Read bura-pabir 2 Korinthli 2 Bible Online

2 Korinthli 2 - bura-pabir bible

2 Korinthli 2

¹Apani I aɗi akwa bara abbər akwa mwarərna adzə giri kulini ni, ka ɗəffa giri sə jaktə ɓzə wa.

²Kamnyar ma I ku ɓzamtə ɗəffa giri, to wa damwa an ata namtə ɗəffi nə ri? Kamnyar mji tə I ku ɓzamtə ɗəffa ɗa aɗi ata jaktə namtə ɗəffi kəra wa.

³An su na hara tə I rəbuta ala giri wasika nda, abbər ma sakatə I ku sə mwari adzə giri, I aɗiya sə ɗar bwani akəla mji tə kalkal ka da an ata hara kəi ndzi ka kucali wa. Kamnyar I ku mbərsa abbər ma I ku hara kucali, shanga giri ata hara kucali tsuwa.

⁴I rəbuta ala giri akwa sakatə I akwa bwani swaiswai, sakatə ɗəffi ɓzəɓzari ka duna, har shimwi akwa səɓəla akwa nci. Aɗi abbər I akwa bara ka ɗəffa giri ɓzə wa, amma ka giri səndə laku tə I hir giri akwa.

⁵I aɗi akwa bara kəi gari hang dzau wa. Amma kəlara mdə na ku hara sur ɓzamtə ɗəffu, aɗi I shira antə tsa ɓzamtə ɗəffi wa, amma akwa laku laga, shanga giri tsuwa.

⁶Bwar ola giri ku kurtə pəlangkər aka jili mda apani. Antə su tə giri hara hara alari ni ku mzhi.

⁷Apani kulini kuji ka giri tifəmta alari, ka giri dunautə ni, kamnyar ta ɗəffari na ɓzə kamtə ni asə təra kərathlari.

⁸Antə I akwa kiɗə giri ka giri ncanta alari abbər giri hir ni.

⁹Kamnyar an su na hara tə I ku rəbuta ala giri ni, kəi ngkərtə giri ka nggaɓəla laku tə giri akwa kələngkər aka shanga suayeri tə I thlipa ala giri.

¹⁰Kəlara mdə tə giri ku yafitə ni, I ma I ku yafitə ni. Tsuwa kəlara su tə I ku yafiti, ma har su aɗi tə ka mdə yafita, I yafitə kamnyar giri, ka hirər Kristi,

¹¹kamnyar ngkatə ta Shatan asəm mdəkurər mburu. Kamnyar mburu asəndə kwasherikurərni.

¹²Sakatə I mwari ahar Trowas kamnyar ngkər labar na msəra ar Kristi, antə I nggaɓəla abbər Mthlaku ku kəlar ali lakur kəthlər anda.

¹³Amma I ku damitədzi ka duna kamnyar I aɗi wutə ɓzərma'na Titus anda wa. Antə I ku salamtə ɗa ka təra mwari ahar Makidoniya.

¹⁴Amma usa aka Hyel na ana pwar mburu akwa na mburu dunar nggyari su tədəku atar Kristi. Tsa na akwa titil sənda ata kəra Kristi na ndzi apa sur shiwur na msəra ni atar yeru.

¹⁵Kamnyar mburu ku ndzi apa tulari na ata shiwura na msəra natə Kristi ku hamta aka Hyel, na ku ndlətə shanga mji natə Hyel ku mbantə ɗa ka mji na ku sha.

¹⁶Kamnyar mji na ku sha, ku ndzi ala ɗa shiwurər mta, amma aka mji natə Hyel ku mbantə ɗa, antə ku ndzi apa tulari na ata shiwura msəra na ata nar mpika aka mda. Antə mda aɗi na amzhi hara kəthlər ngəni wa?

¹⁷Mburu aɗi apa mji laga na ku namtə labar Hyel apa sur fəli wa. Amma kamnyar tə Hyel ku thlentə mburu antə mburu ana gari ka jirkur akəmari, apa mjir kəthlər ar Kristi.