Read bura-pabir 2 Korinthli 3 Bible Online

2 Korinthli 3 - bura-pabir bible

2 Korinthli 3

¹Yeru akwa baɗitə hu kər yeru ka damwa ya? Nənga yeru akwa bara wasikar huwa akəla giri wala thlenta ala giri ri, apatə mji laga ana hara?

²Giri ka kəra giri an wasikar huwa na ar yeru, natə mdə ku rəbuta ata ɗəffa giri, kamnyar ka shanga mji wuta ka karata.

³Giri ku ncanta abbər giri an wasika na thlata akəla Kristi tə yeru ku hamta aka mji. Aɗi wasika natə mdə rəbutə ka biro wa, amma ka Mambəl na Ɓɗakkarkara ar Hyel na ka mpika, tsuwa aɗi ata allo ar pela wa, amma ata allo na ar ɗəffa mji.

⁴Yeru pəla apani ni kamnyar yeru ku mbərsa ka Hyel atar Kristi.

⁵Aɗi abbər yeru ku mzhi hara kəthlər ngəni ka dunar kəra yeru wa, amma atar duna natə yeru wuta akəla Hyel.

⁶Tsa an namtə yeru ka yeru mzhi hara kəthlər na ar alkawal bilən ni, natə aɗi ndzi ata kəra tsawu tə mdə rəbutə wa, amma atar Mambəla. Kamnyar tsawu na rəbutə rəbutari ni ana tsi mda, amma na ar Mambəl ni tsa ana mbantə mda.

⁷Mdə ku rəbutə tsawur Musa ni ata allo ar pelayeri, tsuwa mdə ku wutə səliyir Hyel akwa sakatə mda akwa hamta tsawu ni. Tsuwa wala tə mbələr kəma Musa ku sə kuri ni, parakər kəmari ku ndzi ka duna natə har mjir Israila aɗi amzhi wulari wa. Antə ma tsawu ngəni na ata səntə mtə ni ku ndzi ka duna ka səli apani,

⁸to mburu aɗi ata wutə duna ka səli na təramta ndagə wa ya, təng Mambəl an akwa hara kəthlərərni ni?

⁹Kamnyar ma su na ata səntə mta ku ndzi ka daraja, to ai kula nuhum su na ka jirkur ata təramta ni ka daraja ciju.

¹⁰Jiri, akwa su apani mburu ata mzhi pəla abbər su na ka daraja waci ni aɗi ka kulini wa, kamnyar daraja su na kulini ni ku təramta na ndaga.

¹¹Kamnyar ma su na aɗi ata fəi wa ku ndzi ka daraja, to ma su na ata ndzi ba saka madi, ai darajarni ata təramta na ndaga.

¹²Kamnyar tə mburu ka vuwur su akwa ɗəffu apani, an su na hara tə mburu akwa gari ata kər kula thlivər ni.

¹³Mburu aɗi apa Musa wa na ana hartə kəmari kamnyar ta mjir Israila awutə kurər mbələr kəmari nə wa.

¹⁴Amma kəra ɗa ɓəɓal! Kamnyar wala ba ashina ma da ku karatə alkawal maɗiya ni, su aɗi na ana hartə dzamər ɗa ta da anggaɓəla jirkur na akwa ni. Kamnyar tar atar Kristi shini antə su ndaga ata kələmtadzi.

¹⁵Kamnyar har ba ashina ma mdə ku karatə tsawur Musa, su laga ana hartə dzamər ɗa.

¹⁶Amma kəlara sakatə mdə ku ngka adzə Mthlaku, su ndaga ata kələmtadzi.

¹⁷Mthlaku an Mambəla, antə kəlara vəi tə Mambələr Mthlaku ata, msərmsərkur aɗi anda.

¹⁸Antə shanga mburu natə mda aɗi hartə kamnyar mburu wa ni, na akwa dlu parakər səliyir Mthlaku ni, mda ata pali dludzər mburu ka mburu ndzi apa tsa, ka mburu dingngga wutə səli na ola ata kər ata kər. Kamnyar daraja ngəni ata thlata akəla Mthlaku na Mambəl natə tsa an Ɓɗakkarkar ni.