Read bura-pabir Galatiya 5 Bible Online

Galatiya 5 - bura-pabir bible

Galatiya 5

¹Kristi msərantə mburu ni kamnyar ka mburu ndzi msərmsərari, antə giri aɗiya jaktə vu kər giri akwa mafakur aka tsawu nə wa.

²To, I na Bulus akwa pəla ala giri abbər, ma giri ku kələngkər tə mdə thla ala giri kaciya, ata ncanta abbər Kristi aɗi ndzi ka ampani ala giri wa.

³Tsuwa I akwa jaktə seɗata aka kəlara mdə na ku kələngkər tə mdə thla alari kaciya, abbər ata ndzi dwali alari ka tsa ɓəlatə shanga tsawur Musa ni.

⁴Giri na akwa bara ndzi kula biku akəma Hyel atar nu tsawur Musa ni, giri ku kurtə kəɓəla kər giri kazhar nu Kristi. Apani giri ku pəramta kazhar ɓɗakkur tə Hyel hara ala giri.

⁵Amma ar mburu, mburu ku vu akwa ɗəffa mburu abbər Hyel ata hara ka mburu ndzi kula biku akəmari. Ngəni an su tə mburu akwa səkari atar hamta jirər mburu akwa Kristi ni.

⁶Kamnyar akwa Kristi Yesu, wala mdə na ka kaciya, wala mdə na kula kaciya, shang sur dlara aɗi akwa ala mburu wa. Su tə mda akwa turari an hamta jiri na ata ncantədzi atar hirkur.

⁷Ntangkəma giri akwa hara su ɓɗak laga! Wan ngkatə giri ta nu jirkur nə ri?

⁸I ka səndari abbər su ngəni aɗi thlata akəla Hyel, na kəga giri wa.

⁹Ai yist raka andər mbikantə shanga mpu hərhəra ar ɓwa buradi ni.

¹⁰I akwa mbərsa ka Mthlaku abbər giri aɗi ata dlu thlipə damwa na zum ta arna nə wa. Tsuwa mdə na akwa damitə giri ni, mda ata sə ɗi ni, wala tsa an wa ri.

¹¹Amma maɗaməma ma I an tsu akwa ngkər labar ata kəra thla kaciya, kamnyar mi tə ba kulini mda akwa hara bwani ali nə ri? Ma I an akwa pəla abbər dwali ka mdə thla kaciya, ai sakani gariyirna ata kəra mtər Kristi ata udzəm kadləkadlə ni aɗi ata ndzi sur damitədzi aka mdə wa.

¹²I hir abbər ka mji na akwa hara bwani ala giri ni, fwaɓəla kərɗa ka da ndzi kulaɓu hwatu kasha.

¹³Kamnyar ar giri, maɗaməma, mdə kəga giri ni kamnyar ka giri ndzi akwa msərmsərkur. Amma giri aɗiya kəthlər ka msərmsərkurər giri ni kamnyar hara su tə dza giri hir wa. Amma ka msərmsərkur ngəni vu giri akwa hara buɗakur aka nvwa giri akwa hirkur.

¹⁴Kamnyar mda ata mzhi paktə shanga tsawur Musa ni akira ndər duku, abbər, “Ka gə hir ntəwulər nga apatə gə hir kər nga.”

¹⁵Amma ma giri akwa kala, ka ɓɗə nvwa giri, ka giri hara hangkal ta shanga giri asə kurəmtadzi shang ata kəma duku.

¹⁶Su tə I akwa pəlari an apani, ka giri zhar ka Mambələr Hyel an pwar giri, giri aɗiya nu su tə nggukər dza giri akwa barari wa.

¹⁷Kamnyar su tə nggukər dza mburu akwa barari ni aɗi ana kəɓa ka su tə Mambəl akwa barari nə wa, tsuwa su tə Mambəl akwa barari ni aɗi ana kəɓa ka su tə dza mburu akwa barari nə wa. Halayeri ngəni suɗə ni akwa dawakur ka nvwa ni. An su na hara tə giri amzhi hara su tə kəra giri kari wa ni.

¹⁸Amma ma Mambəl an akwa pwar giri, to giri aɗi akira tsawu nə wa.

¹⁹Nggədza halayeri na ar ɗimikur ata bəbal. Da an karwakur, ka adiyakur, ka ngguka,

²⁰ka nu haptu, ka hakdzi, ka dawakur, ka mpa, ka səlkər nvwadzi, ka ɗəffə bwarbwarkur, ka hirkər, ka beɗi, ka ndəkədzi,

²¹ka nggukə sur mda, ka wika, ka sa sur wika, ka mambila jiliyir ɗa. Antə I akwa tsaktə giri ata kər kulini tsu apatə I ku tsaktə giri sakanda, abbər mji na ana hara suayeri ngəni aɗi ata ləkwa kuthlikurər Hyel wa.

²²Amma halər Mambəl na Ɓɗakkarkara an hirdzi, ka kucali, ka msərakur, ka kanaɗikur, ka hangkalkur, ka ɓɗakkur, ka jirkur,

²³ka nu su ka hangkal, ka mbwiɗəffu. Tsawa aɗi na ngkatə jili suayeri apani wa.

²⁴Antə mji na ku ndzi ar Kristi Yesu ni, da ku tsi dza ɗa ka nggukayeri na ar dza, ka shanga suayeri tə dza ana bara ka mwaɓa.

²⁵Təng tə mburu akwa ndzi atar Mambəl ni, mburu amwa atar Mambəl tsuwa.

²⁶Mburu aɗiya ndzi mjir hir kər wa, wala ɓzamtə ɗəffa nvwa mburu wa, wala ndzi mjir səlkə nvwa mburu wa.