Read bura-pabir 2 Korinthli 11 Bible Online

2 Korinthli 11 - bura-pabir bible

2 Korinthli 11

¹I hir abbər ka giri mbwi ɗəffa giri ali, wala I an akwa hara cakukur raka. Usa ka giri kətə kanaɗi ali.

²Kamnyar I akwa səlka kamnyar giri, jili səlkər hirkur na ar Hyel. Kamnyar tə I ku zhutə giri aka Kristi, abbər kəi sə hamta giri kula biku apatə mda ana hamta amaliya kula dlimburkur aka salngkiɗa duku.

³Amma I akwa thlivər abbər, mda ata sə pwaktəmta giri, har ka giri zhar hamta kər giri kəcəkəcari ka jirkur aka Kristi, apatə pwapu ku pwaktəmta Hauwa atar ɗəɗukurərni ni.

⁴Kamnyar ma mdə laga bilən ku si, akwa ngkər ala giri Yesu damwa zum ka natə yeru ngkər ala giri ni, wala tsuwa ma giri ku dlu mambəl laga zum ka natə giri dlu ni, wala tsuwa ma giri ku dlu labar laga na msəra na zum ta natə giri ku dlu ni, ata ndzi abbər giri ana dəɓar dlu su bilən wa!

⁵I aɗi hamta jiri I an raka ta shang akwa nca aposəlayeri na ol'ol nə wa.

⁶Wala ma I an aɗi masəku akwa gari wa, ai I ka səndər su. Shanga suayeri ngəni yeru ku ngkərɓəla ala giri ata bəbal akwa kəlara laku.

⁷Nənga I ku hara biku ri, atar tərghəi kəri abbər ka mdə haptə səliyir giri, sakatə I akwa ngkər ala giri labar Hyel na msəra kula dlu kwabari ni?

⁸I ku fəi mjir ikələziyayeri laga atar dlu kwaba akəla ɗa, kamnyar kəi hara kəthlər akwa nca giri kula kwaba.

⁹Tsuwa sakatə I adzə giri, I ku tur kwaba, amma I aɗi hir damitə giri ata kər wa. Kamnyar maɗaməma na thlata ahar Makidoniya ni ku sənta ali su tə I akwa turari ni. Antə apani I ku hwiyimta vəngkər ala giri kəla, tsuwa I ata ləkəma ka hwiyimtari akwa kəlara laku madi.

¹⁰Apatə jirkurər Kristi ni an akwa ɗəffi, to mda aɗi akwa tsəɗi Akaya ni na amzhi ngkata ali gayar su ngəni wa.

¹¹Kamnyar mə ri? Abbər I aɗi hir giri wa ya? Ai Hyel ku sənda abbər I hir giri.

¹²Antə su tə I akwa harari ni, I ata ləkəma kəgari, kamnyar kəi ngkatə aposəlayeri na akwa bara lakur gaya abbər kəthlərər ɗa kalkal ka ar yeru ni.

¹³Kamnyar jili mji apani aɗi aposəlayeri na jirari wa, amma da mjir kəthlər na ana pwaktə mda, akwa namtə kərɗa abbər da aposəlayeri ar Kristi.

¹⁴Jiri, aɗi sur ndatə wa! Kamnyar wala Shatan ana namtə kərni apa mdərthlentərhyel na ar parakəu!

¹⁵Apani aɗi ata ndzi sur ndata ma mjir kəthlər alari akwa namtə kərɗa apa da mjir kəthlər ar jirkur nə wa. Akwa kurari da ata sə dlu watsəɓa na kalkal ka kəthlərər ɗa.

¹⁶I akwa jaktə pəla abbər, mda aɗiya dzama abbər I caku wa. Amma wala ma giri an dzama apani, to ka giri kəta abbər I caku ni, kamnyar kəi wutə su tə kəi gaya ata kər raka.

¹⁷Akwa kəlara sakatə I akwa hu kərna apani ni, I akwa hara su apa caku, kamnyar aɗi an su tə Mthlaku akwa barari wa.

¹⁸Təng tə mji aɗi hang na akwa gaya ata kəra suayeri tə da harata na ar duniya ni, to I ma, ndzi kəi hara tsuwa.

¹⁹Kamnyar ar giri, giri ɗəɗu swaiswai, har giri ana mzhi mbwi ɗəffa giri ka kucali aka mji na caku!

²⁰Kamnyar giri ana mbwi ɗəffa giri wala ma mdə laga namtə giri ka mafa, wala dlutsə sur giri, wala səm mdəkurər giri, wala nca ala giri olkur, wala tsa giri akwa nggama giri.

²¹Jiri, I ata mzhi pəla, sur səli ali, kamnyar yeru aɗi hara ndagə wa! Amma ma mdə laga aɗi na ata ɓwadzər gaya ata kəra su laga, to I ma, I ata ɓwadzər hara su apani. I ku jaktə ləkwa gari apa caku nda.

²²Kamnyar ma da akwa pəla kamnyar tə da mjir Ibrani, I ma I mdər Ibrani. Ma kamnyar tə da mjir Israila, I ma I mdər Israila. Ma kamnyar da kəkar Ibrahim, I ma I kəkar Ibrahim.

²³Ma da akwa pəla abbər da mjir kəthlər ar Kristi, har ma I ku təramta ɗa! I akwa gari apa mdə na ka cicu. Amma jirkurər su, I ku təramta ɗa ciju akwa kəthlərayeri na ol'ola, mdə ku kəɗar hambwa ra akwa pərsəna təramta ɗa, ka hara ali dlaɓu tə mda amzhi jikatari wa, tsuwa ka hang mda abaka tsi ra.

²⁴Akwa sakayeri zumzum ntəfu mjir kuthlikur ar Yahudi ku vu tə mdə dlaɓu ra ka kwandeng mnyari makkumari ka əmdla.

²⁵Ka makər, mjir kuthlikur ar Rom ku vu tə mdə dlaɓu ra ka kwandeng, ka ndzəndzəhtə ra ka pela ka pal. Tsuwa vir aɗi tə I ɓukci ka kuri viri akwa yimi.

²⁶Tədəku I akwa lənggu, akwa kəɓa ka asar ar mta akwa thlyaghayeri, ka kəɓa ka mjir thla laku. I ku kəɗar ləkwa asar akwa tsiya mjir Yahudi, ka mji na aɗi mjir Yahudi wa. I ku kəɗar kəɓa ka asar akwa bərniyayeri, ka akwa mtakayeri, ka akwa mandayeri, ka ləkwa asar akwa tsiya mji na ana namtə kərɗa apa da mjir nuwa, amma da mjir thlandər.

²⁷I ku fa vəi gərgər ka ɗar bwani, ka ni ka heni aviri aviri. I ku ndzi ka məi ka thləli ka hang. I ku kəɗar ndzi kula susəma, ka ndzi ata shambar kula sur pudza.

²⁸Tsuwa bamnda suayeri damwa, tədək viri I ka kəthlər na kəgəɓu, akwa damitədzi ata kəra shanga ikələziyayeri.

²⁹Kəlara sakatə mdə laga ku kətəi, I ana ndzi apa I an kətə ni. Tsuwa kəlara sakatə mdə laga ku pəramta kazhar lakur Hyel, ɗəffi ana ɓzə ka duna.

³⁰Ma ku ndzi dwali ali abbər kəi gayar su laga, I ata gaya ata kəra suayeri na ku ncantə vəi mtathlakkurərna.

³¹Hyel, na təddar Mthlakər mburu Yesu Kristi, natə kalkal ka mdə hu ba saka madi, ku sənda abbər I aɗi akwa thlandər wa.

³²Sakatə I ahar Damaska, gwamna na akira kuthli Aretas ku pwi mjir gadi akwa nyarfayeri ar bərni Damaska ni, kamnyar ka da ngkəi ra.

³³Amma mdə ku vu ra akwa thlambəl, ka haɓəla ra akwa gular katangga, antə I ku msər ta tsa.