Read bura-pabir 2 Korinthli 1 Bible Online

2 Korinthli 1 - bura-pabir bible

2 Korinthli 1

¹Wasika ngəni thlata akəli I na Bulus. Hyel ku carɓəla ra kəi ndzi mdərthlentər Kristi Yesu, atar hirər Hyel, ka ɓzərma' mburu Timothli, I akwa rəbuta ala giri, giri na ikələziyar Hyel na ahar Korinthli, ka shanga mji na ɓɗakkarkara akwa shanga tsəɗi Akaya.

²Ka Hyel na Təddar mburu, ka Mthlaku Yesu Kristi, hara ala giri ɓɗakkur, ka tsa na ala giri msərakur.

³Ka mburu usar Hyel na Təddar Mthlakər mburu Yesu Kristi, Tədda na ana kətadzə mda, natə shanga shiktədzi ana thlata akəlari!

⁴Tsa andər shiktə mburu akwa shanga bwaniyayeri na wutə mburu, kamnyar ka mburu mzhi shiktə mji damwa na akwa bwaniyayeri, ka jili shiktədzi tə Hyel hara ala mburu ni.

⁵Kamnyar apatə mburu akwa ɗar jili bwaniyayeri tə Yesu ɗari ni, antə atar Kristi tsuwa mburu ata sə wutə shiktədzi na ola akəla Hyel.

⁶Wala ma yeru akwa ɗar bwani ni, yeru akwa harari kamnyar ka giri wutə shiktədzi ka wutə mbantədzi. Kamnyar kəlara sakatə mdə ku shiktə yeru, kula nuhum yeru ata shiktə giri tsuwa. Atar apani antə giri ata mzhi mbwi ɗəffa giri, ka giri nggitə jili bwani tə yeru akwa ɗarari ni.

⁷Giri aɗi ɗar vu yeru akwa sur səli wa. Antə yeru asənda abbər apatə giri akwa ɗar jili bwani tə yeru akwa ɗarari ni, Hyel ata sə shiktə giri tsuwa tsu apatə tsa akwa shiktə yeru ni.

⁸Maɗaməma, yeru aɗi akwa bara ka giri ndzi kula sənda ata kəra bwani tə yeru ɗari akwa tsəɗi Asiya nə wa. Kamnyar bwani ni ku təra kərathla yeru, har yeru ku psəmta kəra yeru abbər yeru aɗi ata ndzi ka mpikə kəra wa.

⁹Jiri, har yeru akwa nggari apa mdə ku kurtə thlamta ala yeru shariyar mta. Amma ngəni an kamnyar ncanta abbər yeru aɗiya mbərsa ka duna yeru wa, amma ka yeru mbərsa ka Hyel na ana thlentə mji na ku mti.

¹⁰Apani Hyel ku kəɓəla yeru akwa asar ar mtə na mwavərari, tsuwa tsa akwa ləkəma ka msərantə yeru. Yeru akwa vəkər ka tsa abbər tsa ata jaktə msərantə yeru.

¹¹Usa, ka giri dlar yeru ka adduwa. Kamnyar atar apani antə mji hang ata sə usar Hyel kamnyar barkayeri tə yeru wuta atar adduwayeri ar giri.

¹²Yeru ata mzhi gaya ata kəra su na akwa ɗəffa yeru ka hangkala yeru pwipwiyari, abbər yeru ku mwa akwa kəcəkəcəkur ka jirkur akwa duniya ni, apa sakatə yeru akwa nca giri. I ata mzhi hara su ngəni akwa jirkur akwa daɓwa yeru ka Hyel. Tsuwa yeru mzhi hara ngəni atar ɓɗakkur tə tsa hara ala yeru ni, amma aɗi atar ɗəɗukur ar mdə wa.

¹³Yeru akwa rəbuta ala giri su tə giri ata mzhi karatari ka nggaɓəla ata bəbal, su aɗi na zhimzhim akwa wa. I ku mbərsa abbər giri ata nggaɓəla yeru karkar,

¹⁴wala ma giri an kuri nggaɓəla yeru kulini wa. Kamnyar ma vir tə Mthlaku ku si ka giri gaya ata kəra yeru, apatə yeru akwa gaya ata kəra giri kulini ni.

¹⁵I ku mbərsa abbər giri ata nggaɓəlari, tsuwa I ku mbərsa ka hamta jirər giri, antə apani I akwa bara kəi mwari adzə giri ntangkəma, kamnyar ka giri wutə barka kəma suɗa.

¹⁶Kamnyar I akwa bara kəi nu atar giri ma sakatə I akwa ləhar Makidoniya ni, tsuwa ma sakatə I akwa ngka kəi jaktə nu atar giri, ka giri sə pwarɓəla ra akwa ngkarna ahar Yahudiya.

¹⁷Giri akwa wula apa I akwa hara su kula dzam wa? Nənga giri akwa wula apa I ana ɗəmhədzərna apa mdə ndzang na ana pəla “I” ka “Awa” ata saka duku ri?

¹⁸Apatə Hyel ka jirkur, apani tsuwa yeru aɗi ata dingngga pali mnyari yeru gagaga wa, ma su tə yeru ku pəla “I” yeru aɗi ata jaktə pəla “Awa” wa.

¹⁹Kamnyar Yesu Kristi na ɓzər Hyel, tə Iya, ka Sila,[1] ka Timothli, akwa ngkər ala giri ata kər ni, aɗi ana pali mnyari wa. Ma tsa ku pəla “I” tsa aɗi ata jaktə pəla “Awa” wa. Tsuwa arni “I” an aɗi tədəku.

²⁰Kamnyar atar ni antə shanga alkawalayeri tə Hyel hara ni ku nghyaɓəladzi cipcippu. An su na hara tə mburu ana pəla “Amin” ka hamta jiri abbər su ni ata hara jiri, ka haptə səliyir Hyel ni.

²¹Hyel surni an akwa dunautə yeru, ata kəma duku kəga giri, kamnyar ka mburu mzhi thləthlatə gyang akwa Kristi. Tsuwa tsa an carɓəla mburu ka vu mburu akwa kəthlər ni.

²²Tsa ku vətə seɗarni ata mburu kamnyar ncanta abbər mburu an arni, ka hamta ala mburu Mambələrni akwa ɗəffa mburu, kamnyar ncanta abbər jiri tsa ata sə kuri pəli mburu akəmazi.

²³Hyel an seɗarna abbər I akwa pəla jirkur, abbər su na hara tə I aɗi ngka ahar Korinthli wa ni, an kamnyar ta I ajaktə ghərantə giri.

²⁴Aɗi abbər yeru akwa bara ncantə kuthlikur ata kəra hamta jirər gir wa. Awa, yeru akwa bara ka mburu kəthlər ata kəma duku kəga giri, kamnyar ka giri nghyantədzi ka kucali, kamnyar hamta jirər giri an hara tə giri thləthlatə ɓəɓal ni.