Read bura-pabir Galatiya 1 Bible Online

Galatiya 1 - bura-pabir bible

Galatiya 1

¹I na Bulus na aposəl an akwa rəbutə wasika ngəni ni. Tsuwa aɗi mji laga an carɓəla ra, wala mdə laga an vu ra akwa kəthlər ngəni wa, amma Yesu Kristi ka kərari surni, ka Hyel na tədda, na thlentə ni akwa mtəmta, an carɓəla ra.

²Shanga maɗaməma na azi ku paktə kər ka iya akwa thlentə wasika ngəni aka mjir ikələziyayeri na akwa Galatiya ni.

³Ka Hyel na baba' mburu ka Mthlaku Yesu Kristi hara ala giri ɓɗakkur, ka tsa na ala giri msərakur.

⁴Tsa na Yesu Kristi ku hamta kərari kamnyar bikər mburu, tsu akwa laku tə Hyel na təddar mburu ku ɗəmha, kamnyar ka tsa msərantə mburu akwa duniya ngəni ɗimi tə mburu akwa ni.

⁵Antə ka səli ndzi alari har ba saka madi! Amin.

⁶I akwa ndatədzi ata kəra su tə giri akwa harari ni! Akwa saka laga raka daci təng giri ləkwa shinadzə bwahili aka Hyel na kəgari atar kətadzər Kristi, har giri akwa nu mji laga na namtə kərɗa abbər da akwa ngkər labar damwa na msəra!

⁷Kamnyar labar damwa aɗi na msəra wa. Mji laga daci an akwa damitə giri, akwa bara ka da ɓzamtə labar na msəra ata kəra Kristi ni.

⁸Amma wala ma yeru, wala mjirthlentərhyel na amtazi an ata ngkər ala giri labar damwa zum ta natə yeru ngkər ala giri ni, ka tsa ndzi shushuwari!

⁹Apatə yeru ku kurtə pəla ntangkəma, antə kulini I akwa jaktə pəlari abbər, ma kəlara mdə na ata ngkər ala giri labar damwa na zum ta natə giri ku kurtə ka dlu ni, ka tsa ndzi shushuwari!

¹⁰Ar jirkurari, I aɗi akwa bara abbər ka mji mbərsa ka iya wa, amma ka da mbərsa ka Hyel. Kamnyar ma abbər I an akwa bara kəi namtə ɗəffa mji, sakani I aɗi ata ndzi mafar Kristi wa.

¹¹Maɗama'na, I akwa bara pəla ala giri abbər labar na msəra tə I akwa ngkər ala giri ni, aɗi thlata akəla mdə wa.

¹²Kamnyar I aɗi dlu akəla mdə wa, tsuwa aɗi mdə laga an thlipa ali wa, amma Yesu Kristi surni an ncanta ali.

¹³Ai giri ku nggata jili laku tə I ndzəndzi akwa addinər mjir Yahudi waci, laku tə I hara bwani aka ikələziyayeri ar Hyel kula kətadza, akwa bara abbər kəi tsi ni ni.

¹⁴Tsuwa giri ku sənda abbər akwa addinər mjir Yahudi ni, I ku təramta bwar ola mji na kəmarna na akwa nca mjir yeru Yahudi ni. Kamnyar I ku nu surharar addinər yeru ni ka ɗəffu ka ufti.

¹⁵Amma Hyel ku hara ali ɓɗakkur ka carɓəla ra, təng akəmata mda ayaɓəla ra, ka kəga ra, har ka hir

¹⁶kəlar nci tə I wutə Ɓzərni, kamnyar kəi sə ngkər labar na msəra ata kərari aka durayeri damwa. Sakatə su ngəni hara ni, I aɗi mwari adzə mdə laga kamnyar yu sauri wa,

¹⁷wala mwari ahar Urushalima adzə aposəlayeri na akəmata iya wa. Su tə I hara an, I hwi mwari akwa tsəɗi Arabiya, aghəla nda antə I ngka ahar Damaska.

¹⁸Tar aghəla məva makər antə I sə mwari ahar Urushalima kamnyar kəɓa ka Kefas, watau Siman Bitrəs, ka ɗarndzi ka tsa mnyar vir kumnya ntəfu.

¹⁹Amma I aɗi kəɓa adzə aposəl damwa wa, təng Yakub na ɓzərma' Mthlaku daci.

²⁰Akwa su tə I akwa rəbuta ala giri ni, aɗi thlandər wa, jirkur antə I akwa pəlari akəma Hyel.

²¹Aghəla nda antə I mwari akwa tsəɗi Siriya ka Kilikiya.

²²Akwa saka ndaga mjir ikələziyayeri ar Kristi na ahar Yahudiya aɗi səndə ra nca ka nca katagu wa.

²³Təng da nggatə mji akwa pəlari daci abbər, “Mdə na hara bwani ala mburu waci nda an akwa ngkər ata kəra hamta jiri ngəni natə saka nda tsa bara shamtari ni!”

²⁴Antə da ku haptə səliyir Hyel kamnyar su tə tsa ku hara atar na.