Read bura-pabir Galatiya 2 Bible Online

Galatiya 2 - bura-pabir bible

Galatiya 2

¹Aghəla məva kumnya nfwar, antə I jaktə mwari ahar Urushalima, akwa saka ngəni ata kəma duku ka Barnabas, ka Titus tsuwa.

²I mwari anda ni kamnyar Hyel an ncanta ali abbər kəi mwari. Sakatə yeru anda ni, antə I kəɓa ka mji laga na ol'olər mjir nuwa, yeru shi yeru, ka ngkərɓəla ala ɗa su ata kəra labar na msəra tə I akwa ngkər aka durayeri damwa ni. I bara ka kəthlərər yeru ndzi ka mnya duku, ta duni tə I shamta akwa kəthlər ni, ka ghər I akwa harari kulini ni, asə ndzi gapani.

³Wala Titus na adzə ra, na mdər Helleni ni, mda aɗi vu ni dwali abbər ka tsa thla kaciya wa.

⁴Wala gariyir kaciya na thlatə ni, an kamnyar mji na akwa thlandər abbər da maɗaməma, na səkwa nca mburu kamnyar wul ashira msərmsərkur tə mburu kəgari akwa Kristi Yesu ni. Tsuwa su na akwa ɗəffa ɗa an ka da vu mburu akwa mafakur,

⁵amma yeru aɗi hir psi laku ala ɗa wala raka wa. Kamnyar yeru akwa bara ka yeru ɓəlatə jirkur ar labar na msəra ni.

⁶Amma mji na namtə kərɗa abbər da mji ol'ol ni, wala ma da an mə ri, aɗi damitə ra wa. Kamnyar Hyel aɗi ana nca zumzumkur aka mji wa. Apani olkurər ɗa aɗi jaka ali su wa.

⁷Amma da ku wutə laku tə Hyel mbərsa ka iya akwa, har ka hamta ali kəthlər ar ngkər labar na msəra ni aka mji na zəmbuləm, tsu apatə tsa ku hamta aka Bitrəs ka tsa ngkər aka mji na ka kaciya ni.

⁸Kamnyar tsu Hyel na kəthlər ka Bitrəs akwa sakatə tsa akwa kəthlər aka mjir Yahudi ni, an akwa kəthlər ka iya kamnyar kəthlər aka durayeri damwa.

⁹Jiri, sakatə Yakub, ka Bitrəs, ka Yahwana, na ndzi apa da an zhimbwalər ikələziya ni, wuta abbər Hyel ku hamta ali dunar kəthlər ngəni tsuwa, antə da dlu ra ka Barnabas ka tsi suɗsuɗa. Tsuwa da ku dunautə yeru abbər ka yeru ləkəma ka ngkər labar ni aka durayeri damwa, apatə da ata ləkəma kəgari aka mjir Yahudi ni.

¹⁰Su pal tə da bara ka yeru hara ala ɗa an yeru aɗiya fwari ata kəra mjir bwani na akwa nca ɗa wa, tsuwa hwatu an su tə I ka mwaɓər harari.

¹¹Amma sakatə Bitrəs ku si ahar Antakiya, antə I mnya alari nca ka nca, kamnyar su tə tsa hara ni aɗi kalkal wala raka wa.

¹²Kamnyar akəmata mji tə Yakub thlentə ni asi, Bitrəs ku səm susəm kəga mjir dur damwa. Amma sakatə mji nayeri ni ku si, antə tsa shaɓəladzi kazhar ɗa, ka ndzi shini, kamnyar tsa akwa thlivər mji na akwa dunautə thla kaciya ni.

¹³Tsuwa mambila mjir Yahudi na adzə Bitrəs ni ku ndzi kula jiri tsu apa tsa, har su ngəni vu tə Barnabas nutə ɗa akwa ndzi kula jirkur ni.

¹⁴Amma sakatə I wuta abbər da aɗi akwa nu jirkur ar labar na msəra ni wa, antə I pəla aka Bitrəs akəma ɗa shang abbər, “Bitrəs, təng tə gə na mdər Yahudi, aɗi akwa nu surharar mjir Yahudi wa, kamnyar mi tə ga akwa dwalitə mjir dur damwa ka da nu surharar mjir Yahudi ri?”

¹⁵Wala tə atar ya mburu mjir Yahudi, aɗi mjir hara biku apa mjir dur damwa wa,

¹⁶mburu ku sənda abbər mda aɗi na amzhi ndzi kula biku akəma Hyel atar ɓəla tsawu wa, tar atar hamta jiri akwa Yesu Kristi. Kamnyar wala mburu ma, mburu hamta jiri akwa Kristi Yesu, kamnyar ka mburu mzhi ndzi kula biku akəma Hyel, atar hamta jirər mburu akwa Kristi, amma aɗi atar kəthlər ar ɓəlatə tsawayeri wa. Kamnyar mda aɗi wala duku na ata mzhi ndzi kula biku akəma Hyel atar ɓəla tsawu wa. Aɗi tsawa an akwa mwa ka iya kulini kəra wa.

¹⁷Tsuwa ma mburu pəla abbər mburu ata bara ka mburu ndzi kula biku akəma Hyel atar mbərsa ka Kristi, antə mdə sə ra wuta abbər mburu mjir biku tsuwa, mda aɗi ata kəta abbər Kristi an vu mburu akwa hara biku nə wa? Awa, hun wa!

¹⁸Amma ma I an thlatə ka jaktə hənɓəla suayeri tə I huzamta waci nda, to I ku ndzi mdər ɓəli tsawa.

¹⁹Kamnyar kəlara sakatə I pəla abbər I ata ɓəla tsawu ni, tsawu ni ata jaktə ngkəi ra ka biku. Antə atar tsawu ni I ndzi apa mtəmtari,[1] kamnyar kəi ndzi ka mpika abwar Hyel.

²⁰Mdə ku kukwamta ra[2] ata kəma duku ka Kristi. Antə kulini aɗi I an akwa ndzi ka mpikə nə wa, amma Kristi an akwa ndzi akwa iya. Antə mpikə tə I kəgari kulini akwa dzi ni, I akwa ndzi ni atar hamta jiri akwa Ɓzər Hyel, aka Ɓzər Hyel, na hir ra ka hamta kərni kamnyar na.

²¹I aɗi akwa nggəlar ɓɗakkur tə Hyel hara ali nə wa. Kamnyar ma abbər mda ata mzhi ndzi kula biku akəma Hyel, ai sakani ampaniyir mtər Yesu aɗi wa.