Read bura-pabir Fəlippi 1 Bible Online

Fəlippi 1 - bura-pabir bible

Fəlippi 1

¹I na Bulus, ka Timothli na mafayeri ar Kristi, an akwa thlentə thlawardzi ngəni ala giri shang na mjir Hyel na akwa nu Kristi Yesu ahar Fəlippi, ata kəma duku kəga mji na ol'olər ikələziya kəga mjir kəthlər na akwa nca giri.

²Ka Hyel na Təddar mburu, ka Mthlaku Yesu Kristi hara ala giri ɓɗakkur, ka tsa na ala giri msərakur.

³I ana usar Hyel kamnyar giri, kəlara sakatə I akwa dzama ata kəra giri.

⁴Tsuwa kəlara sakatə I akwa hara adduwa kamnyar shanga giri, I ana hara ka kucali.

⁵I ana usar giri kamnyar giri ku paktə kər ka iya akwa kəthlər ar ngkər labar ni, təng tsu akwa vir tə I baɗita har ba kulini.

⁶Tsuwa I ku mbərsa abbər Hyel na baɗitə kəthlər ngəni ɓɗaku ngəni akwa nca giri ni, ata pwar giri ka vədza aka sakatə kəthlər ni ata kura akwa vir tə Yesu Kristi ata ngka.

⁷Kalkal kəi dingngga dzama ata kəra shanga giri apani tədəku, kamnyar parang giri ata ɗəffi! Kamnyar shanga giri ku ndzi mjir kəthlər nvwa ra akwa sakatə Hyel hara ali ɓɗakkur ni, japu akwa sakatə I akwa pərsəna ka sakatə I akwa mbul kəra labar na msəra, natə I jaktə dunautə ni ni.

⁸Kamnyar Hyel an seɗarna, tsa asəndə laku tə I hir shanga giri akwa, ka laku tə I akwa bara kəi wutə giri akwa! Jiri, I hir giri ka jili hirkur na ar Kristi Yesu ni!

⁹Adduwarna an abbər ka hirkurər giri, ka səndər sur giri, ka nggaɓəla sur giri akwa shanga su, shang jakjaka.

¹⁰Kamnyar suayeri ngəni ata dlar giri ka giri mzhi carɓəla su na ɓɗaku, kamnyar ka giri ndzi kəcəkəcari kula biku har ka vədza aka vir tə Kristi ata ngka.

¹¹Tsuwa ka giri ndzi nghyinghyari ka halayeri na ɓɗakɓɗaku, natə Yesu Kristi an ata vu ɗəffa giri, kamnyar jili su apani an ata haptə səliyir Hyel, ka mji hu ni.

¹²I akwa bara ka giri səndə maɗaməma, abbər su na wutə ra ni, ku dlar akwa ləkəmar ngkər labar na msəra ni.

¹³Kamnyar shanga mji na azi akwa pərsəna ni, purəm kəga sojayeri na akwa gadi kəi kuthlikur ni, ku sənda abbər I akwa pərsəna ni kamnyar tə I akwa hara kəthlər aka Kristi.

¹⁴Tsuwa ndzəndziyirna akwa pərsəna ni ku jaktə dunautə hamta jirər bwar ola mji na akwa Mthlaku, har tə kulini da akwa mzhi ngkər ndərər Hyel kula thlivəra təramta na hwatu.

¹⁵Jiri, mji laga akwa nca ɗa akwa ngkər labarər Kristi ni kamnyar səlka, ka bara mpa. Amma mji laga akwa harari ka ɗəffu na ɓɗaku.

¹⁶Ar mji ngəni da ana ngkər labar ni ka hirkur, kamnyar da ku sənda abbər mdə hambwa ra akwa pərsəna ni kamnyar tə I akwa mbul kəra labar na msəra ni.

¹⁷Amma ar mji ndaga, da ana ngkər labar ar Kristi ni ka halər hirkər akwa ɗəffa ɗa, aɗi akwa jirkur wa. Ar ɗa da akwa bara ka da jaktə pwasi ali bwari damwa ata kəra bwani tə I akwa ɗarari akwa pərsəna ni.

¹⁸Amma ahara su wa. Arna kam kəlara laku tə da nuwa akwa ngkər labar ata kəra Kristi ni, wala an ka shimnyakur, wala an ka jirkur, tsu da akwa ngkər labar ata kəra Kristi. Antə arna I ka kucali ata kəra su ngəni. Tsuwa I ata ləkəma ka kucali ata kər.

¹⁹Kamnyar I ku sənda abbər atar adduwar giri ka dlarər Mambələr Yesu Kristi, tsu vir laga mda ata sə psi ra.

²⁰Su tə I akwa mwaɓari ka vəkər kamnyari, an kəi wuta abbər I aɗi səntə sur səli aka kəri akwa kəthlər ar Mthlaku wa, amma kəi mzhi ngkər labar kula thlivəra. Tsuwa kəi hara kəthlər apatə I amzha kulini ka tədəku, kamnyar haptə səli ka olkur ar Kristi akwa shanga su tə I ata harari, wala I an ata ndzi ka mpika wala I an ata mta.

²¹Kamnyar ma I ata ndzi ka mpika, ma I an ata mtə tsuwa, ata ndzi ali ka riɓa.

²²Amma ma I ata ndzi ka mpika, I ata mzhi hara kəthlər hang kamnyar Kristi. Antə apani, I asənda akwa nca ɗa tə kəi carɓəla wa.

²³Kəri suɗsuɗa. Kəri ka mwari adzə Kristi ka yeru ndzi ka tsa, kamnyar ngəni an təramta ali ta shang.

²⁴Amma təng tə I akwa bara kəi dlar giri ni, kuji kəi ndzi ka mpikə ni.

²⁵I ku mbərsa abbər I ata carɓəla kəi ndzi ka mpikə ni, kamnyar kəi ləkəma ka dlar giri shang, ka giri ləkəma ka kəla akwa hamta jirər giri ka kucali.

²⁶Antə ma sakatə I ku jaktə si adzə giri, giri ata wutə sur gaya na olari ata kəra Kristi, kamnyar su tə tsa akwa harari akwa ndzəndziyirna.

²⁷Amma na olari, ka giri wuta abbər giri ku namtə ndzəndziyir giri, ka ndzi apatə labar na msəra ar Kristi akwa barari. Antə wala I an ku ra wuli giri, wala I an aɗi mzhi mwari kəra wa, kəi nggata abbər giri ku thləthlatə gyang akwa hamta jirər giri, akwa hara shanga su ka mnya duku, ka hangkala giri shang, shanga giri akwa ntsari kamnyar wutə mji na ata hamta jiri aka labar ngəni msəra ni.

²⁸Giri aɗiya thlivər dawayeri ar giri wala raka wa. Apani ni, ata ncaɓəla ala ɗa abbər da aɗi ata nggyari giri wa, amma giri ata mbantədzi. Tsuwa Hyel an ata hara su ngəni.

²⁹Kamnyar Hyel aɗi hara ala giri ɓɗakkur abbər ka giri mzhi hamta jiri akwa Kristi daci wa, amma ka giri mzhi nggitə bwani kamnyar ni tsuwa.

³⁰Giri ku wutə laku tə I ɗar bwani akwa, tsuwa har ba kulini giri akwa nggatə jili bwani tə I akwa. Apani ku ndzi dwali ka giri ɗar jili bwani tə I akwa ɗarari ni.