Read bura-pabir Galatiya 6 Bible Online

Galatiya 6 - bura-pabir bible

Galatiya 6

¹Maɗaməma, ma mdə ku wutə mdə laga akwa ɓzamtə su, ka giri na ka Mambəl ni nu ni ka hangkal ka giri jaktə ngka ka tsa akwa laku. Tsuwa giri ma, ka giri hara hangkal ta giri asi ngkərtədzi.

²Ka giri dlar nvwa giri. Kamnyar atar apani antə giri ata ɓəlatə tsawur Kristi.

³Kamnyar ma mdə na akwa namtə kərni apa tsa su laga, amma tsa aɗi suma wa, tsa akwa pwaktə kərni daci.

⁴Amma ka waskəi ngkərtə kəthlərərni surni ka sa wuta. Ma kəthlərər nga ku ndzi ɓɗaku, ga ata mzhi hu kər ng sur nga. Amma ga aɗiya gira kər ngə ka nvwa ngə wa.

⁵Kamnyar waskəi ata sə kətə kələrni surni.

⁶Kəlara mdə tə mdə ku thlipa alari ndərər Hyel, ka tsa ɗangtə dlar mdə na thlipa alari su ni ka shanga suayeri na ɓɗakɓɗaku.

⁷Giri aɗiya pwaktə kər giri wa, kamnyar ai mda amzhi zwalitə Hyel wa. Kamnyar kəlara su tə mdə ku thləkamta, tsu jili su nda antə tsa ata sə nthləyari.

⁸Kamnyar kəlara mdə na ku thləka kamnyar nggukər dzari, tsa ata sə nthləi mta. Tsuwa mdə na ku thləka kamnyar Mambəla, tsa ata sə nthləi mpikə na akur wa.

⁹Antə apani mburu aɗiya ghər akwa hara ɓɗakkur wa. Kamnyar ma mburu aɗi ghər ka zhari wa, saka ata sə si tə mburu ata sə wutə watsəɓari.

¹⁰Antə kulini tə mburu ka sakar hara su ni, ka mburu hara ɓɗakkur aka shanga mji, na olari aka mji na ku hamta jiri.

¹¹Wul giri jili ol'olkurər rəbutə tə I akwa hara ala giri ka tsi surna!

¹²Mji na akwa bara vu giri dwali ka giri thla kaciya ni, da akwa bara ncanta aka mji abbər da mji na pwa. Tsuwa da aɗi akwa bara ka mdə hara ala ɗa bwani kamnyar udzəm kadləkadlə na ar Kristi wa.

¹³Kamnyar wala mji na ka kaciya ni aɗi ana ɓəla tsawu nə ma wa. Arɗa da akwa bara ka giri thla kaciya ni kamnyar ka da wutə sur gaya na abwar dza giri ndzang.

¹⁴Amma arna, su aɗi tə I akwa bara gaya ata kər ka təra kəra udzəm kadləkadla na ar Mthlakər mburu Yesu Kristi wa. Kamnyar atar udzəm kadləkadlə ni antə I pumta mwaɓər sur duniya, tsuwa atar ni antə duniya ni nggəlar surhararna.

¹⁵Kamnyar wala ka kaciya, wala kula kaciya, shang aɗi sur damitədzi wa. Su na olari an ka mdə pali surhararni ka ndzi mdə bilən.

¹⁶Antə ka msərakur ka kətadzə mda, pwar shanga mji na akwa nu tsawu ngəni bilən ni, na namtə Israila ar Hyel ni.

¹⁷Baɗitə ka kulini har ka ləkəma mda aɗiya jaktə hara bwani ali kəra wa, kamnyar I ka seɗayeri na ar Yesu ata dzi.

¹⁸I akwa hara ala giri adduwa, maɗaməma, abbər ka Mthlakər mburu Yesu Kristi kətadzə giri, ka tsa hara ala giri ɓɗakkur. Amin.