Read bura-pabir Galatiya 4 Bible Online

Galatiya 4 - bura-pabir bible

Galatiya 4

¹Su tə I akwa pəlari an apani, ma mdə fa kifər baba'ni sakatə tsa tsu ɓzəngkyar, zumzumkurərni aɗi ka mafa wa, wala tə kulini tsa an mthlakər shanga su na akwa kutakəi ni.

²Kamnyar sakatə tsa tsu ɓzəngkyar ni, tsa tsu akwa tsiya mji na təddarni ka wakilayeri, har ka vədza aka vir tə baba'ni thlamta ala ɗa.

³An laku tə su ni ndzi ala mburu akwa akəmata Kristi asi ni. Kamnyar saka nda mburu tsu maɗankyar, mburu akwa hara mafakur aka suayeri na ka kuthlikur ata kəra duniya ni.

⁴Amma sakatə saka na kalkalari ni ku si cipcippu, antə Hyel thlentə Ɓzərni, tə mwala yaɓəla ni. Antə tsa kəla akwa nu tsawur mjir Yahudi,

⁵kamnyar ka tsa pəli mburu, mburu na akira tsawu ni, ka tsa namtə mburu ka mburu ndzi apa maɗa' Hyel.

⁶Kamnyar tə mburu ku ndzi maɗa'ni kulini, antə Hyel thlentə Mambələr Ɓzərni akwa ɗəffa mburu, na vu tə mburu akwa mzhi kəga ni abbər, “Baba! Tədda!”

⁷Antə kulini ga aɗi mafa kəra wa, amma ɓzər kutari! Antə təng tə gə ɓzər kutari kulini ni, to, Hyel ku kurtə namtə ngə mdər fa kifərni.

⁸Waci, akəmata giri asəndə Hyel, giri ku ndzi akwa mafakur aka mambəlayeri na aɗi su laga wa.

⁹Amma kulini tə giri ku səndə Hyel, wala kəi pəla, tə Hyel ku səndə giri, kamnyar mi tə giri ata jaktə ngka adzə mambəlayeri na kula duna tsuwa kula ampani nə ri? Giri akwa bara jaktə ndzi mafar ɗa ya?

¹⁰Nggədza giri akwa ɓəla virayeri, ka thliyayeri, ka sakayeri, ka məvayeri laga!

¹¹Kaai, giri akwa thlivərantə ra! Ngəni apa shang ghər tə I hara akwa nca giri ni ku ndzi gapani ya?

¹²I ata kiɗə kəra giri maɗaməma, abbər ka giri ndzi msərmsərari tsu apa iya. Kamnyar I ma I ɗar namtə kərna apa giri, na aɗi akira tsawu wa. Giri aɗi ɓzamta ali su wa.

¹³I mbərsa giri ata ɗangtə nggawakur na akwa damitə ra sakatə I si akwa ngkər labar na msəra ala giri ntangkəma ni.

¹⁴Wala tə nggawakurərna ku ndzi sur ngkərta ala giri apa ka giri nggəlar ra, giri aɗi cikə ra wala nggəlar ta wul ra wa. Giri dlu ra, ka wulwul ra, apa I mdərthlentərhyel, apa Kristi Yesu ka kərari.

¹⁵Giri ku hara kucali ka duna saka nda! Ka, man hara kulini ri? Kucali tə giri hara kamnyar na ni ama ri? Kamnyar I ku mbərsa abbər, ma an ata mzhi hara, giri ata hir tuhurɓəla nca giri ka giri na ali.

¹⁶Antə kulini I ku ndzi dawar giri kamnyar tə I pəla ala giri jirkur ya?

¹⁷Nuhum maləmayeri na ar thlandər ni akwa vu hangkala ɗa ka da wuta abbər da ku ndəkərtə hangkala giri, amma da aɗi ka nufi na ɓɗakari kamnyar giri wa. Da akwa bara ka da ndəkəmta giri ka iya daci, kamnyar ka hangkala giri ngka adzə ɗa cipu.

¹⁸Amma ma mda akwa ndəkər hangkala giri kamnyar hara ala giri su na ɓɗaku, ai ɓɗak laga. Tsuwa kalkal ka jili su apani ndzi tədəku, aɗi tar ma sakatə I adzə giri daci wa.

¹⁹Maɗa'na, ngəni an saka na suɗkur tə I akwa jaktə ngga kutərya ar giri. Tsuwa I ata ləkəma kəgari apani har tar ma halər Kristi ku ncidzi akwa ɗəffa giri.

²⁰I hir abbər ka I adzə giri kulini, kəi pali kurakəi, kamnyar jiri giri ku ndatə ra ka duna.

²¹Pəla giri ali, giri na akwa bara ndzi akira tsawu ni, giri ku nggaɓəla su tə tsawu ni akwa pəlari nggye?

²²Kamnyar kakaɗər Hyel ku pəla abbər Ibrahim ka maɗashili suɗa, na pal ngkwar mwala mafa an ya ni, na palari tsuwa mwala na ka msərmsərkur an ya ni.

²³Ɓzər mwala mafa ni, mdə yaɓəla ni akwa laku tə mdə tsəli kəgari hwatu, amma ɓzər mwala na msərmsərari ni mdə yaɓəla ni atar alkawal.

²⁴Mwanki ngəni suɗə ni akwa ngkərɓəla karapur alkawalayeri ngəni suɗə ni. Hagar, mwala na mafa ni, akwa ncaɓəla alkawal tə mdə hara ata Gar Sinai ni, kəlara mdə tə mdə ya akwa kutakəyirni tsa mafa.

²⁵Watau Hagar ni ndzi apa Gar Sinai na akwa tsəɗi Arabiya. Tsa ndzi apa bərni Urushalima na aɗi kulini, kamnyar tsa akwa mafakur kəga mjirni shang.

²⁶Amma Urushalima na amtazi ni msərmsərari, antə tsa an mama' mburu.

²⁷Kamnyar kakaɗər Hyel ku pəla, “Hara kucali, mwala ciri, gə na aɗi yaɓəla ɓzər wa! Tsamta kumshi ka kurakər kucali, gə na aɗi ɗar kutərya wa! Kamnyar maɗa' mwala tə salərni təra kazhar ni, ku hara hangta maɗa' mwala na ka sal.”

²⁸Antə kulini, maɗaməma, mburu ku ndzi maɗa' Hyel atar alkawalərni, tsu apa Ishaku.

²⁹Amma tsu apatə sakanda mdə na yaɓəladzi akwa laku tə mdə tsəli kəgari hwatu ni, ku hara bwani aka mdə na yaɓəladzi atar Mambəl ni, antə su ngəni akwa hara kulini.

³⁰Amma man tə kakaɗər Hyel pəla ata kəra su apani ri? Tsa pəla, “Kədləmta mwala mafa ni ka ɓzərni ni, kamnyar ɓzər mwala mafa ni aɗi ata fa kifa ata kəma duku ka ɓzər mwala na msərmsərari nə wa.”

³¹Apani maɗama'na, mburu aɗi maɗa' mwala mafa wa, amma maɗa' mwala na ka msərmsərkur.