Read bura-pabir 1 Korinthli 6 Bible Online

1 Korinthli 6 - bura-pabir bible

1 Korinthli 6

¹Ma mdə laga akwa nca giri akwa bara mwantə nvwa ni na Krishan akəma mjir shariya, aɗi sur səli wa ya ma tsa burkatə ni akwa mbwar shariya akəma mji na aɗi Krishan wa, ata vəya mji na Krishan?

²Giri aɗi sənda abbər mjir Hyel an ata sə hara shariya aka duniya wa ya? Antə ma giri an ata sə hara shariya aka duniya, man ta ngkatə ta giri amzhi hara shariya ata kəra suayeri na raka raka apani ri?

³Giri aɗi sənda abbər mburu ata sə hara shariya aka mjirthlentərhyel wa ya? Zhar ka suayeri na ku tsəkwar ndzəndziyir giri akwa duniya ni ya!

⁴Ma giri ka damitədzayeri raka raka apani, kamnyar mi tə giri ana mwanta akəma mji tə ikələziya aɗi səndə darajar ɗa wa ri?

⁵I pəla gari ngəni kamnyar ka giri nggatə səli. Nənga mda aɗi na ɗəɗu wala duku akwa nca giri na amzhi namtə daɓwa nvwa giri wa ri?

⁶Amma təng mdər nuwa akwa burkatə mdər nuwa nvwa ni, har ma akəma mji na aɗi mjir nu wa!

⁷Ai burkatə nvwa giri ni ma shang sur daɓwi giri. Kamnyar mi tə giri ahir ka giri an təri wa ri? Kamnyar mi tə giri amzhi mbwi ɗəffa giri ka mdə zambatə giri wa ri?

⁸Amma təng giri ka kəra giri akwa hara ɗimikur ka zambatə nvwa giri, har wala aka maɗama' giri.

⁹Giri aɗi sənda abbər mjir hara ɗimikur aɗi ata wutə kuthlikurər Hyel wa ya. Giri aɗiya pwaktə kər giri wa diya. Kamnyar mjir hara karwakur, wala mjir nu haptu, wala mjir ləka, wala mji shili na ana namtə kərɗa apa mdə mwala, wala mji na ana pi ka sal nvwa ɗa,

¹⁰wala mjir həla, wala mjir mbulamkur, wala mjir wika, wala mjir nggənggəl su, wala mjir thla laku, aɗi ata ləkwa kuthlikurər Hyel wa.

¹¹Waci mji laga akwa nca giri ku ndzi apani. Amma mdə ku kəcimta giri, ka namtə giri ɓɗakkarkara. Mdə ku namtə giri kula biku akəma Hyel akwa thləma Mthlaku Yesu Kristi ka Mambələr Hyelər mburu.

¹²I ata mzhi pəla, “Mdə ku hira ali kəi hara kəlara su tə I hira.” Amma aɗi shanga su an ka dlar wa. I ata mzhi pəla, “Mdə ku hira ali kəi hara kəlara su tə I hira.” Amma I aɗi ata hir ka kəlara su namtə ra mafarni wa.

¹³Nuhum mdə laga asə pəla, “Mdə hara susəma ka kəra kuta, ka vəi kuta ka kəra susəma.” Ngəni jiri, wala tə vir laga Hyel ata sə pumta ɗa japu. Tsuwa Hyel aɗi nam dza mdə kamnyar karwakur wa, amma kamnyar hara kəthlər aka Mthlaku, antə Mthlaku ata tsəlpitə dza mburu ni.

¹⁴Hyel ku thlentə Mthlaku akwa ntəmta, antə tsa ata sə thlentə mburu tsuwa atar dunarni.

¹⁵Giri aɗi sənda abbər dza giri an bwayeri ar dza Kristi wa ya? Antə kalkal ka mdə kətə dzari na ndzi apa bwa laga ar dza Kristi ni, ka paktə ni ka karwa ya? Hun, ahara wa!

¹⁶Nənga giri aɗi sənda abbər mdə na ku paktə dzari ka karwa, ku ndzi dza duku ka tsa wa ri? Kamnyar rəbutə rəbutari akwa kakaɗər Hyel abbər, “Da suɗə ni ata ndzi dza duku.”

¹⁷Amma mdə na ku paktədzi ka Mthlaku ku ndzi duku ka tsa akwa mambəla.

¹⁸Hwi gir ta karwakur! Kəlara biku damwa tə mda ana hara aɗi ana tsəkwar dza mdə wa. Amma mdər hara karwakur akwa hara bikər ɓzamtə dzari surni.

¹⁹Giri aɗi sənda abbər dza giri an mbwar Mambəl na Ɓɗakkarkara, na akwa dza giri, natə Hyel an hamta ala giri wa ya? Tsuwa aɗi giri an mthlakər dza giri nə wa.

²⁰Kamnyar mdə masmas giri ka kwaba laga hang. Antə ka giri nar səli aka Hyel ka dza giri.