Read bura-pabir 1 Korinthli 5 Bible Online

1 Korinthli 5 - bura-pabir bible

1 Korinthli 5

¹Jiri mji akwa ngkərari abbər mji laga aɗi akwa nca giri na akwa hara karwakur, har ma jili karwakur na ata hara cika aka mda, natə wala mji na kərɗi aɗi akwa hara su apani wa. Kamnyar I nggata abbər har mdə laga akwa pi ka mwalar baba'ni.

²Antə har ma giri akwa gayari! Ai kuji ka ɗəffa giri ɓza ata kəra su apani, ka giri kədləɓəla jili mda apani akwa nca giri.

³Kamnyar wala tə I aɗi adzə giri ka kəri wa, tsu hangkali adzə giri. Antə apa I anda adzə giri kasha, I ku kurtə thlamta shariyarna ata kəra jili mda apani

⁴akwa thləma Mthlakər mburu Yesu. Antə ma sakatə giri ku tsaptədzi ata kəma duku, I ata ndzi akwa nca giri akwa mambəla, ata kəma duku ka dunar Mthlakər mburu Yesu.

⁵Antə ka giri hamta mdə ngəni aka Shatan, ka tsa ɗar bwani, kamnyar ka mambələrni sə mbantədzi akwa vir tə Mthlaku ata hara shariya.

⁶Gaya tə giri akwa harari ni aɗi msəra aka thləm wa. Giri asənda abbər yist raka andər mbikantə shanga mpur hər buradi wa ya?

⁷Fwaɓəla gir yist na halhalari ni, atar kələmta mdə ngəni kəmanggar akwa nca giri ni. Antə giri ata sə ndzi kəcəkəcari ndəlang. Apani antə giri ata ndzi apa mpu hərhəra na bilən, kula yist, kamnyar an laku tə giri akwa hwatu. Kamnyar Susəmər Fəlɓəla Kəi ar mburu an ɗəmhəɗəmhari. Kamnyar mdə ku kurtə hamta saɗakar ɓzər gam ar Kucalər Fəlɓəla Kəi ni kamnyar mburu, watau tsa na Kristi.

⁸Antə mbura hara kucalər mburu, aɗi ka buradi na fəifəyari ar kəmanggarkur ka ɗimikur wa, amma ka buradi bilən na kula yist, watau buradi ar pəla jirkur ka jirkur.

⁹I ku rəbuta ala giri akwa wasikarna abbər giri aɗiya paktədzi kəga mjir hara karwakur wa.

¹⁰I aɗi akwa gari ata kəra karwakur tə mji na kula hamta jiri akwa harari wa, wala ata kəra mjir mbulamkur, wala mjir thla laku, wala mjir nu haptu wa, kamnyar ma ku ndzi apani, ata ndzi dwali ka giri ləɓəla akwa duniya ni.

¹¹Amma su tə I akwa pəlari an abbər giri aɗiya paktədzi ka mdə na akwa pəla tsa mdər nuwa, amma tsa akwa ləka, wala mbulamkur, wala nu haptu, wala nggəl mda, wala wika, wala thla laku wa.Wala susəm ma giri aɗiya səm ka jili mda apani wa.

¹²Kamnyar aɗi kəthlərərna kəi hara shariya aka mji na aɓəla wa. Ai tar mjir ikələziya antə giri ata hara shariya ala ɗa.

¹³Hyel an ata sə hara shariya aka mji na aɗi akwa ikələziya wa. Amma ka giri kədləɓəla mdə na kəmanggar akwa nca giri ni.