku mzhitə giri, ka giri wuta abbər su aɗi tə tsa ata thlivər thlivərari wala raka wa, kamnyar tsa ma tsa akwa hara kəthlər ar Mthlaku tsu apa iya.

¹¹Antə giri aɗiya hir ka mdə laga rutə ni wa. Ka giri pwarɓəla ni lapiya, ka tsa ngka adzə ra, kamnyar I akwa sək səyirni kəga maɗaməma.

¹²Ata kəra ɓzərma' mburu Apollos, I ku kiɗə kərari abbər ka tsa ra wuli giri, tsa ka maɗaməma na azi, amma hangkalari aɗi kətə mwari akwa saka ngəni wa. Ma tsa ku wutə saka na kalkalari tsa ata mwari.

¹³Ka gir səka, tə ka giri thləthlatə gyang akwa hamta jirər giri, ka giri ntsətədzi ka ndzi ɓəɓal.

¹⁴Shanga su tə giri akwa harari, ka giri hara akwa hirkur.

¹⁵Giri asənda abbər kutakəyir Istifanus an mji na baɗitə tubi ka dlu Mthlaku ntangkəma akwa tsəɗi Akaya, tsuwa da ku hamta kərɗa akwa kəthlər aka mjir Hyel.

¹⁶I akwa kiɗə giri abbər ka giri kələngkər aka jili mji apani, har ka shanga mji tə yeru hara kəthlər ata kəma duku kəga da.

¹⁷I ku nggatə msərakur səyir Istifanus, ka Fortunatus, ka Akaikus, kamnyar da kuri ali wujir apa giri an adzə ra.

¹⁸Kamnyar da akwa dunautə ra tsu apatə da dunautə giri. Antə usa, ka giri wulwul jili mji apani.

¹⁹Ikələziyayeri na akwa tsəɗi Asiya akwa thlentə thlawardzər ɗa ala giri akwa thləma Mthlaku. Tsuwa Akila ka Prisila, ka ikələziya na ana tsaptədzi akwa kəyir ɗa akwa thlentə thlawardzi ala giri.

²⁰Shanga maɗama' giri na azi akwa thlawar giri. Ka giri thlawar shanga nvwa giri ka paktər tsi na ɓɗakkarkara.

²¹I na Bulus an akwa rəbuta ala giri wasika ngəni ni ka tsi surna.

²²Ma kəlara mdə na aɗi akwa hir Mthlaku wa, ka tsa ndzi hilhilari. Mthlakər yeru, ka gə si!

²³Ka barkar Mthlaku Yesu ndzi adzə giri.

²⁴I hir giri shanga giri akwa Kristi Yesu. Amin.