Read bura-pabir 1 Korinthli 7 Bible Online

1 Korinthli 7 - bura-pabir bible

1 Korinthli 7

¹Kulini ata kəra suayeri tə giri rəbutə ni. Jiri, ata hara ɓɗaku mdə sal aɗiya bara mwala wa.

²Amma kamnyar ngkatə karwakur, ka waskəi ndzi ka mwalankiɗa na ar kərari surni, mwala tsuwa ka tsa ndzi ka salngkiɗa na ar kərari surni.

³Ka sal ni kuri wujir na ar salkur aka mwalankiɗa, tsu apani tsuwa antə ka mwala ni hara aka salngkiɗa.

⁴Mwala aɗi an mthlakər dzari surni wa, amma salngkiɗa an mthlakari. Tsu apani tsuwa, sal aɗi an mthlakər dzari surni wa, amma mwalankiɗa an mthlakari.

⁵Mda aɗiya ngkatə kərni aka nvwa ni wa, tar ma su laga aɗi ola tə giri ata ndzi ka mnya giri duku ata kər mnyar saka laga raka, ka giri wutə saka na rakər su kamnyar hara adduwa. Aghəla nda ka giri jaktə kəɓa, kamnyar ta Shatan asə ngkərtə giri ata kəra tur mbwiɗəffu ar giri.

⁶Ngəni sauri antə I akwa hamta ala giri, aɗi tsawu wa.

⁷I tur abbər shanga mji ata mzhi ndzi apa iya. Amma waskəi ka cautərni zum tə Hyel hamta alari, mdə laga jili ngəni, mdə laga jili damwa.

⁸Ata kəra mji na aɗi kəldzi wa, ka kughungayeri, I akwa pəla abbər ata təramta ala ɗa ma da ata ləkəma ka ndzi shiɗa tsu apa iya.

⁹Amma ma da aɗi ata mzhi ɓəlatə kərɗa wa, kuji ka da kəldzi. Kamnyar ata hara ɓɗaku ka mdə kəldzi ta dza ga athlata kamnyar nggukari.

¹⁰Amma ma mji na ku kəldzi, I akwa hamta ala giri tsawu ngəni, aɗi thlata akəli wa, amma Mthlaku an pəla, abbər, mwala aɗiya ndəka ka salngkiɗa wa.

¹¹Amma ma tsa ku təra kazhar salngkiɗa, ka tsa ndzi shini, ma apani wa ka da jaktə shwalatədzi ka salngkiɗa. Tsuwa sal ni aɗiya psi mwalankiɗa wa.

¹²Aka mji na ku mbili tsuwa, I mzhi ɗangtə su tə Mthlaku pəla ata kəra giri wa. Su tə I ata mzhi harari an kəi hamta ala giri sauriyirna, abbər, ma mwalankiri aɗi Krishan wa, amma tsa ku hir ka giri ndzəndzi ka tsa, to ga aɗiya ndək ka tsa wa.

¹³Tsuwa gə na mwala ni, ma salngkiri aɗi krishan wa, amma tsa ku hir ka giri ndzəndzi ka tsa, to ga aɗiya nggəlar ni wa.

¹⁴Kamnyar Hyel ata namtə salngkiri na aɗi Krishan wa ni ka tsa ndzi pal akwa nca mjirni atar hir tə gə ndzi mwalankiɗa ni. Tsuwa tsa ata namtə mwalankiri na aɗi Krishan wa ni ka tsa ndzi pal akwa nca mjirni atar hir tə gə ndzi salngkiɗa ni. Kamnyar ma apani wa maɗa' giri aɗi ata ndzi kəcəkəcari akəma Hyel wa. Amma ngəni kulini da kəcəkəcari.

¹⁵Amma ma salngkiri wala mwalankiri na aɗi Krishan wa, an ndzangkir abbər ka giri ndəka, to giri ata mzhi ndəkəmtadzi. Akwa laku na ngəni, gə na sal ni wala mwala ni msərmsərari. Kamnyar Hyel akwa bara ka mburu ndzəndzi akwa msərakur.

¹⁶Gə na mwala ni, ga aɗi sənda abbər ga ata mzhi mbantə salngkiri wa ya? Tsuwa gə na sal ni, ga aɗi sənda abbər ga ata mzhi mbantə mwalankiri wa ya?

¹⁷Ka waskəi ləkəma ka ndzəndzi akwa kəlara laku tə Mthlaku vəi nga akwa, ka gə ndzi tsu akwa laku tə Hyel kəga nga akwa ntangkəma. Ngəni an tsawu tə I hamta aka shanga ikələziyayeri.

¹⁸Ma ga ku kurtə thla kaciya təng akəmata ga ndzi Krishan, to ga aɗiya bara shamta manjivarari wa. Tsuwa ma ga aɗi ka kaciya akwa sakatə gə ndzi Krishan wa, to ga aɗiya bara thla kaciya wa.

¹⁹Kamnyar ndzi ka kaciya wala ndzi kula kaciya aɗi an su na olari wa. Su na olari an ka mdə ɓəlatə tsawayeri ar Hyel.

²⁰Apani, ka gə ndzi tsu akwa laku tə ga akwa, sakatə Hyel kəga ngə ni.

²¹Ma sakatə Hyel kəga ngə ni, gə mafa, to ga aɗiya damitədzi wa. Amma ma ga an ata wutə lakur msərantədzi, to kəthlər ka saka ni ka gə msərantədzi.

²²Kamnyar ma gə mafa akwa sakatə Mthlaku kəga nga, kulini gə msərmsərari akwa Mthlaku. Tsu apani tsuwa, ma gə msərmsərari akwa sakatə Mthlaku kəga nga, kulini ga ku ndzi mafar Kristi.

²³Hyel masmas giri ka kwaba na hang, antə giri aɗiya ndzi mafar mji wa.

²⁴Apani kəlara laku tə ga akwa sakatə Hyel kəga nga, ɓzərma'na, ka gə ndzi tsu akwa, akwa mwardzi ka Hyel.

²⁵Kulini ata kəra maɗadakwi kəga maɗankwi na aɗi ɗar kəldzi wa, I aɗi ka tsawu na thlata akəla Mthlaku wa, amma I akwa pəla dzamər na, apatə akwa barkar Hyel I mdə natə mdə ku mbərsa ka iya.

²⁶I akwa wula abbər akwa laku tə su mwavər ala mburu kulini ni, ata hara ɓɗaku ka giri ndzi tsu akwa laku tə giri akwa ni.

²⁷Ma gə ka mwala, ga aɗiya bara ka giri ndəkə wa. Tsuwa ma ga aɗi ka mwala wa, ga aɗiya bara kəl mwala wa.

²⁸Amma wala ma ga an ata kəl mwala, aɗi ɗimi wa. Tsuwa wala gə na ɓzərngkwa ni an ata kəl sal, aɗi ɗimi wa. Amma mji na ku kəldzi ata ɗar bwani, tsuwa arna, I akwa bara kəi ndəkəmta nga ta bwaniyayeri ni.

²⁹Su tə I akwa pəlari ni, mjir yeru, an abbər, duniya ni abaka kura. Antə baɗitə kulini, ka mji na ka mwala ndzi apa da aɗi ka mwala wa.

³⁰Ka mji na ka ɗəffə ɓzəɓza ndzi apa da aɗi ka ɗəffə ɓzəɓza wa, mji na ka mji na akwa kucali ndzi apa da aɗi akwa kucali wa, ka mji na ana nggala namta apa su tə da kəgari ni aɗi arɗa wa.

³¹Tsuwa mji na akwa nggatə msərakur sur duniya ni, aɗiya putə hangkala ɗa shang ata suayeri nə wa. Kamnyar laku tə duniya akwa kulini ni, apa tsa aɗi ata fəi kəra wa.

³²I aɗi hir ka giri ndzi ka damitədzi wa. Kamnyar ma mdə na aɗi kəl mwala wa, tsa ana vədzə hangkalari aka kəthlərər Mthlaku, akwa dzama ata kəra laku tə tsa ata namtə ɗəffari.

³³Amma ma mdə na ku kəl mwala, tsa ana dzama atar sur duniya, laku tə tsa ata hara ka mwalankiɗa nggatə msəra.

³⁴Antə apani hangkalari ku ndəkəidzi ka bwa su suɗa. Amma mwala na kula sal, wala ɓzərngkwa, ana dzama ata kəra kəthlərər Mthlaku, laku tə tsa ata hamta kərari, dzari japu ka mambələrni aka Mthlaku. Amma mwala na ka sal, tsa ata dzama ata kəra suayeri na ar duniya, laku tə tsa ata hara ka salngkiɗa nggatə msəra.

³⁵I akwa pəlari apani kamnyar I akwa bara dlar giri. I aɗi akwa bara vəngkər ala giri bwani wa. Amma I akwa bara ka giri namtə ndzəndziyir giri ɓɗaku, ka giri mzhi hamta kəra giri swakti aka kəthlər Mthlaku kula sur ndəkərəmta hangkala giri.

³⁶Amma ma gə wuta abbər ga aɗi akwa hara su na kalkal aka ɓzərngkwa tə ga akwa bara kəlari wa, ma ga ku ngguktə ni ka duna, tsuwa ma ku ndzi dwali, to mwa ka giri kəldzi, apatə ga akwa barari ni. Su aɗi na ɗimi akwa wa.

³⁷Amma ma gə na ku ɗəmha akwa ɗəffa ga abbər ga aɗi ata kəl mwala wa, tsuwa aɗi abbər mda an vu ngə wa, ma ga ata mzhi nggyari nggukərni ɓɗaku, to ku təramta ala ga ma gə zhar kəl mwala ni.

³⁸Apani kalkal ka mdə na kəl mwala,[2] amma na təramtari an mdə na aɗi ata kəl mwala wa.

³⁹Mwala aɗi ata ndəkə ka salngkiɗa wa ma har salngkiɗa ni tsu ka mpika. Amma ma salngkiɗa ku mti, tsa msərmsərari ka tsa kəl kəlara mdə tə tsa hira, wala tə tar ma mdə ni Krishan.

⁴⁰Amma akwa wutərna, mwala ni ata nggatə msərakur ndzəndziyirni ma tsa ndzi tsu apani. Tsuwa akwa wutərna I ka Mambələr Hyel.