Read bura-pabir 2 Korinthli 6 Bible Online

2 Korinthli 6 - bura-pabir bible

2 Korinthli 6

¹Akwa kəthlər yeru ata kəma duku ka Hyel ni, yeru akwa kiɗə kəra giri, abbər giri aɗiya namtə ɓɗakkur tə Hyel hara ala giri ni apa su gapani wa.

²Kamnyar Hyel ku pəla, “Akwa saka na kalkalari, I ku psi thləm ala giri. Sakatə vir mbantədzi ku si. I ku dlar giri.” Jiri, ngəni an saka na kalkalari. Ashina an vir wutə mbantədzi!

³Yeru aɗi akwa bara ka mdə wutə vəi shar yeru akwa kəthlər nə wa, kamnyar yeru aɗi akwa bara vəi sur tsamta səla mdə wa.

⁴Shanga su tə yeru ana hara, yeru ana ncanta abbər yeru an mafar Hyel. Yeru ana mbwi ɗəffa yeru ka nggitə bwani, ka ɗar bwaniyayeri zumzum, kəga asarayeri.

⁵Mdə ku dlaɓu yeru, ka hambwa yeru akwa pərsəna, ka pungkər ala yeru mji na ɗimi, ka pu yeru akwa kəthlər na mwavər, yeru aɗi wutə heni wa, tsuwa yeru aɗi ɗar susəm wa.

⁶Amma atar surharar yeru na kəcəkəcari, ka səndər su tə yeru kəgari, ka mbwiɗəffu, ka hangkalkur, yeru ku ncaɓəla abbər yeru mafar Hyel atar Mambəl na Ɓɗakkarkara, ka atar hirkur na jiri,

⁷ka atar jirkurər gariyir yeru, ka atar kuthlikurər Hyel. Yeru ku kəthlər ka jirkur apa tsan kari mpa na ar yeru, akwa matsəkar ka mazəm, kamnyar ɓəlatə kər yeru.

⁸Yeru akwa ləkəma ka kəthlər aka Hyel, wala mji akwa na yeru olkur, wala mji akwa rutə yeru, wala mji akwa hu yeru wala mji akwa nggəl yeru. Yeru mji na ka jirkur, amma mji taratə yeru apa yeru an mjir thlandər.

⁹Mdə namtə apa mda asəndə yeru wa, amma mji asəndə yeru akwa kəlara bwa. Yeru ku ndzi apa mtəmtari, amma apatə giri akwa wulari, yeru tsu ka mpika. Mji ku dlaɓu yeru, amma yeru aɗi mtə wa.

¹⁰Yeru ku ndzi ka ɗəffə ɓzəɓza, amma wala apani yeru akwa kucali tədəku. Wala tə yeru aɗi ka su wa, tsu yeru akwa hara ka mji ndzi ka gəna atar mambəla. Su aɗi tə yeru kəgari wa, amma shanga su an ar yeru.

¹¹Giri na mjir Korinthli, yeru ku pəla ala giri jirkur, tsuwa yeru hir giri akwa ɗəffa yeru ka duna.

¹²Ai aɗi yeru an nggəlar giri wa, amma giri an aɗi kəlar ɗəffa giri ala yeru wa.

¹³I akwa gari ala giri akwa laku tə baba ana gari aka maɗa'ni. Apani, wala giri ma, ka giri ncanta abbər giri hir yeru tsuwa.

¹⁴Giri aɗiya paktə kər ka mji na kula hamta jiri wa. Kamnyar apa madi tə mdər hara ɓɗakkur ata paktə kər ka mdər ɗimikur ri? Nənga man ata paktə parakəu ka kuthlu ka da ndzi ata kəma duku ri?

¹⁵Man ata paktə Kristi ka Shatan ka da mnya duku ri? Tsuwa man ata hara ka mdə na ka hamta jiri ka mdə na kula hamta jiri kəɓa ata kəra su duku ri?

¹⁶Man tə mbwar Hyel ka mbwar haptu ata mzhi kəɓa ata kər ri? Kamnyar mburu an mbwar Hyel na ka mpika. Apatə Hyel ku pəla abbər, “I ata ndzi akwa nca ɗa, kəi mwa akwa nca ɗa. Tsuwa I ata ndzi Hyelər ɗa, antə da ata ndzi mjirna.

¹⁷Apani tar ka giri səɓəla akwa nca ɗa ka giri ndzi shi giri kazhar ɗa, ndə Mthlaku. Giri aɗiya tsəkwar su na dlimbur wa, antə I ata dlu giri.

¹⁸I ata ndzi Tədda' giri, antə giri ata ndzi maɗa'na shili ka mwanki, ndə Mthlaku na ka duna ta shang.”