Read bura-pabir 1 Korinthli 9 Bible Online

1 Korinthli 9 - bura-pabir bible

1 Korinthli 9

¹Arna I aɗi msərmsərari wa ya? Arna I aɗi aposəl wa ya? Arna I aɗi wutə Yesu na Mthlakər mburu wa ya? Aɗi kamnyar kəthlərərna antə giri hamta jiri aka Mthlaku ni wa ya?

²Wala ma aka mji damwa I aɗi aposəl wa, ai ala giri I an aposəl. Kamnyar giri ka kəra giri an akwa ncantə kəthlərərna ar aposəlkur akwa Mthlaku.

³Ngəni an amsa tə I ana hamta aka mji na akwa bara ngkərtə ra.

⁴Aɗi kalkal ka mdə na ala yeru susəm kamnyar kəthlərər yeru wa ya?

⁵Aɗi kalkal yeru mwa ka mwalar yeru na ka hamta jiri, apatə aposəlayeri damwa, ka maɗama' Mthlaku, ka tsuwa Bitrəs, akwa harari wa ya?

⁶Nənga təng yeru ka Barnabas shi yeru, antə ndzi ala yeru dwali ka yeru hara kəthlər kamnyar vəi kər yeru ri?

⁷Wa andər hara kəthlər ar Sojakur gapani kula mdə ntə nə ri? Wa andər ncimta nfwa kula tsa ata səm yarni ri? Wa andər vəi ciɓa kula tsa sa uwar ɗa ri?

⁸Nənga təng I an akwa pəla su na msəra aka mnyi daci ri? Tsawa aɗi pəla tsu apani wa ya?

⁹Kamnyar rəbutə rəbutari akwa tsawur Musa abbər, “Ga aɗiya hartə mnya thlar tsuhwa akwa sakatə tsa akwa dəka ala gə mthli wa.” Thlayeri ni daci antə Hyel akwa damitədzi ata kər ni ya?

¹⁰Tsa aɗi akwa gari ni shang kamnyar mburu wa ya? Ai tsa rəbutə su ni kamnyar mburu dzaku. Kamnyar mdər kukula ka mdər dəkə mthli, japwa ɗa ana hara kəthlər ni ka vəkər abbər japwa da ata sə wutə nəɓwar ɗa akwa sur fakə ni.

¹¹Ma yeru ku thləkamta hwulfə na abwar mambəl akwa ɗəffa giri, ku ndzi wawa tsu ya, ma yeru ata wutə susəm na abwar dza akəla giri?

¹²Ma har mji laga aɗi na akwa wutə suayeri apani akəla giri, ai ɓɗakkurari ka yeru wutə na təramta arɗa ni. Amma yeru aɗi damitədzi ata kəra su ngəni wa. Yeru ku nggitə shanga su, ata vəya səntə su na ata sə ngkatə kəthlər ngkər labar na msəra ar Yesu ni.

¹³Giri aɗi sənda abbər mji na ana kəthlər akwa mbwar vəngkər səli ni ana wutə susəmər ɗa tsu akwa mbwar vəngkər səli wa ya? Ai wala mji na ana hamta saɗakayeri ata bagaɗi ni ana wutə bwar ɗa akwa saɗakayeri ni.

¹⁴Tsu apani tsuwa, Mthlaku ku tsawa abbər ka mjir ngkər labar na msəra ni wutə susəmər mnya ɗa atar ngkər labar ni.

¹⁵Amma I aɗi hir kəthlər ka laku ngəni wa, tsuwa I aɗi akwa rəbutə wasika ngəni kulini kamnyar kəi wutə wa. Kamnyar kuji kəi mta, ta mdə laga asə ngkata ali lakur gaya ata kəra ngkər labar kula dlu ntə ni.

¹⁶Wala apani, ngkər labar ni aɗi su laga tə mda gayari wa, kamnyar tsa su na ku ndzi dwali kəi hara. Tsuwa ata ndzi sur kətadza ali, ma I aɗi ngkər labar na msəra nə wa.

¹⁷Kamnyar ma I an akwa hara kəthlər ni ka hirər ɗəffi, mda ata ntəmta ali watsəɓərna. Amma aɗi ka hirər ɗəffi wa, kamnyar mda an vu ra.

¹⁸Ka ma apani, man watsəɓərna ri? Watsəɓərna an ma I ata ngkər labar na msəra ni, kəi ngkər labar ni cauta. I aɗi akwa bara kəi wutə msərmsərkur dzau akwa hara kəthlər ngəni wa.

¹⁹Kamnyar wala tə I aɗi akira mji wa, I ku namtə kərna apa mafa aka shanga mji, kamnyar tsu nggwa kəi mzhi ndəkərtə mji hang aka Kristi.

²⁰Ma sakatə I adzə mjir Yahudi, I ana ndzi apa mdər Yahudi, kamnyar kəi mzhi ndəkərtə mjir Yahudi ni aka Kristi. Ma sakatə I adzə mjir nu tsawur mjir Yahudi, I ana nu su tə mdə pəla akwa tsawu ni, wala tə I aɗi akira tsawu nə wa. I ana hara apani ni kamnyar kəi mzhi ndəkərtə mji na akira tsawu ni aka Kristi.

²¹Ma sakatə I adzə mji na aɗi akira tsawu wa, I ana ndzi apa mdə na aɗi akira tsawu wa, kamnyar kəi mzhi ndəkərtə ɗa aka Kristi. Amma ngəni aɗi ncanta abbər I akwa rutə tsawur Hyel wa, kamnyar I akwa nu tsawur Kristi.

²²Ma sakatə I adzə mji na ka hamta jirər ɗa raka, I ana ndzi apa mdə na ka hamta jirərni raka, kamnyar kəi mzhi ndəkərtə ɗa. Apani I ku kəɗar kəi ndzi apa mji, akwa hara shanga su, kamnyar kəi mzhi mbantə mji akwa nca ɗa.

²³I akwa hara shanga suayeri ngəni kamnyar labar na msəra ni, kamnyar kəi sə wutə nəɓwarna akwa barkayeri tə mda ana wuta akwa ni.

²⁴Giri aɗi sənda abbər akwa gyalər akəlakəlar hwi, shanga mjir hwi ni ana bara ka da dlu kəma akəla nvwa ɗa wa ya? Amma ai mdə duku daci andər səma ka wutə watsəɓari ni? Antə hwihwi giri ka giri səma.

²⁵Shanga mjir gyali ana ɗiɓəla kərɗa akwa shanga su, kamnyar ka da sə wutə watsəɓa na ana hilantədzi, amma ar mburu watsəɓər mburu aɗi ana hilantədzi wa.

²⁶Apani I aɗi ana hwi gagaga wa, tsuwa I aɗi ana tsa su apa mdər tsa shambar wa.

²⁷Amma I ana ɗiɓəla dzi, ka namtə ni apa mafarna, kamnyar ta aghəla sakatə I ku kuri ngkər labar aka mji damwa, mda asə nggəlar ra abbər I ka kəri ni aɗi hara kalkal wa.