Read bura-pabir 2 Korinthli 12 Bible Online

2 Korinthli 12 - bura-pabir bible

2 Korinthli 12

¹Wala tə ampaniyir gaya aɗi wa, ku ndzi dwali ali kəi gaya ni. Wala tə kəri kari wa ni, ku ndzi ali dwali kəi pəla suayeri tə Mthlaku ku ncanta ali akwa wulsu.

²I asəndə mdə laga[3] na akwa Kristi, kulini ka məva kumnya nfwar, tə mdə kətə ni ka mwantə ni akwar amtazi na makərkur akwa dunar Kristi. Amma wala tsa ləmtazi ni ka dzari, wala kula dzari, I aɗi səndə wa, tar Hyel shini an sənda.

³Jiri, I ku sənda abbər mdə ku mwantə mdə ngəni akwa vəi ndzəndzi na msəra ar mji na kula biku. Amma wala tsa ləmtazi ni ka dzari, wala kula dzari, I aɗi səndə wa, tar Hyel shini an sənda.

⁴Anda antə tsa nggatə suayeri natə mda aɗi mzhi ngkərɓəlari wa, suayeri laga natə mda aɗi hir ka mdə na kum ka mamshi ngkər su ata kər wa.

⁵Antə I ata gaya ata kəra mdə ndaga, aɗi ata kəri surna wa, amma ata kəra suayeri na ku ncantə vəi mtathlakkurərna.

⁶Tsuwa wala ma I an akwa bara gaya, I aɗi ata ndzi caku wa, kamnyar I ata pəla jirkur. Amma I aɗi ata gaya wa, kamnyar I aɗi akwa bara ka mdə laga sə dzama ata kəri təramta su tə tsa wutə ra akwa harari, wala su tə tsa nggatə ra akwa pəlari wa,

⁷Wala tə I wutə surndatayeri ngəni akəla Hyel ni. Antə kamnyar ngkatə ra ta I agaya, mdə thlenta ali shilku laga na akwa kəta apa mtəhəra akwa dza mda. Mdərthlentər Shatan an si kamnyar hara bwani ali, ka tsa ngkatə ra ta I agaya.

⁸Ka makər antə I hara adduwa aka Mthlaku ata kəra su ngəni, abbər ka tsa kələmta ali su ngəni.

⁹Amma tsa pəla ali, “Mdəkur antə ga ata turari akəli. Kamnyar I ana ncantə kuthlikurərna akwa sakatə mdə ku ndzi kula duna.” Antə I ata gaya ka kucali ata kəra mtathlakkurərna, kamnyar ka Yesu ncantə kuthlikurərni akwa ndzəndziyirna.

¹⁰An su na hara tə I akwa nggatə msərakurər mtathlakkurərna ni, ka nggənggəla, ka mwavərkurərsu, ka bwaniyayeri tə mda akwa hara ali, ka matsifayeri, tə I akwa ɗarari kamnyar Kristi ni. Kamnyar akwa kəlara sakatə I ku ndzi mtathlaku, saka nda antə I ata ndzi ka duna.

¹¹I ku ndzi caku, amma giri an vu ra. Kamnyar kalkal ka giri hu ra. Kamnyar wala tə I aɗi su laga wa, ai I aɗi sur ruta aka aposəlayeri na ol'ol ni wa.

¹²Kamnyar sakatə I adzə giri I ku ncaɓəla ala giri abbər I aposəl. Kamnyar I ku mbwi ɗəffi ka hara seɗayeri ka surndatayeri, kəga kəthlərayeri na ol'ola akwa nca giri.

¹³Nənga akwa laku madi antə I ncanta abbər I hir ikələziyayeri damwa təramta giri ri? Ai təng su duku daci tə I aɗi mzhi hara ala giri wa, amma I ku hara akwa ikələziyayeri damwa, watau tə I wuta abbər aɗi kalkal kəi vəngkər ala giri ghər wa ni. Usa ka giri yafitə ra akwa su ngəni.

¹⁴I ku ɗəmhədzi kamnyar kəi ra wuli giri səli na makərkur kulini. I aɗi akwa bara sur giri wa, giri antə I akwa barari. Kamnyar aɗi kalkal ka maɗankyar an nar su aka mji na ya ɗa wa, amma ka mjir ya an nar su aka maɗankyarər ɗa.

¹⁵I ka kucalər shamta shanga su ata kəra giri, har kəga kərna, kamnyar kəi dlar giri. Wala tə I akwa wula apa kəlara sakatə I ku hir giri ka duna, giri ana kəmta hirkurər giri təbwar na.

¹⁶Giri ata mzhi kələngkər ali abbər I aɗi hir vəngkər ala giri ghər wa. Amma mji laga akwa pəla abbər I hara ala giri ɗəɗukur ka səm mdəkurər giri atar thlandər ala giri.

¹⁷Amma akwa laku madə ri? I səm mdəkurər giri ni atar pal akwa nca mji tə I thlenta ala giri ni ya?

¹⁸I ku kiɗə Titus ka tsa mwari adzə giri, tsuwa I thlentə ni ka ɓzərma mburu laga. Antə Titus ku səm mdəkurər giri ya? Awa, kamnyar japwa yeru ka jili mambəl duku, tsuwa surharar yeru jili duku.

¹⁹Nuhum giri akwa dzama abbər yeru akwa pəla su ngəni ni kamnyar mbul kəra yeru. Awa! Yeru akwa pəla ala giri su ngəni kamnyar tə yeru mjir kəthlər ar Kristi, tsuwa Hyel an seɗa yeru. Tsuwa shanga su tə yeru harari ni, maɗaməma, yeru hara ni kamnyar dunautə giri.

²⁰Kamnyar I akwa thlivər abbər nuhum I aɗi sə si ka wutə giri akwa laku tə I akwa barari wa, giri tsuwa, ta I asə gari ala giri akwa laku tə giri aɗi akwa barari wa. Kamnyar ta I asə karəngkər aka mji laga akwa beɗi, wala mpa, wala səlka, wala ɗəffə bwarbwarkur, wala hirkər, wala nggənggəldzi, wala gha mda, wala kər ɓəɓalkur, wala ka hangkala giri thlentə thlentari.

²¹I akwa thlivər abbər ma sakatə I ku jaktə ngka adzə giri ni, Hyel ata sə hara kəi ləkwa səli akəma giri. Antə ɗəffi ata sə ɓza kamnyar hang akwa nca mji na hara biku sakanda ni aɗi pumta surharar ɗa nə wa. Kamnyar da aɗi zhar dlimburkur, ka karwakur, ka shambarkur tə da tsəli ka harari nə wa.