Read bura-pabir Afisa 1 Bible Online

Afisa 1 - bura-pabir bible

Afisa 1

¹I na Bulus, na aposəl ar Kristi Yesu atar hirər Hyel, an akwa thlentə thlawardzi ngəni ala giri na mjir Hyel na ahar Afisa, giri na ka jirkur akwa Kristi Yesu.

²Ka Hyel na Təddar mburu, ka Mthlaku Yesu Kristi hara ala giri ɓɗakkur, ka tsa na ala giri msərakur.

³Ka mburu usar Hyel na Təddar Mthlakər mburu Yesu Kristi, na hamta ala mburu shanga barkayeri na akwa amtazi, kamnyar tə mburu ku ndzi duku ka Kristi.

⁴Hyel carɓəla mburu təng akəmata tsa avəi səla duniya, abbər ka mburu ndzi ɓɗakkarkara kula biku akəmari.

⁵Hyel ku kurtə ɗəmha abbər ka mburu ndzi maɗa'ni atar Yesu Kristi, apatə tsa ku ɗəmha akwa hirər ɗəffari.

⁶Tsa hara apani ni kamnyar ka mburu hu ɓɗakkur na ka səli tə tsa hara ala mburu cauta atar Ɓzərni tə tsa hirhir ni.

⁷Kamnyar atar mamshir Ɓzərni, antə tsa pəli mburu ka msərantə mburu, ka tifəmta ala mburu shanga bikər mburu, shang kamnyar hirkurərni na ol ni. Tsa hara ngəni kamnyar jili hirkurərni

⁸tə tsa shamta ata kəra mburu, akwa shanga ɗəɗukur ka nggaɓəlar su.

⁹Hyel ku ncaɓəla ala mburu ashira su tə tsa ɗəmhə kamnyar mburu, ka nghyaɓəla akwa Kristi.

¹⁰Tsuwa su tə tsa ɗəmhə ni an abbər, ma sakatə su tə tsa ɗəmhə ni ku hara, tsa ata paktə shanga suayeri na amtazi ka na akwa duniya akira kuthlikur ar Kristi.

¹¹Kamnyar Hyel ku ɗəmha ka carɓəla mburu atar Kristi, abbər ka mburu ndzi mjirni təng akwa baɗitari. Tsuwa shanga su ku hara apatə tsa ɗəmhə ni.

¹²Su na hara tə tsa carɓəla yeru ntangkəma ni, an abbər ka yeru na mjir Yahudi, na baɗitə vəkər ka Kristi ni, sə ndzi mjir hu Hyel akwa haptə səliyirni.

¹³Tsuwa atar Kristi, giri ma giri ku ndzi mjir Hyel, giri na ku nggatə gari ar jirkur, watau labar na msəra na kamnyar mbantə giri ni. Kamnyar sakatə giri hamta jiri aka Kristi ni, antə Hyel hamta ala giri Mambəl na Ɓɗakkarkara apatə tsa ku kətə alkawalari, tə tsa ndzi apa seɗa Hyel an ata giri kamnyar ncaɓəla abbər giri arni.

¹⁴Mambəl na Ɓɗakkarkara an seɗata ala mburu abbər tsa ata sə hamta ala mburu kifə tə tsa hara ala mburu alkawalari ni. Kamnyar tsa ku kurtə pəli mburu, antə mburu ku ndzi mjirni, kamnyar ka mburu sə hu ni ka haptə səliyirni.

¹⁵Antə təng tə I ku nggata ata kəra hamta jirər giri akwa Mthlaku Yesu, ka laku tə giri akwa hir shanga mjir Hyel,

¹⁶I aɗi tsamta usar Hyel kamnyar giri wa. Kəlara saka I ana ɗangtə giri akwa adduwarna,

¹⁷akwa kiɗa abbər ka Hyelər Mthlakər mburu Yesu Kristi, Tədda na ka səli, na ala giri Mambələr ɗəɗukur ka ar ngkərɓəla su ata kəra Hyel.

¹⁸Tsuwa I akwa hara adduwa abbər ka tsa kəlar nca giri təbwar mambəla, kamnyar ka giri nggaɓəla su tə mji tə tsa kəga ɗa akwa vəkər kari ni, mjir fa kifərni na ɓɗakkarkara na nghyinghyari ka səli ni.

¹⁹Tsuwa I akwa hara adduwa abbər ka giri səndə dunar kuthlikur arni tə mda amzhi ngkərɓəlari wa na akwa kəthlər akwa yeru na ku hamta jiri ni. Dunar kuthlikur na akwa kəthlər akwa yeru ni an su duku ka duna na ola

²⁰natə tsa kəthlər kəgari akwa sakatə tsa thlentə Kristi akwa mtəmta, ka vəi ni akwa vəi olkur na abwa mazəmari amtazi ni.

²¹Kulini tsa ku təramta shanga kuthlyayeri, ka dunar kuthlikurayeri, ka dunayeri, ka mji na ol'ola, ka shanga suayeri damwa, na akwa zaman ngəni ka na akwa zaman na akəmazi.

²²Hyel ku hamta shanga su akwa tsiya Kristi, ka vəngkər ni ata kəra shanga su kamnyar dlarər ikələziya.

²³Tsuwa Ikələziya an dza Kristi, atar Kristi antə Ikələziya ata mzhi kuri shanga su ka nghyaɓəla shanga su, apatə Kristi ku nghyantə shanga su ni.