Read bura-pabir 1 Korinthli 3 Bible Online

1 Korinthli 3 - bura-pabir bible

1 Korinthli 3

¹Maɗaməma, I aɗi mzhi gari ala giri apa aka mji na ka Mambələr Hyel wa, amma apa aka mji na abwar dza, ka apa aka maɗankyar atar hamta jiri akwa Kristi.

²I ndlantə giri ka ntaɗa[1], aɗi ka ɗəvə wa, kamnyar sakanda giri amzhi səm su na kəkəsari wa. Wala kulini ma giri amzhi səmari wa,

³kamnyar har ba kulini giri tsu ka halayeri na ar dza. Kamnyar ma har ba kulini giri tsu akwa səlkər nvwa giri, ka mpa kəga nvwa giri, ai ngəni ku ncanta abbər giri tsu akwa hara sur dza, təng tə giri akwa hara su tsu apa mjir duniya ni.

⁴Kamnyar ma mdə laga akwa nca giri ata pəla, “Arna I akwa nu Bulus,” ka mdə damwa pəla, “Arna I akwa nu Apollos,” ni, giri aɗi akwa hara su apa mji na ndzang wa ya?

⁵Shang ma wan Apollos nə ri? Tsuwa wan Bulus nə ri? Aɗi yeru mjir kəthlər ndzang na dlar giri akwa hamta jiri wa ya? Ai kəlara mda akwa nca yeru hara kəthlər tə Mthlaku hamta alari.

⁶Arna I thləkamta, antə Apollos pungkər yimi, amma Hyel an ptsanta ka kəlanta.

⁷Apani mdə na thləka ni ka mdə na pungkər yimi ni aɗi suma wa, tar Hyel na kəlantə ni.

⁸Mdə na thləka ni, ka mdə na pungkər yimi ni, japwa ɗa mwaɓər ɗa duku. Tsuwa waskəi ata sə dlu watsəɓərni kalkal ka kəthlərərni.

⁹Kamnyar yeru an mjir kəthlər ata kəma duku, na akwa kəthlər aka Hyel. Antə giri an fakər Hyel ni. Tsuwa giri an mbwar Hyel.

¹⁰Atar ɓɗakkur tə Hyel hara ali antə I ku nci səla mbwa ni apa mdər hən na masku, antə mdə damwa akwa həna ata kər. Amma tar ka kəlara mdə hara hangkal ka jili həna tə tsa ata harari ata kər.

¹¹Kamnyar səla mbwa damwa aɗi tə mda ata mzhi nciyari na təramta natə mdə ku kurtə nci nə wa, watau tsa na Yesu Kristi.

¹²Kəlara mda ata mzhi həna ata kəra səla mbwa ngəni atar kəthlər ka dinar, wala adzərfa, wala pela na ka daraja, wala udzəm, wala kusar, wala kədla.

¹³Amma ma vir shariya ni, u'u ata ncaɓəla jili kəthlər tə waskəi hara. U'u ni an ata ngkərtə kəlara kəthlər, ka ncaɓəla ɓɗakkurər kəthlər tə waskəi ku hara.

¹⁴Ma kəthlər tə mdə hara ata kəra səla mbwa ni aɗi mbamtadzi wa, to mdə na hən ni ata wutə watsəɓər kəthlərərni.

¹⁵Amma ma kəthlərər mdə ni ku mbamtadzi, tsa ata hara asar ka duna. Amma mdə na hən ni ata wutə mbantədzi, wala tə ka bwani, apa mdə na msərəmta akwa u'u.

¹⁶Giri aɗi sənda abbər giri an mbwar Hyel, tə Mambələr Hyel akwa ndzəndzi akwa giri wa ya?

¹⁷Kəlara mdə na ku hilantə mbwar Hyel, Hyel ata hilantə ni tsuwa. Kamnyar mbwar Hyel an ɓɗakkarkara, tsuwa giri an mbwar Hyel ni.

¹⁸Mda aɗiya pwaktə kərni wa. Ma mdə laga aɗi akwa nca giri na akwa dzama abbər tsa ɗəɗu akwa zaman ngəni, ka tsa namtə kərni apa tsa caku, kamnyar ka tsa ndzi ɗəɗu.

¹⁹Kamnyar ɗəɗukurər duniya ngəni an cakukur akəma Hyel. Kamnyar rəbutə rəbutari akwa kakaɗər Hyel abbər, “Hyel ana ngkəgəi mji na ɗəɗu akwa kwasherikurər ɗa.”

²⁰Ka jaktə pəla akwa vəi damwa abbər, “Mthlaku asəndə dzamər mji na ɗəɗu, abbər da kula ampani.”

²¹Apani mda aɗiya gaya ata kəra mdə wa! Kamnyar shanga ɗa an ar giri,

²²wala an Bulus, wala an Apollos, wala an Bitrəs, wala an duniya, wala an mpika, wala an mta, wala an suayeri na kulini, wala an suayeri na akəmazi, shanga ɗa ar giri.

²³Tsuwa giri an ar Kristi, antə Kristi tsuwa tsa ar Hyel.