Read bura-pabir 2 Korinthli 8 Bible Online

2 Korinthli 8 - bura-pabir bible

2 Korinthli 8

¹Maɗaməma, yeru akwa bara ka giri sənda ata kəra ɓɗakkur tə Hyel hara akwa ikələziyayeri na ahar Makidoniya.

²Kamnyar da ku ɗar bwani ka duna akwa bwaniyayeri zumzum na wutə ɗa ni ka ndzi akwa tura na ɗimiyari. Amma wala apani da ku nghyi ka kucali na hang ka duna, har tə da ku hamta su ka tsiya ɗa bwang ata kəra jili tur na ɗimi tə da akwa ni.

³Kamnyar I ata mzhi hamta seɗa ata kər abbər da ku hamta su kalkal ka wutər ɗa, har ma hangta wutər ɗa. Tsuwa da hamta ka hirər ɗəffa ɗa.

⁴Da kəɗar kiɗa abbər ka yeru dlar ɗa atar na ɗa laku, kamnyar wala da ma ka da hadzə tsiya ɗa akwa dlar mjir Hyel na ahar Urushalima.

⁵Antə har da ku hamta hangta su tə yeru tamata. Ntangkəma da hamta kərɗa aka Mthlaku. Aghəla nda antə da hamta kərɗa ala yeru, akwa laku tə Hyel akwa bara ka da hara.

⁶Apani yeru ku kiɗə Titus, na baɗitə dunautə giri ata kəra hamta su ni, abbər ka tsa ngka adzə giri ka ləkəma ka kəthlər ni, har ka giri kuri tsaptə dlar na aɗi ni kasha.

⁷Antə apatə giri an akəma akwa shanga su, akwa hamta jiri akwa Kristi, ka akwa gari, ka akwa səndər su, ka akwa ɗəffər bara hara su, ka akwa laku tə giri hir yeru ni, ka giri wuta abbər giri ku ndzi akəma akwa hamta dlar ni tsuwa.

⁸I aɗi akwa pəla abbər dwali ka giri hara wa, amma I akwa ncanta ala giri laku tə mji laga ka mwaɓər dlar mji ka jirkur. Ngəni ata ncaɓəla abbər giri ka hirkur na jirari tsuwa.

⁹Kamnyar giri ku səndə jili ɓɗakkur tə Mthlakər mburu Yesu Kristi hara ni, abbər wala tə tsa ka gəna, tsa ku ndzi kula su kamnyar mburu. Abbər atar ndzəndziyirni kula su ni, ka giri ndzi ka gəna akəma Hyel.

¹⁰Sauri tə I akwa hamta ala giri an apani, ata hara ɓɗaku kulini ka giri kuri kəra su tə giri ku baɗitə nənggul ni. Kamnyar aɗi giri bara hamta su ni daci wa, amma har giri ku baɗitə harari.

¹¹Antə kulini ka giri kuri su tə giri baɗitə nda, ka jili ɗəffər hara su tə giri baɗitə kəgari ni. Tsuwa ka waskəi hamta su ni kalkal ka su tə tsa kəgari.

¹²Kamnyar ma giri ka mwaɓər hamta su, Hyel ata nggatə msərakur sur hamtar giri, watau ma giri ku hamta kalkal ka duna giri. Hyel aɗi akwa bara ka mdə hamta su tə mda aɗi kəgari wa wa.

¹³I aɗi akwa pəla abbər I ata hara ka mji laga nggatə msəra amma ar giri ka giri ɗar bwani wa. Su tə I akwa pəlari ni an abbər ata hara ɓɗaku ka giri ndəkəi kəthlərayeri ni kalkal.

¹⁴Akwa saka na ngəni giri ka su hang natə giri ata mzhi dlar mji na akwa tura. Antə ma sakatə da wutə su hang akəmazi, da ata mzhi dlar giri tsuwa, ma giri ku ləkwa tur su. Antə atar apani shanga su ata ndzi kalkal.

¹⁵Apatə ku rəbutədzi akwa kakaɗər Hyel abbər, “Mdə na ku tsaptə hang aɗiya ndzi kəgari hang kamtə wa, tsuwa mdə na ku tsaptə raka aɗiya hara raka kamtə wa.”

¹⁶Yeru akwa usar Hyel na vu akwa ɗəffa Titus mwaɓər bara dlar giri apatə I akwa barari.

¹⁷Kamnyar aɗi abbər tsa kələngkər ka tsa mwari adzə giri apatə yeru kiɗə ni ka tsa hara ni daci wa, amma tsa ka kərari surni akwa bara ka tsa mwari ra wuli giri.

¹⁸Antə yeru akwa thlentə ɓzərma mburu ngəni, na ku hara thləm akwa shanga ikələziyayeri atar ngkər labar na msəra ni.

¹⁹Tsuwa aɗi ndaga daci wa, amma har mjir ikələziya ku carɓəla ni abbər ka tsa mwa ata kəma duku kəga yeru akwa kəthlər ɓɗakkur ngəni tə yeru akwa harari kamnyar haptə səliyir Mthlaku ni, tsuwa ka yeru ncaɓəla abbər yeru akwa bara dlar mji ni.

²⁰Yeru akwa nu su ni ka hangkal. Kamnyar yeru aɗi akwa bara ka mji wutə sur nggəla adzə yeru ata kəra laku tə yeru akwa mwa ka sur hamta ar hirər ɗəffə ngəni wa.

²¹Yeru akwa bara abbər ka shanga su ndzi ka daraja, aɗi akəma Mthlaku daci wa, amma ba akəma mji.

²²Tsuwa yeru akwa thlentə ɗa kəga ɓzərma mburu ni, natə yeru ku kəɗar ngkərtə ni akwa lakwayeri zumzum ka wuta abbər tsa ka mwaɓər dlar mji ni. Har ma kulini tə tsa ku mbərsa ka giri ni, tsa akwa bara ka tsa dlar swaiswai.

²³Nuhum mdə laga ayu su ata kəra Titus. Tsa pazhir kəthlər arna, japwa yeru an akwa hara kəthlər kamnyar giri ni. Tsuwa maɗama mburu na mbil ni an mji tə ikələziyayeri thlenta, shanga ɗa kamnyar haptə səliyir Kristi.

²⁴Apani ka giri ncanta ala ɗa hirkur, na ata ncaɓəla aka shanga ikələziyayeri abbər gaya tə yeru kəgari ata kəra giri ni ku ndzi kalkal.