Read bura-pabir 1 Korinthli 4 Bible Online

1 Korinthli 4 - bura-pabir bible

1 Korinthli 4

¹Ka giri kətə yeru apa mjir kəthlər aka Kristi, natə Hyel ku na ɗa wakilkur ata kəra sur ashirayeri arni.

²Tsuwa su tə mda ana bara akəla wakilayeri, abbər ka da ndzi ka jirkur.

³Amma arna, wala giri, wala mjir shariya laga, an ata hara ali shariya, I akwa wula abbər shang ampaniyari aɗi wa. I ma I aɗi ana hara shariya aka kərna wa,

⁴kamnyar I aɗi səndə biku tə I hara wa, amma tsuwa ngəni aɗi ncanta abbər I kula biku wa. Mthlaku an ata hara shariya ali.

⁵Antə apani giri aɗiya huvə thlamta shariya ata kəra mda akəmata sakari ahara wa. Sək giri, tar ma Mthlaku ku si. Tsa an ata sə ncaɓəla suayeri na ɗuwarɗuwarari shang akwa vəi parakəu, ka kəlar su na akwa ɗəffa mda. Sakanda antə Hyel ata hamta huwa aka waskəi kalkal ka hararni.

⁶Maɗaməma, I ngkərtə kəthlər ala giri ka Appolos ka iya ka kəri ni kamnyar dlar giri, kamnyar ka giri mzhi thliptə su, ta giri a təramta su na ku rəbutədzi akwa kakaɗər Hyel ni. Kamnyar ta mdə laga akwa nca giri asə haptə kərari akwa gaya ata kəra mdə pal kazhar nvwani.

⁷Kamnyar wan hara tə gə təramta nvwa nga ka su nə ri? Man tə gə kəgari natə aɗi Hyel an na ala gə wa ri? Ka ma Hyel an na ga, kamnyar mi tə ga akwa gaya apa aɗi Hyel an cauta ala gə wa nə ri?

⁸Giri ku kurtə wutə shanga su tə giri akwa turari! Giri ku kurtə ndzi mjir gəna! Giri ku ndzi kuthlyayeri amma ar yeru, yeru aɗi suma wa! Apa ka namtə giri ka giri ndzi kuthli kasha, ka mburu hara kuthlikur ni ata kəma duku kəga giri!

⁹Kamnyar akwa wutərna, Hyel ku ncanta ata bəbal abbər yeru na aposəlayeri ni an aghəl ta shang, apa mji tə mdə ku thlamta ala ɗa shariyar mta. Kamnyar yeru ku ndzi sur wula aka duniya, ka aka mjirthlentərhyel, ka aka mji tsuwa.

¹⁰Kamnyar yeru ku ndzi apa cakwayeri kamnyar Kristi, amma giri namtə kər giri apa giri an ɗəɗu akwa Kristi! Yeru mtathlaku, amma ar giri, giri ka duna! Mji akwa wul giri ka daraja, amma ar yeru, mji akwa taratə yeru!

¹¹Har akwa saka ngəni yeru tsu ka mi ka thləli, dasa an adzə yeru, mji akwa dlaɓu yeru, tsuwa yeru aɗi ka kəi wa.

¹²Yeru an akwa kəthlər ka kəra yeru. Ma mji ku nggəl yeru, yeru ana kiɗa ala ɗa barka. Ma mji ku hara bwani ala yeru, yeru ana nggita!

¹³Ma mji ku mnya ɗimi ata kəra yeru, yeru ana kiɗə kəra ɗa ka da zhari. Yeru ku ndzi apa mzhiku. Har ka vədza aka pci na ashina yeru ndzi apa diɗər su ar duniya ni.

¹⁴I aɗi akwa rəbutə su ngəni ala giri kamnyar ka giri ləkwa səli wa, amma kamnyar kəi tsaktə giri, giri na ndzi apa maɗa'na natə I hirhir ni.

¹⁵Kamnyar wala ma giri an ka mji dəpu kuma na akwa thlipa ala giri ata kəra Kristi, giri ka tədda duku daci na abwar mambəla. Kamnyar I baɗitə ndzi təddar giri atar ngkər ala giri labar na msəra ni.

¹⁶Antə I akwa kiɗa akəla giri abbər ka giri nu surhararna.

¹⁷Kamnyar ngəni antə I akwa thlenta ala giri Timothli, ɓzərna natə I hirhira, na ka jirkur akwa Mthlaku. Tsa ata ɗangta ala giri laku tə I ndzəndzi akwa Kristi Yesu, apatə I ana thlipa akwa kəlara ikələziya tə I ku mwari akwa.

¹⁸Mji laga akwa nca giri ku ləkwa hara kər olkur, da kəta abbər I aɗi ata jaktə ngka adzə giri wa.

¹⁹Amma ma Mthlaku ku hira, aɗi ata fəi wa, I ata jaktə ngka adzə giri. Antə I ata nggaɓəla wala mji ngəni hir gaya ni, akwa gaya ndzang ata mnya ɗa, nənga da ka duna laga ri.

²⁰Kamnyar Hyel ana ncanta abbər tsa akwa kəthlər ka mdə ni aɗi atar mnya ndzang wa, amma atar kəthlər ka duna.

²¹Antə man tə giri carɓəla ri? Kəi mwari ala giri ka zwal nənga, kəi mwari ka hirkur ka tsuwa hangkalkur ri?