Read bura-pabir 1 Korinthli 2 Bible Online

1 Korinthli 2 - bura-pabir bible

1 Korinthli 2

¹Ma giri an ata ɗangtari, akwa mwarərna adzə giri nda, maɗaməma, I aɗi kəthlər ka ndərayeri na ol'ola wala ncantə ɗəɗukur ar səm ɗəffa mda, akwa ngkərɓəla ashir tə Hyel pəla ala yeru nə wa.

²Kamnyar sakatə I adzə giri nda, I kwamta abbər I aɗi ata bara ka mdə ngkər ali suayeri na ku təramta wa, kamnyar su na mwantə ra an kəi ngkər ata kəra Yesu Kristi ka ata kəra mtərni ata udzəm kadləkadla.

³Sakatə I adzə giri nda I kula duna, antə I akwa kədza kamnyar thlivəra.

⁴Tsuwa gariyirna ka waaziyirna aɗi ka masəkukur ar mji na ku karata na ana kəthlər ka ɗəɗukurər ɗa kamnyar səm ɗəffa mdə wa. Ata vəya ndaga, I akwa harari kəga seɗayeri na akwa hara ka mji hamta jiri abbər Mambələr Hyel an akwa hara kəthlərərni ka duna.

⁵I hara apani ni kamnyar ta giri asə mbərsa ka ɗəɗukur mda, amma ka giri mbərsa ka dunar Hyel.

⁶Amma wala apani, ma akwa nca mji natə hamta jirər ɗa ku mwanti, I ana gari ala ɗa ka ndərayeri na ar ɗəɗukur. Amma aɗi jili ɗəɗukur na ar zaman ngəni wa, wala jili ar mjir kuthlikur na akwa zaman ngəni wa, kamnyar jili ɗəɗukur nayeri ni aɗi ana səkwai sha wa.

⁷Ar yeru, yeru ana gari ata kəra ɗəɗukur na ar Hyel, natə tsa ɗəmha akwa ɗuwari, ashir tə tsa ɗəmha təng ɗəm akwa baɗitari kamnyar haptə səliyir mburu.

⁸Mda aɗi wala duku akwa nca mjir kuthlikur na akwa zaman ngəni na ku səndə ɗəɗukur ngəni wa. Kamnyar ma da an sənda, sakani da aɗi ata kukwamta Mthlaku na ka səli nə wa.

⁹Amma ngəni an tsu apatə ku rəbutədzi akwa kakaɗər Hyel abbər, “Su tə mda aɗi ɗar wutari ka nca wa, wala ɗar nggatari ka thləm wa, wala ɗar dzama ata kər akwa ɗəffari wa, an su tə Hyel ɗəmha aka mji na hir ni.”

¹⁰Amma ar yeru, Hyel ku kəlar ashir ngəni ala yeru atar Mambələrni. Kamnyar Mambəl ni ana wulɓəla shanga su, wala ashira Hyel na mwavər ka mdə nggaɓəla.

¹¹Kamnyar wa an ata mzhi səndə su na akwa ɗəffa mdə ri, ka təra kəra mambələrni na akwa dzari? Tsu apani tsuwa mda aɗi na ata mzhi səndə su na akwa ɗəffa Hyel wa, tar Mambələrni surni.

¹²Ar yeru, yeru aɗi dlu mambələr duniya ngəni wa, amma mambəl na thlata akəla Hyel antə yeru dluwa, kamnyar ka yeru səndə shanga su tə Hyel hamta ala mburu ka tsiyari bwang.

¹³Antə yeru akwa pəla ala giri ndərayeri ngəni ni aɗi atar ɗəɗukurər mdə wa, amma atar Mambəla, atar ngkərɓəla jirkur na abwar mambəl aka mji na ka Mambəla.

¹⁴Kəlara mdə na aɗi ka Mambələr Hyel wa, tsa aɗi ata mzhi dlu cautayeri na thlata akəla Mambələr Hyel nə wa, kamnyar ata ndzi alari apa cakukur. Kamnyar təng tə tar atar mambəl antə mda ata mzhi nggaɓəla ɗa ni, tsa aɗi ata mzhi nggaɓəla ɓɗakkurər ɗa wa.

¹⁵Kəlara mdə na ka Mambələr Hyel, tsa ata mzhi thlamta shariya ata kəra shanga su, amma mda aɗi ata mzhi thlamta shariya ata kərari wa.

¹⁶Tsu apatə kakaɗər Hyel ku pəla abbər, “Wan amzhi səndə dzamər Mthlaku har ka tsa mzhi thlipa alari ri?” Amma ar mburu, mburu ka jili dzamər Kristi ni.