Read bura-pabir Galatiya 3 Bible Online

Galatiya 3 - bura-pabir bible

Galatiya 3

¹Ai mjir Galatiya, giri caku kadzang! Wan hara ala giri kuzəkə nə ri? Kamnyar I ku kurtə ngkərɓəla ala giri ata bəbal laku tə Yesu Kristi mta ata udzəm kadləkadla.

²Ndzi kəi yu giri su pal kwang. Giri dlu Mambələr Hyel ni atar ɓəla tsawur Musa, nənga atar mbərsa ka gari tə giri nggatə ri?

³Giri aɗi hara caku kamtə wa! Giri baɗitə su ka Mambələr Hyel, antə kulini giri akwa bara tsi kərari atar dza ya?

⁴Antə shanga bwani tə giri ɗar ni ku ndzi gapani ya? Ata mzhi hara ka da ndzi shang gapani?

⁵Watau, Hyel hamta ala giri Mambəl na Ɓɗakkarkara, ka hara surndatayeri akwa nca giri ni, kamnyar tə giri ana ɓəla tsawu ya, nənga kamnyar tə giri nggatə gari ata kəra Kristi ka hamta jiri akar ri?

⁶Ai tsu apani antə Ibrahim hara. Kakaɗər Hyel pəla, “Ibrahim ku hamta jiri aka Hyel, antə Hyel namtə hamta jirərni ni apa tsa kula biku.”

⁷Antə kalkal ka giri sənda abbər mjir hamta jiri aka Hyel ni an maɗa' Ibrahim.

⁸Tsuwa kakaɗər Hyel ku pəla təng ɗəm abbər Hyel ata sə namtə mji na aɗi mjir Yahudi wa ka da ndzi kula biku atar hamta jiri alari. Kamnyar mdə ku ngkər labar na msəra ni aka Ibrahim təng ɗəm abbər, “Atar nga antə shanga mjir duniya ata sə wutə barka.”

⁹Antə apani shanga mji na ku hamta jiri akwa Kristi, ata wutə jili barka tə Ibrahim wuta atar hamta jirərni ni.

¹⁰Kamnyar shanga mji na akwa dzama abbər da ata mzhi ndzi kula biku atar ɓəla tsawu ni, Hyel ata shuwumta ɗa. Kamnyar kakaɗər Hyel ku pəla abbər, “Kəlara mdə na aɗi nu shanga su tə mdə rəbuta akwa kakaɗər tsawa, ka ɓəlatə ɗa wa, tsa ata ndzi shushuwari.”

¹¹Antə ku ndzi ata bəbal abbər, mda aɗi na amzhi ndzi kula biku akəma Hyel atar ɓəla tsawu wa, kamnyar kakaɗər Hyel ku pəla, “Tar mdə natə Hyel ku namtə ni kula biku atar hamta jiri an ata ndzi ka mpika.”

¹²Kamnyar ɓəla tsawa aɗi su duku ka hamta jiri wa, kamnyar kakaɗər Hyel ku pəla, “Kəlara mdə na ku ɓəlatə shanga su tə tsawu ni pəla, tsa ata ndzi ka mpika.”

¹³Kristi ku msərantə mburu akwa thləmnya tə tsawu hara ala mburu ni. Kamnyar Kristi ku dlu thləmnya ni ata vəya mburu. Kamnyar kakaɗər Hyel ku pəla, “Kəlara mdə natə mdə ku kukwamta ni ata nfwa tsa ata ndzi shushuwari.”

¹⁴Kristi hara apani ni kamnyar ka mji na aɗi mjir Yahudi wa, wutə barka tə Hyel hara aka Ibrahim ni, atar Kristi Yesu. Atar apani antə mburu ata mzhi dlu Mambəl na Ɓɗakkarkara tə Hyel hara alkawalari ni atar hamta jiri.

¹⁵Maɗaməma, ndzi kəi na giri karapu ka su tə mburu tsəli ka wutari. Ma mji suɗa ku mbwi alkawal, mda aɗi ana shari wa, wala jakəngkər su wa, ma har da ku baɗitə kəthlər kəgari.

¹⁶To, Hyel hara alkawalayeri ngəni aka Ibrahim ka ɓzərni. Kakaɗər Hyel aɗi pəla, “ka aka maɗa'ni” wa, kamnyar ata ncanta abbər mji hang. Kamnyar tsa akwa gari ata kəra mdə duku abbər, “ka aka ɓzər nga,” na akwa ncanta abbər mdə duku daci, watau tsa na Kristi.

¹⁷Su tə I akwa pəlari ni an apani, tsawu ni amzhi shari alkawal tə Hyel hara aka Ibrahim nə wa, kamnyar tsawu ni si səɓəla aghəla alkawal ni ka məva aru nfwar ka makkumari. Kamnyar ata hara ka alkawal ni ndzi mtəmtari.

¹⁸Kamnyar ma ku ndzi abbər tar mdə na ku ɓəlatə tsawu ni, antə Hyel ata mzhi hamta alari kifərni, ai ata ndzi abbər mda aɗi akwa hamtari apa sur alkawal kəra wa. Amma Hyel ku hamta aka Ibrahim apa sur alkawal.

¹⁹Ka, ma apani man ampaniyir tsawu nə ri? Mdə jakdzə ni aka alkawal ni kamnyar ka tsa ncaɓəla vəi shar mda ata bəbal. Tsuwa ka mdə hara kəthlər kəgari har ka vədza aka vir səyir ɓzər tə mdə hara alkawalari aka Ibrahim ni. Tsuwa mjirthlentərhyel an hamta tsawu ni atar mdə na akwa daɓwa Hyel ka mji.

²⁰Amma Hyel na duku ni, aɗi bara mdər thləthlata akwa daɓwari ka Ibrahim, sakatə tsa akwa hara alkawal aka Ibrahim nə wa.

²¹Ka, ma apani, tsawu ni dawa ka alkawalər Hyel ya kəlai? Awa, aɗi apani hun wa! Kamnyar mdə hamta tsawu ni abbər ka mburu mzhi ndzi ka mpika, to ai mburu ata mzhi ndzi kula biku akəma Hyel atar ɓəla tsawu ni.

²²Amma kakaɗər Hyel akwa pəla abbər shanga mburu ndzi apa pərsəna akira biku, kamnyar ka mburu mzhi dlu msərmsərkur tə Hyel hara ala mburu alkawalari ni atar hamta jiri akwa Yesu Kristi.

²³Akəmata mburu awutə hamta jiri akwa Kristi ni, mburu akira tsawa, antə tsawu ni ngkəngkahə mburu apa mji tə mdə hambwa akwa pərsəna, har tar vir tə hamta jiri wutədzi.

²⁴Apani antə mburu ku ndzi akwa tsiya tsawu ni, har tar vir tə Kristi si, kamnyar ka tsa namtə mburu kula biku akəma Hyel atar hamta jiri.

²⁵Antə kulini tə hamta jiri ku si ni, mburu aɗi akwa tsiya tsawa kəra wa.

²⁶Kamnyar atar hamta jiri akwa Kristi Yesu ni, shanga giri ku ndzi maɗa' Hyel.

²⁷Kamnyar giri na ku dlu baptizma akwa thləma Kristi ni, giri ku kətə hal ar ndzi apa Kristi.

²⁸Kamnyar kulini zumzumkur aɗi akwa daɓwa mjir Yahudi ka mjir dur gapani wa, wala akwa daɓwa mafa ka mji na kamba wa, wala mji shili ka mwanki wa, kamnyar shanga giri ku ndzi duku akwa Kristi Yesu.

²⁹Antə ma giri an ar Kristi, to giri ku kurtə ndzi Ibrahim, tsuwa giri ata dlu kifə tə Hyel ku hara alkawalari ni.