Read bura-pabir 2 Korinthli 4 Bible Online

2 Korinthli 4 - bura-pabir bible

2 Korinthli 4

¹Antə apani, təng tə Hyel ku hamta ala yeru kəthlər ngəni atar kətadzərni ni, dza yeru aɗi ata mtə wa.

²Yeru ku pumta shanga sur səli tə yeru ana hara, kəga suayeri tə yeru ana hara akwa ɗuwari. Yeru aɗi ana kəthlər ka thlandər wa, wala gyali ka labar ar Hyel wa. Apani kamnyar jirkurər yeru ata bəbal ni, shanga mji akwa ngkər yeru ka ɓɗakkur aka mji akəma Hyel akwa ɗəffa ɗa.

³Kamnyar wala ma labar na msəra natə yeru akwa ngkərari ni an ɗuwarɗuwarari, tsa ndzi ɗuwarɗuwarari ni aka mji na akwa lakur hila.

⁴Da aɗi hamta jiri wa, kamnyar tə shatan na hyelər duniya ngəni ni ku hartə nca ɗa, ka ngkatə ta da awutə parakəu na akwa mbəlantə ɗa ni, parakəu na akwa səɓəla akwa labar na msəra ata kəra səliyir Kristi, na akwa dludzər Hyel ni.

⁵Kamnyar yeru aɗi akwa ngkər ɓɗakkurər yeru wa, amma Yesu Kristi abbər tsa an Mthlaku, tsuwa yeru an mafayeri ar giri kamnyar Kristi.

⁶Kamnyar tsu Hyel na pəla, “Ndzi ka parakəu mbəla akwa kuthlu” ni, an hara tə parakərni akwa mbəla akwa ɗəffa mburu, kamnyar ngkərɓəla səliyir Hyel atar Kristi.

⁷Amma wala apani, yeru na ka gəna na abwar mambəl ni, yeru ndzi apa tughumayeri ar həi daci. Ngəni an kamnyar ncanta aka mji abbər Hyel an ka duna na təramta ta shang ni, aɗi yeru wa.

⁸Mdə ku hara ala yeru bwani akwa kəlara bwa, amma yeru aɗi mtə wa. Yeru ku thlivər ka ndəndatədzi, amma yeru aɗi zhar hamta jiri wa.

⁹Mdə ku hara ala yeru kəmanggarkur, amma Hyel aɗi zhar dlar yeru wa. Mdə ku dlaɓu yeru, amma mda aɗi tsi yeru wa.

¹⁰Tədəku yeru akwa kəl asar mta akwa dza yeru apatə mdə hara aka Yesu Kristi, kamnyar mdə wutə surharar Yesu ni akwa ndzəndziyir yeru.

¹¹Akwa ndzəndziyir yeru shang akwa duniya ni, yeru akwa asar ar mta kamnyar Yesu, kamnyar ka mji wutə halər Yesu atar dza yeru na ar mta.

¹²An su na hara tə tədəku yeru akwa kəɓa ka mta, kamnyar ka giri wutə mpika.

¹³Amma yeru akwa ləkəma ka ngkər ndərər Hyel, kamnyar yeru ka jili hamta jiri duku ka mdə rəbutə Zabura, abbər, “I ku hamta jiri, antə I ku gari” ni. Kamnyar yeru ma yeru ku hamta jiri, an su na hara tə yeru akwa gari ni.

¹⁴Yeru ku sənda abbər Hyel na ku thlentə Mthlaku Yesu ka mpikə ni, ata si thlentə yeru ata kəma duku ka Yesu, ka mwantə yeru ata kəma duku kəga giri akəmari.

¹⁵Kamnyar yeru akwa hara su ngəni shang kamnyar giri, kamnyar apatə barkar Hyel an akwa ləkəma ka mzhitə mji ni, ka tsa hara tsuwa ka mji jakjaka akwa usar Hyel, ka haptə səliyirni.

¹⁶Kamnyar ngəni dza yeru aɗi ata mtə wa. Kamnyar wala tə dza yeru akwa hilantədzi, ndzəndziyir yeru abwar mambəl an akwa jakjaka tədək viri.

¹⁷Kamnyar bwani ngəni raka tə yeru akwa ɗarari ni, akwa dlara akwa ɗəmha ala yeru səli ka daraja laga ola na agira wa.

¹⁸Kamnyar yeru aɗi akwa damitədzi ka suayeri tə mda akwa wutari ka nca wa, amma suayeri tə nca mda awutə wa. Kamnyar suayeri tə mda ana wutə ka nca, aɗi ana fəi wa, amma suayeri tə nca mda awutə wa, an suayeri na ata ndzi ba saka madi.