Read bura-pabir 2 Korinthli 7 Bible Online

2 Korinthli 7 - bura-pabir bible

2 Korinthli 7

¹Mdə ku hara ala mburu alkawal ar suayeri ngəni shang. Antə maɗaməma, ndzi ka mburu kəcimta kər mburu ta shanga su na ata namtə dza mburu ka mambələr mburu ka da ndzi dlimbur, kamnyar ka mburu ndzi kəcəkəcari ndəlang atar ndzi akwa thlivər Hyel.

²Ncantə giri bu abbər giri hir yeru. Ai yeru aɗi hara su na ɗimi aka mdə wa. Tsuwa yeru aɗi zambatə mdə wa, wala səm mdəkurər mdə laga wa.

³Aɗi abbər I akwa pəla ngəni kamnyar kəi pungkər biku ala giri wa, kamnyar I ku kurtə pəla təng ɗəm abbər yeru hir giri, antə yeru ata ndzi ata kəma duku kəga giri, ka mta ata kəma duku kəga giri.

⁴I ku mbərsa ka giri, tsuwa I ana gaya ata kəra giri! Giri ku dunautə ra swaiswai, natə akwa shanga bwaniyayeri tə yeru ɗari ni, ba kulini I nghyinghyari ka kucali.

⁵Wala aghəla tə yeru mzhitə Makidoniya ni ma, yeru aɗi wutə ghərəmtaghər wa. Kamnyar akwa kəlara bwa tə yeru shinardzi yeru akwa kəɓa ka beɗi, aɓəla mji akwa mpa, antə yeru ku nghyi ka thlivər akwa ɗəffa yeru.

⁶Amma Hyel na ana shiktə mdə na kula sur vəkər, ku dunautə yeru atar səyir Titus.

⁷Aɗi səyirni daci an ndzi msəra ala yeru nə wa, amma gari tə tsa pəla ala yeru ata kəra laku tə giri dunautə ni ni. Tsuwa tsa ku pəla ala yeru laku tə giri akwa mwaɓər bara wutə ra swaiswai, ka laku tə ɗəffa giri ɓza ata kəra su na hara nda, ka suayeri tə giri hara kamnyar dlar ra. Suayeri ngəni ku ndzi msəra ali ka duna.

⁸Kamnyar wala ma wasikarna na ndaga an ku ɓzamtə kuta giri, aɗi ata ndzi sur damitədzi ali wa. Akwa saka na təramta ɗəffi ku ɓzi, kamnyar I wuta abbər wasika ni ku ɓzamtə ɗəffa giri, wala tə mnyar saka laga raka daci.

⁹Antə akwa laku tə suayeri akwa kulini ni, I ka kucali. Aɗi kamnyar tə I ku ɓzamtə ɗəffa giri wa, amma kamnyar tə ɗəffa giri na ɓzə ni ku vu giri akwa tubi tə giri ku pali sur hara giri. Hyel an ɗəmha abbər ka ɗəffa giri ɓzə ni, apani yeru aɗi hara ala giri biku atar su tə yeru nə wa.

¹⁰Kamnyar ɗəffə ɓzəɓza natə Hyel ana bara ka mburu ɗari ni, ana vu ka mdə tubi, ka ngka adzə Hyel ka wutə mbantədzi. Tsuwa mi sənda aɗi akwa wa! Amma ɗəffə ɓzəɓza natə sur duniya an sənta, ana mwantə mda akwa mta.

¹¹Wul giri jili ɗəffər hara su tə Hyel vu akwa ɗəffa giri ni bu! Tsa ku na giri ɗəffər hara su, ka ncanta abbər giri ku sha. Tsa vu tə ɗəffa giri ku ɓzi, har tə giri ku thlivəra. Tsa vu ala giri mwaɓər bara wutə ra, ka uftiyir hara su. Tsa vu tə giri ku ndzi ɗəmhəɗəmhari kamnyar ɗi kəlara mdə na ku ɓzamtə su. Akwa shanga suayeri ngəni, giri ku ncaɓəla abbər giri aɗi ka biku wa.

¹²Apani, wala tə I rəbuta ala giri wasika nda, I aɗi rəbuta ata kəra mdə na ku ɓzamtə su wa, wala ata kəra mdə na mdə ku ɓzamtə ɗəffari nə wa. Amma I rəbutə ni kamnyar kəi ngkərɓəla ala giri ata bəbal abbər Hyel asənda abbər giri ku mbərsa ka yeru swaiswai.

¹³Antə su ngəni ku dunautə yeru. Bamnda duna tə yeru wutə ni, yeru akwa hara kucali swaiswai kamnyar jili kucali tə Titus kəgari ni, kamnyar shanga giri ku dlara akwa dunautə ni har tə hangkalari ndzi pwipwiyari ni.

¹⁴Kamnyar wala ma I an ku pəla alari abbər I akwa gaya ata kəra giri, aɗi ata ndzi sur səli ali wa. Kamnyar tsu apatə yeru ku pəla ala giri jirkur ni, apani tsuwa gayar yeru ata kəra giri akəma Titus ni ku ndzi kalkal jiri.

¹⁵Antə hirkur tə Titus kəgari kamnyar giri ni ata jakjaka, kəlara sakatə tsa ɗangtə laku tə shanga giri akwa kələngkər aka su tə tsa thlipa ala giri ni, ka laku tə giri dlu ni ka thlivər ka dza giri akwa kədzə ni.

¹⁶I kucali, kamnyar I ku mbərsa ka giri ka duna.