Read bura-pabir 1 Korinthli 8 Bible Online

1 Korinthli 8 - bura-pabir bible

1 Korinthli 8

¹Kulini, ata kəra susəma tə mdə ku hamta aka haptu. Jiri, mburu ku sənda abbər shanga mburu ka səndər su ata kəra su ngəni. Amma səndər su ana hara ka mburu haptə kəra mburu, amma ar hirkur tsa ana namtə su.

²Ma mdə laga akwa dzama abbər tsa asəndə su, har ba kulini tsa aɗi səndə su apatə kalkal ka tsa səndə wa.

³Amma kəlara mdə na ana hir Hyel, Hyel asəndə ni.

⁴Antə ata kəra səm susəma natə mdə ku hamta aka haptu ni, mburu asənda abbər haptu aɗi jiri wa. Tsuwa su tə mburu sənda an abbər Hyel an duku, damwa aɗi wa.

⁵Suayeri laga aɗi amtazi ka akwa duniya nggwa tə mda ana kəga ɗa “hyelayeri.” Kamnyar jiri, mji laga aɗi na akwa vəngkər səli aka hyelayeri hang ka mthlakayeri hang.

⁶Amma ar mburu tsu Hyel duku an aɗi. Watau tsa na Tədda, natə shanga su thlata akəlari, tsuwa natə mburu akwa ndzi kamnyar ni, tsuwa Mthlaku duku, Yesu Kristi, natə shanga su wutədzi atar ni, tsuwa natə atar ni antə mburu ndzi ka mpika.

⁷Amma aɗi shanga mji an asəndə suayeri ngəni wa. Mji laga ku tsəli ka kəta abbər haptu aɗi jiri, antə kəlara sakatə da ku səm susəm natə mdə ku hamta aka haptu, da ana kəta abbər da akwa vəngkər səli aka haptu ni. Apani kamnyar tə hamta jirər ɗa tsu raka, da ata nggari apa da ku ndzi adiya.

⁸Amma susəma aɗi ata mzhi namtə daɓwa mburu ka Hyel wa. Wala mburu aɗi səm wa, mburu aɗi ata kəmtadzi wa, tsuwa wala mburu an səma, mburu aɗi ata jakə wa.

⁹Amma ka giri hara hangkal ta msərmsərkur tə giri wutə ni asə vu ka mji na ka hamta jirər ɗa raka sə ngka ka bwahili.

¹⁰Kamnyar ma mdə na ka dzamərni raka ku wutə nga, gə na asəndə su ni andzəndzi akwa vəi səm susəma akwa mbwar haptu ni, aɗi ata vu ni ka tsa səm susəm tə mdə hamta haptu ni tsu wa ya?

¹¹Apani ga akwa hara ka ɓzərma' nga na ka hamta jirərni raka, natə Kristi ku mti kamnyar ni ni, hilantədzi kamnyar səndə sur nga!

¹²Apani kəlara sakatə giri akwa hara biku aka ɓzərma' giri, atar vu ɗa ka da hara su tə da mbərsa abbər aɗi kalkal wa, giri akwa hara biku aka Kristi.

¹³Apani ma su tə I ata səmari ata vu ka ɓzərma'na hara biku, I aɗi ata jaktə ɓɗə kum kəra wa, kamnyar I aɗi ata hir hara su na ata dəkəi ɓzərma'na wa.